ᱵᱳᱨᱟᱢᱳᱱᱤ ᱜᱟᱰᱟ
 |
| ᱱᱚᱣᱟ ᱫᱚ ᱢᱤᱫ ᱚᱛᱱᱚ ᱦᱳᱭᱮᱱᱟ |
ᱜᱟᱰᱟᱨᱮ ᱫᱚ ᱮᱠᱮᱱ ᱫᱟᱜ ᱢᱚᱛᱚ ᱫᱚ ᱵᱟᱝ ᱟᱹᱛᱩᱜᱼᱟ ᱱᱳᱣᱟᱛᱮ ᱫᱚ ᱢᱟᱱᱣᱟ ᱥᱚᱦᱵᱚᱛ ᱟᱨ ᱟᱹᱨᱤ ᱪᱟᱹᱞᱤ ᱦᱚᱸ ᱜᱮᱢᱮᱨᱳᱜᱠᱟᱱᱟ᱾ ᱜᱟᱰᱟ ᱫᱚ ᱫᱩᱱᱤᱭᱟᱹ ᱨᱮᱭᱟᱜ ᱟᱭᱢᱟ ᱢᱟᱱᱣᱟ ᱥᱚᱦᱵᱚᱛᱮ ᱵᱮᱱᱟᱣ ᱨᱟᱠᱟᱵᱼᱟᱠᱟᱫᱟ᱾ ᱥᱮᱫᱟᱭᱢᱟ ᱡᱩᱜᱽ ᱠᱷᱚᱱᱜᱮ ᱢᱟᱱᱣᱟᱠᱳ ᱫᱚ ᱜᱟᱰᱟ ᱟᱲᱮᱨᱮ ᱟᱠᱳᱣᱟᱜ ᱰᱤᱦᱟᱹ ᱰᱤᱱᱰᱟᱹᱠᱳ ᱵᱮᱱᱟᱣ ᱟᱹᱜᱩᱣᱟᱠᱟᱫᱟ᱾ ᱜᱟᱰᱟ ᱫᱟᱜᱛᱮ ᱟᱠᱳᱣᱟᱜ ᱛᱮᱛᱟᱝ, ᱳᱲᱟᱜ ᱫᱩᱣᱟᱹᱨ, ᱪᱟᱥ ᱵᱟᱥ, ᱵᱟᱹᱱᱤᱡᱽ ᱵᱮᱯᱟᱨᱠᱳ ᱯᱩᱨᱟᱹᱣᱟᱠᱟᱫᱟ᱾ ᱜᱟᱰᱟ ᱫᱚ ᱢᱤᱫᱴᱮᱱ ᱡᱤᱭᱚᱱ ᱛᱷᱟᱹᱨᱠᱟᱱᱟ᱾ ᱳᱱᱟᱛᱮᱜᱮ ᱢᱟᱱᱣᱟᱠᱳ ᱫᱚ ᱱᱳᱣᱟ ᱟᱲᱮᱨᱮ ᱛᱟᱦᱮᱱᱠᱳ ᱨᱟᱹᱥᱠᱟᱹᱜᱼᱟ᱾ ᱥᱟᱱᱛᱟᱞ ᱦᱚᱯᱚᱱᱠᱳ ᱦᱚᱸ ᱡᱩᱜᱽ ᱠᱷᱚᱱᱜᱮ ᱵᱤᱨ ᱵᱩᱨᱩ ᱥᱟᱶ ᱥᱟᱶᱛᱮ ᱜᱟᱰᱟ ᱟᱲᱮᱨᱮ ᱟᱠᱳᱣᱟᱜ ᱟᱛᱳᱠᱳ ᱵᱟᱥᱟᱣᱟᱠᱟᱫᱟ᱾ ᱥᱟᱱᱛᱟᱞ ᱯᱟᱨᱜᱟᱱᱟᱨᱮ ᱢᱮᱱᱟᱜ ᱵᱳᱨᱟᱢᱳᱱᱤ ᱜᱟᱰᱟ ᱦᱚᱸ ᱱᱚᱱᱰᱮᱱᱠᱳ ᱦᱚᱲᱟᱜ ᱢᱤᱫᱴᱮᱱ ᱡᱤᱭᱚᱱ ᱛᱷᱟᱹᱨᱠᱟᱱᱟ᱾
ᱵᱳᱨᱟᱢᱳᱱᱤ ᱜᱟᱰᱟ ᱫᱚ ᱫᱩᱢᱠᱟ ᱠᱷᱚᱱ ᱩᱛᱟᱹᱨᱨᱮ ᱢᱮᱱᱟᱜ ᱫᱩᱫᱷᱣᱟ ᱯᱟᱦᱟᱲᱤ (ᱫᱩᱫᱷᱟᱹ ᱯᱟᱦᱟᱲ) ᱠᱷᱚᱱ ᱳᱰᱳᱝᱳᱜᱠᱟᱱᱟ᱾ ᱱᱳᱣᱟ ᱜᱟᱰᱟ ᱫᱚ ᱫᱟᱢᱤᱱᱼᱤᱦᱼᱠᱚᱹᱦᱨᱮ ᱡᱷᱤᱞᱤᱢᱤᱞᱤ ᱟᱨ ᱢᱩᱥᱱᱤᱭᱟ ᱥᱮᱡᱛᱮ ᱟᱹᱛᱩᱜᱠᱟᱱᱟ᱾ ᱱᱳᱣᱟ ᱫᱚ ᱫᱟᱨᱤᱱ ᱢᱟᱣᱞᱣᱮᱥᱣᱟᱨ ᱴᱷᱮᱱ ᱫᱩᱢᱠᱟ ᱵᱟᱹᱜᱤᱠᱟᱛᱮ ᱯᱟᱹᱪᱷᱤᱢ ᱵᱟᱝᱜᱽᱞᱟ ᱨᱮᱭᱟᱜ ᱱᱟᱞᱦᱟᱴᱤ ᱥᱛᱟᱛᱤᱭᱳᱱ ᱥᱮᱡᱛᱮ ᱟᱹᱛᱩ ᱳᱰᱳᱝᱠᱟᱛᱮ ᱜᱟᱝ ᱱᱟᱺᱭᱨᱮ ᱫᱩᱞ ᱢᱤᱫᱳᱜᱠᱟᱱᱟ᱾ ᱱᱳᱣᱟ ᱨᱮᱭᱟᱜ ᱥᱚᱝᱜᱮ ᱜᱟᱰᱟᱠᱤᱱ ᱨᱮᱭᱟᱜ ᱧᱩᱛᱩᱢ ᱫᱚ ᱜᱩᱢᱨᱟᱹ ᱟᱨ ᱮᱨᱳ ᱠᱟᱱᱟ᱾
ᱵᱳᱨᱟᱢᱳᱱᱤ ᱜᱟᱰᱟ ᱢᱮᱱ ᱞᱮᱠᱷᱟᱱᱜᱮ ᱢᱚᱱᱮᱨᱮ ᱟᱭᱢᱟ ᱠᱟᱛᱷᱟ ᱛᱟᱥᱮᱜᱳᱫᱳᱜᱼᱟ᱾ ᱵᱳᱨᱟᱢᱳᱱᱤ ᱜᱟᱰᱟ ᱫᱚ ᱥᱟᱱᱛᱟᱞ ᱯᱟᱨᱜᱟᱱᱟ ᱨᱮᱭᱟᱜ ᱟᱹᱰᱤ ᱧᱩᱛᱩᱢᱟᱱ ᱜᱟᱰᱟᱜᱮ᱾ ᱱᱳᱣᱟ ᱜᱟᱰᱟ ᱫᱚ ᱥᱟᱱᱛᱟᱞ ᱥᱳᱢᱟᱡᱽ, ᱟᱨ ᱟᱹᱨᱤ ᱪᱟᱹᱞᱤ ᱥᱟᱶ ᱟᱹᱰᱤ ᱡᱳᱲᱟᱣ ᱢᱮᱱᱟᱜᱼᱟ᱾ ᱱᱳᱣᱟ ᱜᱟᱰᱟ ᱫᱚ ᱱᱚᱱᱰᱮᱱᱟᱜ ᱥᱚᱦᱵᱚᱛ ᱵᱮᱱᱟᱣ ᱨᱟᱠᱟᱵᱽᱨᱮ ᱟᱹᱰᱤ ᱢᱟᱨᱟᱝ ᱢᱚᱦᱚᱛ ᱟᱨ ᱮᱱᱮᱢ ᱢᱮᱱᱟᱜᱛᱟᱭᱟ᱾ ᱥᱟᱱᱛᱟᱞᱤ ᱥᱮᱨᱮᱧᱨᱮᱢᱟ ᱵᱳᱨᱟᱢᱳᱱᱤ ᱜᱟᱰᱟ ᱨᱮᱭᱟᱜ ᱟᱹᱰᱤ ᱢᱟᱱ ᱢᱮᱱᱟᱜ᱾ ᱡᱩᱜᱽ ᱠᱷᱚᱱ ᱟᱹᱛᱩᱜᱠᱟᱱ ᱱᱳᱣᱟ ᱜᱟᱰᱟ ᱧᱮᱞᱛᱮ ᱟᱭᱢᱟ ᱜᱟᱭᱮᱱᱟᱦᱟᱠᱳ ᱟᱭᱢᱟ ᱞᱮᱠᱟᱱ ᱥᱮᱨᱮᱧᱠᱳ ᱫᱚᱝ, ᱥᱳᱦᱨᱟᱭ ᱟᱨ ᱞᱟᱜᱽᱲᱮᱸ ᱨᱟᱹᱲᱨᱮᱠᱳ ᱜᱩᱛᱩ ᱜᱟᱞᱟᱝᱟᱠᱟᱫᱟ᱾ ᱵᱳᱨᱟᱢᱳᱱᱤ ᱜᱟᱰᱟ ᱥᱟᱶ ᱯᱤᱨᱤᱛ ᱯᱤᱨᱤᱛᱤᱭᱟᱹ, ᱵᱳᱭᱦᱟ ᱵᱚᱠᱚᱭᱦᱟ, ᱮᱝᱜᱟᱛ ᱟᱯᱟᱛ, ᱟᱯᱟ ᱵᱟᱨᱮ, ᱮᱝᱜᱟ ᱦᱚᱱ, ᱫᱷᱤᱨᱤ, ᱜᱤᱛᱤᱞ, ᱰᱷᱤᱯ, ᱠᱟᱹᱥᱤ ᱜᱮᱞᱮ, ᱫᱟᱨᱮ ᱛᱷᱳᱯᱨᱳ ᱟᱨ ᱱᱳᱣᱟ ᱨᱮᱭᱟᱜ ᱦᱮᱲᱟᱱ ᱦᱩᱥᱱᱟᱹᱜ ᱧᱮᱞᱮᱱᱚᱢ ᱨᱮᱭᱟᱜ ᱟᱭᱢᱟ ᱚᱬᱦᱮᱸ ᱥᱟᱨᱦᱟᱣᱠᱳᱜᱮ ᱥᱮᱨᱮᱧ ᱨᱩᱯᱨᱮ ᱥᱩᱛᱟᱹᱢᱨᱮ ᱢᱳᱛᱤ ᱜᱟᱞᱟᱝᱟᱠᱟᱫ ᱞᱮᱠᱟ ᱜᱟᱛᱷᱟᱣ ᱥᱟᱡᱟᱣ ᱢᱮᱱᱟᱜᱼᱟ᱾
ᱢᱩᱥᱱᱤᱭᱟ ᱟᱛᱳ ᱠᱷᱚᱱ ᱧᱮᱞᱳᱜᱠᱟᱱ ᱵᱳᱨᱟᱢᱳᱱᱤ ᱜᱟᱰᱟ ᱨᱮᱭᱟᱜ ᱢᱚᱱ ᱢᱟᱹᱞᱩᱝᱳᱜ ᱧᱮᱞᱮᱱᱚᱢ ᱧᱮᱞᱛᱮ ᱡᱟᱸᱦᱟᱸᱭᱜᱮᱢ ᱴᱷᱟᱠ ᱩᱛᱟᱹᱨᱳᱜᱼᱟ᱾ ᱥᱟᱹᱝᱜᱤᱧ ᱠᱷᱚᱱ ᱧᱮᱞᱳᱜᱨᱮ ᱛᱳᱣᱟ ᱞᱮᱠᱟ ᱯᱳᱬᱜᱮ ᱟᱛᱩᱜᱠᱟᱱ ᱫᱟᱜ᱾ ᱜᱟᱰᱟ ᱛᱟᱞᱟᱨᱮ ᱦᱟᱱᱰᱮ ᱱᱦᱟᱱᱰᱮ ᱠᱟᱹᱥᱤ ᱵᱟᱦᱟ ᱫᱟᱞᱟᱭ ᱫᱟᱞᱟᱭ ᱦᱤᱞᱟᱹᱣᱜᱠᱟᱱ ᱦᱟᱺᱥᱜᱮ ᱧᱮᱞᱳᱜᱠᱟᱱᱟ᱾ ᱜᱟᱰᱟ ᱟᱲᱮ ᱟᱲᱮᱛᱮ ᱱᱟᱱᱟ ᱦᱩᱱᱟᱹᱨ ᱫᱟᱨᱮ ᱛᱷᱳᱯᱨᱳᱠᱳ᱾ ᱜᱟᱰᱟ ᱦᱟᱱᱟᱥᱟ ᱱᱦᱳᱣᱟᱥᱟᱨᱮ ᱛᱤᱡᱼᱟᱠᱟᱱ ᱩᱥᱩᱞ ᱵᱤᱨ ᱵᱩᱨᱩ ᱟᱨ ᱜᱟᱰᱟ ᱱᱦᱳᱣᱟᱥᱟᱨᱮ ᱫᱚ ᱫᱟᱹᱢᱜᱤ, ᱵᱟᱲᱜᱮᱠᱳ ᱤᱱᱟᱹᱠᱟᱛᱮ ᱦᱚᱲ ᱟᱛᱳ᱾ ᱜᱟᱰᱟ ᱛᱟᱞᱟ ᱛᱟᱞᱟᱛᱮ ᱯᱳᱱᱰ ᱫᱷᱤᱨᱤ ᱪᱟᱠᱮ ᱪᱟᱠᱮ ᱦᱟᱱᱛᱮ ᱱᱦᱟᱛᱮ ᱟᱴᱮᱫᱼᱟᱠᱟᱱᱟ᱾ ᱱᱳᱣᱟ ᱫᱷᱨᱤᱛᱮᱜᱮ ᱱᱟᱫᱽᱣᱟ, ᱥᱟᱥᱟᱧ ᱨᱤᱫ ᱟᱨ ᱜᱩᱲᱜᱩ ᱫᱷᱤᱨᱤ, ᱯᱤᱛᱷᱟᱹ ᱵᱮᱞᱱᱟ ᱫᱷᱤᱨᱤ ᱮᱢᱟᱱ ᱵᱮᱱᱟᱣᱜᱠᱟᱱᱟ᱾ ᱨᱟᱹᱥᱠᱟᱹ ᱨᱮᱭᱟᱜ ᱠᱟᱛᱷᱟ ᱫᱚ ᱱᱳᱣᱟᱜᱮ ᱡᱮ ᱱᱳᱣᱟᱠᱳ ᱫᱚ ᱟᱛᱳᱨᱮᱱ ᱦᱚᱲᱜᱮᱠᱳ ᱵᱮᱱᱟᱣᱮᱫᱠᱟᱱᱟ᱾
ᱵᱳᱨᱟᱢᱳᱱᱤ ᱜᱟᱰᱟ ᱨᱮᱭᱟᱜ ᱜᱤᱛᱤᱞ ᱫᱚ ᱟᱹᱰᱤ ᱱᱟᱢᱰᱟᱠᱜᱮᱭᱟ᱾ ᱧᱮᱞᱳᱜᱨᱮ ᱯᱳᱬᱫᱽᱜᱮ ᱟᱨ ᱥᱟᱯᱷᱟ᱾ ᱱᱳᱣᱟ ᱜᱟᱰᱟ ᱨᱮᱭᱟᱜ ᱜᱤᱛᱤᱞᱛᱮ ᱞᱟᱹᱴᱩ ᱞᱟᱹᱴᱩ ᱫᱳᱞᱟᱱ ᱟᱨ ᱥᱟᱠᱷᱳᱠᱳ ᱵᱮᱱᱟᱣᱮᱫᱠᱟᱱᱟ᱾ ᱜᱤᱛᱤᱞ ᱯᱟᱹᱭᱠᱟᱹᱨᱠᱳ ᱫᱚ ᱢᱩᱥᱱᱤᱭᱟ ᱜᱟᱰᱟ ᱜᱷᱟᱴ ᱠᱷᱚᱱ ᱱᱟᱥᱮᱱᱟᱜ ᱯᱟᱭᱥᱟ ᱮᱢᱠᱟᱛᱮ ᱠᱷᱩᱵᱽᱠᱳ ᱟᱹᱛᱠᱤᱨ ᱡᱚᱝᱟᱜᱠᱟᱱᱟ᱾ ᱵᱳᱨᱟᱢᱳᱱᱤ ᱜᱟᱰᱟ ᱵᱟᱵᱚᱛᱛᱮ ᱟᱹᱰᱤ ᱠᱟᱹᱴᱤᱡ ᱠᱷᱚᱱᱜᱮ, ᱦᱟᱯᱲᱟᱢᱠᱳᱣᱟᱜ ᱢᱳᱪᱟᱨᱮ ᱟᱨ ᱟᱠᱷᱲᱟᱨᱮᱱ ᱜᱟᱭᱮᱱᱟᱦᱟᱠᱳᱣᱟᱜ ᱥᱮᱨᱮᱧᱨᱮᱧ ᱟᱧᱡᱚᱢᱟᱠᱟᱫ ᱛᱟᱦᱮᱸᱠᱟᱱᱟ᱾ ᱛᱮᱦᱮᱧ ᱫᱚ ᱟᱹᱰᱤ ᱥᱳᱨ ᱠᱷᱚᱱ ᱢᱮᱸᱫ ᱯᱮᱨᱮᱡᱼᱤᱧ ᱧᱮᱞᱟᱱᱟᱜᱼᱟ᱾ ᱱᱳᱣᱟ ᱧᱮᱞᱛᱮ ᱢᱚᱱᱮ ᱨᱮᱭᱟᱜ ᱟᱹᱰᱤ ᱢᱟᱨᱟᱝ ᱢᱮᱱᱡᱚᱝᱟᱜ ᱯᱩᱨᱟᱹᱣᱮᱱᱛᱤᱧᱟᱹ᱾ ᱢᱚᱱᱮ ᱡᱤᱣᱤᱨᱮ ᱟᱹᱰᱤ ᱫᱷᱤᱨᱯᱩᱨᱤᱧ ᱟᱹᱭᱠᱟᱹᱣᱠᱮᱫᱟ᱾ ᱥᱟᱹᱨᱤᱜᱮ ᱱᱳᱣᱟ ᱨᱮᱭᱟᱜ ᱦᱩᱥᱱᱟᱹᱜ ᱧᱮᱞᱮᱱᱚᱢᱛᱮ ᱦᱟᱫᱚᱥ ᱦᱟᱹᱨᱥᱩᱲᱟᱠᱟᱱ ᱢᱚᱱ ᱦᱚᱸ ᱠᱟᱹᱥᱤ ᱜᱮᱞᱮ ᱞᱮᱠᱟ ᱫᱟᱞᱟᱭ ᱫᱟᱞᱟᱭᱳᱜᱛᱮ ᱠᱷᱟᱨᱥᱟᱞᱟᱜᱳᱫᱳᱜᱼᱟ᱾
ᱵᱳᱨᱟᱢᱳᱱᱤ ᱜᱟᱰᱟ ᱧᱩᱛᱩᱢᱛᱮ ᱢᱤᱫᱴᱮᱱ ᱟᱹᱰᱤ ᱱᱟᱢᱰᱟᱠ ᱥᱮᱨᱮᱧ
ᱵᱳᱨᱟᱢᱳᱱᱤ ᱜᱟᱰᱟ ᱜᱤᱛᱤᱞ
ᱱᱟᱥᱮ ᱱᱟᱥᱮ ᱫᱟᱜᱛᱜᱮ ᱞᱮᱜᱳᱫᱳᱜᱼᱟ
ᱚᱱᱮ ᱳᱱᱠᱟᱜᱮ ᱪᱚ
ᱱᱮ ᱵᱮᱛᱟᱨ ᱠᱩᱲᱤᱠᱳ
ᱱᱟᱥᱮ ᱱᱟᱥᱮ ᱨᱚᱲᱛᱮᱠᱳ ᱢᱟᱹᱞᱩᱝᱜᱳᱫᱳᱜ᱾
ᱢᱩᱥᱱᱤᱭᱟ
ᱠᱟᱴᱷᱤᱠᱩᱱᱰ
ᱫᱩᱢᱠᱟ
ᱯᱷᱚᱴᱚᱨᱮ:ᱼ ᱢᱩᱥᱱᱤᱭᱟ ᱟᱛᱳ ᱠᱷᱚᱱ ᱵᱳᱨᱟᱢᱳᱱᱤ ᱜᱟᱰᱟ ᱨᱮᱭᱟᱜ ᱟᱹᱰᱤ ᱥᱟᱹᱝᱜᱤᱧ ᱦᱟᱹᱵᱤᱡ ᱧᱮᱞᱚᱜᱠᱟᱱ ᱢᱚᱱ ᱢᱟᱹᱞᱩᱝᱳᱜ ᱧᱮᱞᱮᱱᱚᱢ
ᱜᱟᱹᱛᱷᱱᱤ
ᱚᱛᱱᱚ
