ᱠᱷᱟᱨᱥᱟᱶᱟᱸ-ᱡᱷᱟᱨᱠᱷᱟᱱᱰ ᱨᱮᱱ ᱟᱹᱫᱤᱵᱟᱹᱥᱤ ᱑ ᱡᱟᱱᱩᱣᱟᱨᱤ ᱫᱚ 'ᱠᱟᱞᱟ ᱫᱤᱣᱟᱥ' ᱞᱮᱠᱟᱛᱮ ᱪᱮᱫᱟᱜ ᱠᱳ ᱢᱟᱱᱟᱣᱟ?
 |
| ᱟᱹᱫᱤᱵᱟᱹᱥᱤᱠᱳᱣᱟᱜ ᱧᱩᱛᱟᱹᱛ ᱢᱟᱦᱟᱸ |
ᱡᱷᱟᱨᱠᱷᱟᱱᱰ ᱵᱮᱜᱟᱨ ᱨᱟᱡᱽ ᱨᱮᱱᱟᱜ ᱠᱳᱭ ᱞᱟᱹᱜᱤᱫ ᱡᱟᱣᱨᱟ ᱞᱮᱱ ᱟᱹᱫᱤᱵᱟᱹᱥᱤ ᱠᱳᱣᱟᱜ ᱥᱟᱦᱟᱫᱟᱛ ᱠᱟᱛᱷᱟ ᱞᱟᱹᱭ ᱛᱩᱞᱩᱡ ᱞᱟᱹᱭ ᱦᱩᱭᱩᱜ ᱠᱟᱱᱟ ᱡᱮ, ᱱᱚᱣᱟ ᱫᱚ ᱢᱤᱫ ᱱᱳᱝᱠᱟᱱ ᱟᱱᱫᱚᱞᱚᱱ ᱛᱟᱦᱮᱸ ᱠᱟᱱᱟ ᱡᱟᱦᱟᱸ ᱨᱮ ᱯᱷᱩᱨᱜᱟᱹᱞ ᱧᱟᱢ ᱠᱟᱛᱮ ᱠᱷᱟᱹᱞᱤ ᱥᱟᱲᱷᱮ ᱯᱩᱱ ᱪᱟᱸᱫᱚ ᱛᱟᱭᱚᱢ ᱜᱮ ᱢᱮᱱᱫᱚ ᱑ ᱡᱟᱱᱩᱣᱟᱨᱤ ᱑᱙᱔᱘ ᱨᱮ ᱠᱷᱟᱨᱥᱚᱶᱟᱸ ᱦᱟᱴ ᱵᱟᱡᱟᱨᱴᱟᱬ ᱨᱮ ᱯᱩᱞᱤᱥ ᱯᱷᱟᱭᱨᱤᱝ ᱛᱮ ᱥᱟᱭ ᱥᱟᱭ ᱟᱹᱫᱤᱵᱟᱹᱥᱤ ᱠᱚ ᱜᱚᱡ ᱞᱮᱱᱟ ᱾
᱑ ᱡᱟᱱᱩᱣᱟᱨᱤ ᱑᱙᱔᱘ : ᱠᱷᱟᱨᱥᱚᱶᱟᱸ ᱜᱳᱞᱤᱠᱟᱸᱰ ᱵᱤᱥᱮᱥ
ᱡᱟᱦᱟᱸ ᱨᱮ ᱯᱩᱨᱟᱹ ᱫᱷᱟᱹᱨᱛᱤ ᱨᱮ ᱯᱩᱭᱞᱩ ᱡᱟᱱᱩᱣᱟᱨᱤ ᱫᱚ ᱱᱟᱶᱟ ᱥᱮᱨᱢᱟ ᱟᱛᱟᱝ ᱫᱟᱨᱟᱢ ᱞᱟᱹᱜᱤᱫ ᱠᱩᱥᱤ ᱨᱟᱹᱥᱠᱟᱹ ᱠᱳ ᱢᱟᱱᱟᱣᱟ, ᱚᱱᱰᱮ ᱜᱮ ᱡᱷᱟᱨᱠᱷᱟᱱᱰ ᱨᱮᱱᱟᱜ ᱠᱷᱟᱨᱥᱟᱶᱟᱸ ᱟᱨ ᱠᱚᱞᱦᱟᱱ ᱴᱚᱴᱷᱟ ᱨᱮᱱ ᱟᱹᱫᱤᱵᱟᱹᱥᱤ ᱜᱟᱛᱟᱠ ᱨᱮᱱ ᱦᱚᱲ ᱫᱚ ᱢᱤᱫ ᱡᱟᱱᱩᱣᱟᱨᱤ ᱫᱚ 'ᱠᱟᱞᱟ ᱫᱤᱣᱟᱥ' (Black Day) ᱟᱨ ᱥᱳᱠ ᱫᱤᱣᱟᱥ ᱞᱮᱠᱟᱛᱮ ᱠᱚ ᱢᱟᱱᱟᱣᱟ ᱾ ᱪᱮᱫᱟᱜ ᱥᱮ ᱯᱷᱩᱨᱜᱟᱹᱞ ᱨᱮᱱᱟᱜ ᱠᱷᱟᱹᱞᱤ ᱥᱟᱲᱮ ᱯᱩᱱ ᱪᱟᱸᱫᱚ ᱛᱟᱭᱚᱢ ᱜᱮ ᱠᱷᱟᱨᱥᱟᱶᱟᱸ ᱦᱟᱴ ᱵᱟᱡᱟᱨᱴᱟᱬ ᱨᱮ ᱯᱩᱞᱤᱥ ᱯᱷᱟᱭᱨᱤᱝ ᱛᱮ ᱟᱭᱢᱟ ᱟᱹᱫᱤᱵᱟᱹᱥᱤ ᱠᱚ ᱜᱚᱡ ᱞᱮᱱᱟ ᱾ ᱱᱚᱣᱟ ᱜᱷᱚᱴᱚᱱ ᱨᱮᱱᱟᱜ ᱠᱟᱨᱚᱱ ᱯᱟᱸᱡᱟ ᱞᱟᱹᱜᱤᱫ ᱟᱵᱚ ᱛᱤᱱᱟᱹᱜ ᱜᱟᱱ ᱛᱟᱭᱚᱢ ᱥᱮᱡ ᱨᱩᱣᱟᱹᱲ ᱦᱩᱭ ᱟᱵᱳᱱᱟ ᱾
᱑᱙᱑᱒ ᱥᱮᱨᱢᱟ ᱨᱮ ᱡᱚᱠᱷᱚᱱ ᱵᱮᱝᱜᱚᱞ ᱠᱷᱚᱱ ᱵᱤᱦᱟᱨ ᱵᱮᱜᱟᱨ ᱞᱮᱱᱟ ᱾ ᱛᱤᱱᱟᱹᱜ ᱜᱟᱱ ᱠᱤᱪᱷᱩ ᱥᱮᱨᱢᱟ ᱛᱟᱭᱚᱢ ᱑᱙᱒᱐ ᱨᱮ ᱵᱤᱦᱟᱨ ᱨᱮᱱᱟᱜ ᱯᱟᱴᱷᱟᱨᱤ ᱴᱚᱴᱷᱟ ᱨᱮᱱ ᱟᱹᱫᱤᱵᱟᱹᱥᱤ ᱠᱚ ᱦᱚᱛᱮᱛᱮ ᱟᱹᱫᱤᱵᱟᱹᱥᱤ ᱜᱟᱫᱮᱞ ᱠᱚ ᱢᱮᱥᱟ ᱠᱟᱛᱮ 'ᱪᱷᱳᱴᱟᱱᱟᱜᱽᱯᱩᱨ ᱩᱱᱱᱟᱹᱛᱤ ᱥᱚᱢᱟᱡᱽ' ᱵᱮᱱᱟᱣ ᱞᱮᱱᱟ ᱾ ᱵᱚᱱᱫᱤ ᱩᱨᱟᱶ ᱟᱨ ᱭᱩ. ᱮᱞ. ᱞᱟᱠᱲᱟ ᱣᱟᱜ ᱟᱹᱭᱩᱨ ᱛᱮ ᱵᱮᱱᱟᱣ ᱞᱮᱱ ᱱᱚᱣᱟ ᱥᱟᱝᱜᱟᱴᱷᱟᱱ ᱦᱚᱛᱮᱛᱮ ᱟᱹᱫᱤᱵᱟᱹᱥᱤ ᱠᱳᱣᱟᱜ ᱢᱤᱫ ᱵᱮᱜᱟᱨ ᱩᱨᱩᱢ ᱵᱮᱱᱟᱣ ᱞᱟᱹᱜᱤᱫ ᱵᱮᱜᱟᱨ ᱡᱷᱟᱨᱠᱷᱟᱱᱰ ᱨᱮᱱᱟᱜ ᱩᱭᱦᱟᱹᱨ ᱵᱮᱱᱟᱣ ᱞᱮᱱᱟ ᱾
᱑᱙᱓᱕ ᱨᱮ ᱩᱰᱤᱥᱟ ᱵᱮᱱᱟᱣ ᱞᱮᱱᱟ ᱾ ᱵᱮᱝᱜᱚᱞ ᱠᱷᱚᱱ ᱳᱰᱤᱥᱟ ᱵᱮᱱᱟᱣ ᱮᱱ ᱛᱟᱭᱚᱢ ᱟᱹᱫᱤᱵᱟᱹᱥᱤ ᱟᱹᱭᱩᱨᱤᱭᱟᱹ ᱠᱳ ᱡᱚᱠᱷᱚᱱ ᱠᱚ ᱧᱮᱞ ᱠᱮᱫᱼᱟ ᱡᱮ ᱞᱟᱠᱪᱟᱨ ᱟᱨ ᱯᱟᱹᱨᱥᱤ ᱟᱹᱫᱷᱟᱹᱨ ᱛᱮ ᱵᱤᱦᱟᱨ ᱟᱨ ᱳᱰᱤᱥᱟ ᱫᱚ ᱵᱮᱜᱟᱨ ᱨᱟᱡᱽ ᱨᱮᱱᱟᱜ ᱢᱟᱱᱚᱛ ᱠᱤᱱ ᱧᱟᱢ ᱠᱮᱫᱼᱟ, ᱛᱚᱵᱮ ᱩᱱᱠᱩ ᱦᱚᱸ ᱪᱷᱳᱴᱟᱱᱟᱜᱽᱯᱩᱨ ᱩᱱᱱᱟᱹᱛᱤ ᱥᱚᱢᱟᱡᱽᱼᱟᱜ ᱵᱮᱱᱟᱨ ᱞᱟᱛᱟᱨ ᱨᱮ ᱪᱷᱳᱴᱟᱱᱟᱜᱽᱯᱩᱨ ᱴᱚᱴᱷᱟ ᱨᱮᱱᱟᱜ ᱠᱚᱞᱦᱟᱱ ᱟᱨ ᱥᱤᱝᱵᱷᱩᱢ ᱤᱞᱟᱹᱠᱟ ᱨᱮ ᱵᱮᱜᱟᱨ ᱡᱷᱟᱨᱠᱷᱟᱱᱰ ᱨᱮᱱᱟᱜ ᱠᱳᱭ ᱞᱟᱹᱜᱤᱫ ᱥᱟᱯᱲᱟᱣ ᱠᱚ ᱮᱛᱚᱦᱚᱵ ᱠᱮᱫᱼᱟ ᱾ ᱱᱚᱣᱟ ᱴᱚᱴᱷᱟ ᱨᱮ ᱢᱮᱛᱟᱜᱼᱢᱮ ᱟᱱᱫᱟᱡᱽ ᱘᱐ ᱯᱨᱟᱛᱤᱥᱟᱛ ᱟᱹᱫᱤᱵᱟᱹᱥᱤ ᱠᱚ ᱛᱟᱦᱮᱸ ᱠᱟᱱᱟ ᱾ ᱱᱚᱣᱟ ᱜᱚᱴᱟ ᱴᱚᱴᱷᱟ ᱜᱮ ᱵᱤᱨ-ᱵᱩᱨᱩ ᱛᱮ ᱮᱥᱮᱫ ᱟᱠᱟᱱ ᱛᱟᱦᱮᱸ ᱠᱟᱱᱟ ᱾
ᱡᱟᱭᱯᱟᱞ ᱥᱤᱝ ᱢᱩᱱᱰᱟ
ᱱᱚᱣᱟ ᱞᱮᱠᱟ ᱛᱮᱜᱮ ᱑᱙᱓᱘ ᱨᱮ ᱡᱟᱭᱯᱟᱞ ᱥᱤᱝ ᱢᱩᱱᱰᱟ ᱫᱚ ᱥᱟᱱᱛᱟᱲ ᱯᱟᱨᱜᱟᱱᱟ ᱨᱮᱱ ᱟᱹᱫᱤᱵᱟᱹᱥᱤ ᱠᱚ ᱦᱚᱸ ᱢᱮᱥᱟ ᱠᱟᱛᱮ 'ᱟᱹᱫᱤᱵᱟᱹᱥᱤ ᱢᱟᱦᱟᱥᱟᱵᱷᱟ'ᱼᱭ ᱵᱮᱱᱟᱣ ᱞᱮᱫᱼᱟ ᱾ ᱟᱹᱫᱤᱵᱟᱹᱥᱤ ᱠᱳᱣᱟᱜ ᱱᱚᱣᱟ ᱥᱟᱶᱛᱟ ᱟᱹᱨᱤ ᱥᱟᱝᱜᱟᱴᱷᱟᱱ ᱛᱟᱞᱟ ᱛᱮ ᱡᱟᱭᱯᱟᱞ ᱥᱤᱝ ᱢᱩᱱᱰᱟ ᱦᱚᱛᱮᱛᱮ ᱵᱮᱜᱟᱨ ᱡᱷᱟᱨᱠᱷᱟᱱᱰ ᱨᱮᱱᱟᱜ ᱩᱭᱦᱟᱹᱨ ᱫᱚ ᱯᱷᱩᱨᱜᱟᱹᱞ ᱢᱟᱲᱟᱝ ᱠᱷᱚᱱ ᱜᱮ ᱨᱟᱡᱽᱼᱟᱹᱨᱤ ᱨᱩᱯ ᱮᱢ ᱞᱟᱹᱜᱤᱫ ᱠᱩᱨᱩᱢᱩᱴᱩ ᱪᱟᱞᱟᱜ ᱠᱟᱱ ᱛᱟᱦᱮᱸᱠᱟᱱᱟ ᱾ ᱢᱩᱪᱟᱹᱫ ᱨᱮ ᱡᱟᱭᱯᱟᱞ ᱥᱤᱝ ᱢᱩᱱᱰᱟᱼᱣᱟᱜ ᱠᱩᱨᱩᱢᱩᱴᱩ ᱫᱚ ᱑᱙᱔᱐ ᱨᱮ ᱡᱤᱛᱠᱟᱹᱨ ᱮ ᱧᱟᱢ ᱠᱮᱫᱼᱟ ᱟᱨ ᱨᱟᱡᱽᱟᱹᱨᱤ ᱥᱚᱝᱜᱚᱴᱷᱚᱱ ᱞᱮᱠᱟᱛᱮ "ᱡᱷᱟᱨᱠᱷᱚᱸᱰ ᱯᱟᱨᱴᱤ" ᱵᱮᱱᱟᱣ ᱞᱮᱱᱟ ᱾ ᱱᱚᱱᱰᱮ ᱠᱷᱚᱱ ᱜᱮ ᱮᱛᱚᱦᱚᱵ ᱮᱱᱟ ᱟᱹᱫᱤᱵᱟᱹᱥᱤ ᱥᱟᱶᱛᱟ ᱨᱮ ᱟᱠᱳᱣᱟᱜ ᱨᱟᱡᱽᱼᱟᱹᱨᱤ ᱦᱤᱥ ᱞᱟᱹᱜᱤᱫ ᱞᱟᱹᱲᱦᱟᱹᱭ ᱾
᱑᱙᱕᱑ ᱨᱮ ᱫᱤᱥᱚᱢ ᱨᱮ ᱡᱚᱠᱷᱚᱱ ᱵᱷᱳᱴ ᱟᱹᱫᱷᱟᱹᱨ ᱛᱮ ᱞᱳᱠᱛᱟᱱᱛᱨᱤᱠ ᱥᱟᱨᱠᱟᱨ ᱵᱮᱱᱟᱣ ᱞᱮᱱᱟ, ᱛᱚᱵᱮ ᱵᱤᱦᱟᱨ ᱨᱮᱱᱟᱜ ᱪᱷᱳᱴᱟᱱᱟᱜᱽᱯᱩᱨ ᱴᱚᱴᱷᱟ ᱨᱮ ᱡᱷᱟᱨᱠᱷᱟᱱᱰ ᱯᱟᱨᱴᱤ ᱢᱤᱫ ᱠᱮᱴᱮᱡ ᱨᱟᱡᱽᱼᱟᱹᱨᱤ ᱫᱟᱞ ᱞᱮᱠᱟᱛᱮ ᱦᱟᱨᱟ ᱨᱟᱠᱟᱵ ᱞᱮᱱᱟ ᱾ ᱑᱙᱕᱒ ᱨᱮᱱᱟᱜ ᱯᱩᱭᱞᱩ ᱵᱷᱳᱴ (General Election) ᱨᱮ ᱪᱷᱳᱴᱟᱱᱟᱜᱽᱯᱩᱨ ᱟᱨ ᱥᱟᱱᱛᱟᱲ ᱯᱟᱨᱜᱟᱱᱟ ᱢᱮᱥᱟ ᱠᱟᱛᱮ ᱓᱒ ᱴᱟᱝ ᱥᱤᱴ ᱟᱹᱫᱤᱵᱟᱹᱥᱤ ᱠᱳ ᱞᱟᱹᱜᱤᱫ ᱨᱤᱡᱟᱨᱵᱽ ᱛᱟᱦᱮᱸ ᱠᱟᱱᱟ ᱾ ᱥᱟᱱᱟᱢ ᱓᱒ ᱴᱟᱝ ᱥᱤᱴ ᱨᱮᱜᱮ ᱡᱷᱟᱨᱠᱷᱚᱸᱰ ᱯᱟᱨᱴᱤ ᱟᱜ ᱜᱮ ᱠᱚᱵᱽᱡᱟ ᱛᱟᱦᱮᱸ ᱠᱟᱱᱟ ᱾ ᱵᱤᱦᱟᱨ ᱨᱮ ᱠᱚᱝᱜᱽᱨᱮᱥ ᱛᱟᱭᱚᱢ ᱡᱷᱟᱨᱠᱷᱟᱱᱰ ᱯᱟᱨᱴᱤ ᱫᱚᱥᱟᱨ ᱢᱟᱨᱟᱝ ᱯᱟᱨᱴᱤ ᱞᱮᱠᱟᱛᱮ ᱨᱟᱠᱟᱵ ᱞᱮᱱ ᱠᱷᱟᱱ ᱫᱤᱞᱞᱤ ᱨᱮ ᱠᱚᱝᱜᱽᱨᱮᱥ ᱟᱜ ᱪᱤᱱᱛᱟᱹ ᱵᱟᱹᱲᱛᱤ ᱮᱱᱟ ᱾ ᱛᱚᱵᱮ ᱮᱛᱚᱦᱚᱵ ᱮᱱᱟ ᱟᱹᱫᱤᱵᱟᱹᱥᱤ ᱠᱳ ᱛᱟᱞᱟ ᱨᱮ ᱨᱟᱡᱽᱼᱟᱹᱨᱤ ᱠᱷᱮᱞᱚᱸᱰ ᱾ ᱚᱱᱟ ᱠᱷᱟᱹᱛᱤᱨ ᱑᱙᱕᱗ ᱨᱮᱱᱟᱜ ᱵᱷᱳᱴ ᱨᱮ ᱡᱷᱟᱨᱠᱷᱟᱱᱰ ᱯᱟᱨᱴᱤ ᱫᱚ ᱯᱩᱱᱭᱟᱹ ᱥᱤᱴ ᱮ ᱦᱟᱨᱟᱣ ᱞᱮᱱᱟ ᱾
᱑᱙᱕᱕ ᱨᱮ ᱨᱟᱡᱽ ᱯᱩᱱᱟᱹᱨᱜᱟᱴᱷᱟᱱ ᱟᱭᱳᱜᱽ ᱥᱟᱢᱟᱝ ᱨᱮ ᱵᱮᱜᱟᱨ ᱡᱷᱟᱨᱠᱷᱟᱱᱰ ᱨᱮᱱᱟᱜ ᱠᱳᱭ ᱫᱚᱦᱚ ᱞᱮᱱᱟ ᱾ ᱑᱙᱖᱒ ᱨᱮᱱᱟᱜ ᱵᱷᱳᱴ ᱨᱮ ᱡᱷᱟᱨᱠᱷᱚᱸᱰ ᱯᱟᱨᱴᱤ ᱫᱚ ᱒᱐ ᱥᱤᱴ ᱨᱮᱜᱮ ᱟᱴᱠᱟᱣ ᱮᱱᱟ ᱾ ᱑᱙᱖᱓ ᱨᱮ ᱵᱤᱦᱟᱨ ᱨᱮᱱ ᱩᱱ ᱡᱚᱠᱷᱚᱡ ᱨᱮᱱ ᱢᱩᱠᱷᱭᱟᱹᱢᱟᱱᱛᱨᱤ ᱵᱤᱱᱳᱫᱟᱱᱟᱱᱫᱽ ᱡᱷᱟ ᱫᱚ ᱢᱤᱫ ᱥᱳᱣᱫᱟ ᱛᱟᱞᱟ ᱛᱮ ᱡᱷᱟᱨᱠᱷᱟᱱᱰ ᱯᱟᱨᱴᱤ ᱨᱮᱱ ᱥᱩᱯᱨᱤᱢᱳ ᱡᱟᱭᱯᱟᱞ ᱥᱤᱝ ᱢᱩᱱᱰᱟ ᱫᱚ ᱟᱡ ᱨᱮᱱ ᱥᱟᱱᱟᱢ ᱮᱢ.ᱮᱞ.ᱮ. ᱥᱟᱶ ᱠᱚᱝᱜᱽᱨᱮᱥ ᱨᱮᱭ ᱢᱮᱥᱟ ᱠᱮᱫ ᱠᱳᱣᱟ ᱾ ᱱᱳᱝᱠᱟ ᱛᱮ ᱡᱷᱟᱨᱠᱷᱟᱱᱰ ᱯᱟᱨᱴᱤ ᱫᱚ ᱠᱚᱝᱜᱽᱨᱮᱥ ᱨᱮ ᱢᱮᱥᱟ ᱮᱱᱟ ᱾ ᱯᱟᱥᱮᱡ ᱯᱩᱭᱞᱩ ᱫᱷᱟᱣ ᱠᱤᱨᱤᱧ-ᱟᱹᱠᱷᱨᱤᱧ ᱨᱮᱱᱟᱜ ᱞᱟᱠᱪᱟᱨ ᱟᱹᱫᱤᱵᱟᱹᱥᱤ ᱟᱹᱭᱩᱨᱤᱭᱟᱹ ᱠᱳ ᱛᱟᱞᱟ ᱨᱮ ᱵᱚᱞᱚ ᱮᱱᱟ ᱾ ᱵᱮᱜᱟᱨ ᱡᱷᱟᱨᱠᱷᱟᱱᱰ ᱨᱮᱱᱟᱜ ᱟᱱᱫᱚᱞᱚᱱ ᱱᱚᱱᱰᱮ ᱜᱮ ᱛᱷᱩᱢ ᱮᱱᱟ ᱾
ᱱᱚᱣᱟ ᱠᱚ ᱥᱟᱱᱟᱢ ᱜᱷᱚᱴᱚᱱ ᱢᱟᱲᱟᱝ ᱑᱙᱔᱘ ᱨᱮ ᱢᱮᱱᱫᱚ ᱯᱷᱩᱨᱜᱟᱹᱞ ᱧᱟᱢ ᱠᱟᱛᱮ ᱠᱷᱟᱹᱞᱤ ᱥᱟᱲᱮ ᱯᱩᱱ ᱪᱟᱸᱫᱚ ᱛᱟᱭᱚᱢ ᱡᱟᱦᱟᱸ ᱜᱷᱚᱴᱚᱱ ᱦᱩᱭ ᱞᱮᱱᱟ, ᱚᱱᱟ ᱫᱚ ᱯᱷᱩᱨᱜᱟᱹᱞ ᱥᱤᱧᱚᱛ ᱨᱮᱱᱟᱜ ᱯᱩᱭᱞᱩ 'ᱡᱟᱹᱱᱥᱟᱹᱝᱦᱟᱨ' (Massacre) ᱛᱟᱦᱮᱸ ᱠᱟᱱᱟ ᱾
ᱵᱟᱰᱟᱭ ᱡᱟᱹᱨᱩᱲᱚᱜ ᱠᱟᱱᱟ ᱡᱮ ᱑᱕ ᱟᱜᱟᱥᱴ ᱑᱙᱔᱗ ᱨᱮ ᱯᱷᱩᱨᱜᱟᱹᱞ ᱧᱟᱢ ᱮᱱ ᱛᱟᱭᱚᱢ ᱥᱤᱝᱵᱷᱩᱢ ᱨᱮᱱ ᱟᱹᱫᱤᱵᱟᱹᱥᱤ ᱜᱟᱛᱟᱠ ᱠᱚ ᱦᱚᱛᱮᱛᱮ ᱒᱕ ᱰᱤᱥᱮᱢᱵᱚᱨ ᱑᱙᱔᱗ ᱨᱮ ᱪᱟᱱᱫᱽᱨᱟᱯᱩᱨ ᱡᱳᱡᱳᱰᱤᱦ ᱨᱮ ᱜᱟᱰᱟ ᱟᱲᱮ ᱨᱮ ᱢᱤᱫ ᱥᱟᱵᱷᱟ ᱦᱩᱭ ᱞᱮᱱᱟ, ᱡᱟᱦᱟᱸ ᱨᱮ ᱴᱷᱟᱹᱣᱠᱟᱹ ᱞᱮᱱᱟ ᱡᱮ ᱥᱤᱝᱵᱷᱩᱢ ᱫᱚ ᱳᱰᱤᱥᱟ ᱨᱟᱡᱽ ᱨᱮ ᱵᱟᱝ ᱫᱚᱦᱚ ᱦᱩᱭᱩᱜᱼᱟ ᱾ ᱵᱚᱨᱚᱝ ᱱᱚᱣᱟ ᱫᱚ ᱵᱮᱜᱟᱨ ᱡᱷᱟᱨᱠᱷᱟᱱᱰ ᱨᱟᱡᱽ ᱞᱮᱠᱟᱛᱮ ᱫᱚᱦᱚ ᱦᱩᱭᱩᱜᱼᱟ ᱾ ᱫᱚᱥᱟᱨ ᱯᱟᱦᱴᱟ ᱥᱟᱹᱨᱟᱹᱭᱠᱮᱞᱟ ᱟᱨ ᱠᱷᱟᱨᱥᱟᱶᱟ ᱨᱮᱱ ᱨᱟᱡᱟ ᱠᱚᱫᱚ ᱱᱚᱣᱟ ᱳᱰᱤᱥᱟ ᱨᱟᱡᱽ ᱨᱮ ᱢᱮᱥᱟ ᱞᱟᱹᱜᱤᱫ ᱥᱟᱹᱜᱩᱱ ᱫᱟᱨᱟᱢ ᱠᱳ ᱮᱢ ᱞᱮᱫᱼᱟ ᱾ ᱟᱹᱫᱤᱵᱟᱹᱥᱤ ᱜᱟᱛᱟᱠ ᱫᱚ ᱟᱠᱳ ᱛᱮ ᱯᱷᱩᱨᱜᱟᱹᱞ ᱨᱟᱡᱽ ᱞᱮᱠᱟᱛᱮ ᱟᱠᱳᱣᱟᱜ ᱩᱨᱩᱢ ᱫᱚᱦᱚ ᱥᱟᱱᱟ ᱮᱫ ᱠᱳ ᱛᱟᱦᱮᱸᱠᱟᱱᱟ, ᱚᱱᱟ ᱞᱟᱹᱜᱤᱫ ᱩᱱᱠᱩ ᱫᱚ ᱡᱟᱣᱨᱟ ᱠᱳ ᱮᱛᱚᱦᱚᱵ ᱠᱮᱫᱼᱟ ᱟᱨ ᱴᱷᱟᱹᱣᱠᱟᱹ ᱮᱱᱟ ᱡᱮ ᱢᱤᱫ ᱡᱟᱱᱩᱣᱟᱨᱤ ᱦᱤᱞᱳᱜ ᱠᱷᱟᱨᱥᱚᱶᱟᱸ ᱨᱮᱱᱟᱜ ᱵᱟᱡᱟᱨᱴᱟᱬ ᱨᱮ ᱥᱟᱵᱷᱟ ᱦᱩᱭᱩᱜᱼᱟ ᱾ ᱡᱟᱦᱟᱸ ᱨᱮ ᱡᱟᱭᱯᱟᱞ ᱥᱤᱝ ᱢᱩᱸᱰᱟ ᱦᱚᱸᱭ ᱥᱮᱞᱮᱫᱚᱜᱼᱟ ᱾
ᱱᱚᱣᱟ ᱥᱟᱵᱷᱟ ᱨᱮ ᱡᱟᱭᱯᱟᱞ ᱥᱤᱝ ᱢᱩᱱᱰᱟ ᱦᱤᱡᱩᱜ ᱨᱮᱱᱟᱜ ᱠᱟᱛᱷᱟᱭ ᱮᱢ ᱞᱮᱫᱼᱟ ᱾ ᱚᱱᱟ ᱛᱮ ᱡᱟᱭᱯᱟᱞ ᱥᱤᱝ ᱟᱜ ᱠᱟᱛᱷᱟ ᱟᱧᱡᱚᱢ ᱞᱟᱹᱜᱤᱫ ᱯᱮ ᱢᱟᱦᱟᱸ ᱢᱟᱲᱟᱝ ᱠᱷᱚᱱ ᱜᱮ ᱪᱟᱠᱨᱟᱫᱷᱟᱨᱯᱩᱨ, ᱪᱟᱭᱵᱟᱥᱟ, ᱡᱟᱢᱥᱮᱫᱽᱯᱩᱨ, ᱠᱷᱟᱨᱥᱟᱶᱟᱸ, ᱥᱟᱹᱨᱟᱹᱭᱠᱮᱞᱟ ᱨᱮᱱᱟᱜ ᱥᱟᱹᱝᱜᱤᱧ-ᱥᱟᱹᱝᱜᱤᱧ ᱟᱹᱛᱩ ᱠᱷᱚᱱ ᱦᱚᱲ ᱥᱟᱵᱷᱟ ᱴᱟᱸᱰᱟ ᱥᱮᱡ ᱠᱳ ᱩᱰᱩᱠ ᱞᱮᱱᱟ ᱾ ᱥᱟᱵᱷᱟ ᱨᱮ ᱥᱮᱞᱮᱫᱚᱜ ᱦᱚᱲ ᱫᱚ ᱟᱠᱳ ᱥᱟᱶ ᱵᱚᱦᱚᱜ ᱨᱮ ᱥᱟᱦᱟᱱ ᱵᱤᱸᱰᱟᱹ, ᱪᱟᱣᱞᱮ, ᱰᱟᱹᱠᱷᱤ-ᱵᱟᱹᱴᱤ ᱦᱚᱸ ᱠᱳ ᱟᱹᱜᱩ ᱞᱮᱫᱼᱟ ᱾ ᱥᱟᱹᱨᱤ ᱛᱮ ᱩᱱ ᱡᱚᱠᱷᱚᱡ ᱟᱹᱫᱤᱵᱟᱹᱥᱤ ᱠᱳᱣᱟᱜ ᱢᱚᱱᱮ ᱨᱮ ᱵᱮᱜᱟᱨ ᱡᱷᱟᱨᱠᱷᱟᱱᱰ ᱨᱟᱡᱽ ᱵᱮᱱᱟᱣ ᱨᱮᱱᱟᱜ ᱟᱹᱰᱤ ᱢᱟᱨᱟᱝ ᱟᱥᱟ ᱛᱟᱦᱮᱸ ᱠᱟᱱᱟ ᱾
ᱥᱟᱶᱛᱟ ᱠᱟᱹᱢᱤᱭᱟᱹ ᱟᱨ ᱯᱟᱛᱨᱟᱹᱠᱟᱨ ᱭᱳᱜᱳ ᱯᱩᱨᱛᱤ ᱭ ᱞᱟᱹᱭᱟ ᱡᱮ ᱟᱡ ᱵᱟᱵᱟ ᱥᱚᱨᱚᱜᱽᱛᱟᱱ ᱵᱳᱸᱡᱽ ᱦᱳ (ᱵᱳᱸᱡᱽ ᱯᱩᱨᱛᱤ) ᱫᱚ ᱠᱷᱟᱨᱥᱟᱶᱟᱸ ᱜᱷᱚᱴᱚᱱ ᱵᱟᱵᱚᱛ ᱟᱞᱮ ᱜᱤᱫᱽᱨᱟᱹ ᱠᱳ ᱡᱟᱣ ᱜᱮᱭ ᱞᱟᱹᱭ ᱟᱞᱮ ᱛᱟᱦᱮᱸᱠᱟᱱᱟ ᱾
ᱩᱱ ᱡᱚᱠᱷᱮᱡ ᱩᱱᱤ ᱫᱚ ᱟᱱᱫᱟᱡᱽ ᱑᱔-᱑᱕ ᱥᱮᱨᱢᱟ ᱨᱮᱱ ᱮ ᱛᱟᱦᱮᱸ ᱠᱟᱱᱟ ᱾ ᱩᱱᱤᱭ ᱞᱟᱹᱭ ᱮᱫ ᱛᱟᱦᱮᱸᱠᱟᱱᱟ ᱡᱮ ᱡᱟᱭᱯᱟᱞ ᱥᱤᱝ ᱢᱩᱱᱰᱟ ᱣᱟᱜ ᱦᱳᱦᱚ ᱛᱮ ᱢᱟᱨᱟᱝ, ᱦᱟᱲᱟᱢ, ᱜᱤᱫᱽᱨᱟᱹ, ᱢᱟᱹᱭ ᱛᱟᱠᱳ ᱥᱟᱱᱟᱢ ᱠᱳ ᱑ ᱡᱟᱱᱩᱣᱟᱨᱤ ᱑᱙᱔᱘ ᱨᱮ ᱠᱷᱟᱨᱥᱟᱶᱟᱸ ᱦᱟᱴ ᱨᱮ ᱠᱳ ᱡᱟᱣᱨᱟ ᱞᱮᱱᱟ ᱾ ᱡᱟᱭᱯᱟᱞ ᱥᱤᱝ ᱢᱩᱱᱰᱟ ᱫᱚ ᱵᱟᱭ ᱦᱮᱡ ᱞᱮᱱᱟ ᱾ ᱟᱱᱫᱟᱡᱽ ᱕᱐ ᱦᱟᱡᱟᱨ ᱦᱚᱲ ᱠᱳ ᱛᱟᱦᱮᱸ ᱠᱟᱱᱟ, ᱦᱚᱲ ᱫᱚ ᱡᱟᱭᱯᱟᱞ ᱥᱤᱝ ᱠᱳ ᱛᱟᱹᱝᱜᱤ ᱞᱮᱫᱮᱭᱟ ᱡᱮ ᱟᱪᱠᱟ ᱜᱮ ᱯᱷᱟᱭᱨᱤᱝ (firing) ᱮᱛᱚᱦᱚᱵ ᱮᱱᱟ ᱾ ᱚᱱᱟ ᱛᱟᱭᱚᱢ ᱦᱚᱲ ᱠᱳ ᱫᱟᱹᱲ ᱠᱳ ᱮᱛᱚᱦᱚᱵ ᱠᱮᱫᱼᱟ ᱾ ᱟᱞᱮ ᱫᱚ ᱵᱟᱹᱫᱽ ᱠᱷᱮᱛ ᱛᱮ ᱡᱟᱦᱟᱸ ᱞᱮᱠᱟ ᱛᱮ ᱡᱤᱣᱤ ᱵᱟᱧᱪᱟᱣ ᱠᱟᱛᱮ ᱞᱮ ᱫᱟᱹᱲ ᱞᱮᱫᱼᱟ ᱾
ᱢᱟᱨᱮ ᱮᱢ.ᱮᱞ.ᱮ. ᱵᱟᱦᱟᱫᱩᱨ ᱩᱨᱟᱶ ᱟᱜ ᱢᱮᱱ ᱞᱮᱠᱟᱛᱮ ᱢᱤᱫ ᱡᱟᱱᱩᱣᱟᱨᱤ ᱑᱙᱔᱘ ᱦᱤᱞᱳᱜ ᱥᱟᱹᱨᱫᱤ ᱢᱟᱦᱟᱸ (Thursday) ᱛᱟᱦᱮᱸ ᱠᱟᱱᱟ ᱟᱨ ᱦᱟᱴ-ᱵᱟᱡᱟᱨ ᱛᱟᱦᱮᱸ ᱠᱟᱱᱟ ᱾ ᱥᱩᱨ ᱥᱩᱯᱩᱨ ᱨᱮᱱ ᱠᱩᱲᱤ ᱦᱚᱯᱚᱱ ᱠᱳ ᱦᱚᱸ ᱵᱟᱡᱟᱨ ᱞᱟᱹᱜᱤᱫ ᱠᱳ ᱦᱮᱡ ᱞᱮᱱᱟ ᱾ ᱚᱱᱰᱮ ᱜᱮ ᱥᱟᱹᱝᱜᱤᱧ-ᱥᱟᱹᱝᱤᱧ ᱠᱷᱚᱱ ᱦᱮᱡ ᱞᱮᱱ ᱜᱤᱫᱽᱨᱟᱹ ᱟᱨ ᱠᱳᱲᱟ ᱠᱳᱣᱟᱜ ᱛᱤ ᱨᱮ ᱟᱹᱨᱤᱪᱟᱹᱞᱤ ᱦᱟᱹᱛᱤᱭᱟᱹᱨ ᱟᱨ ᱟᱜ-ᱥᱟᱨ ᱛᱟᱦᱮᱸ ᱠᱟᱱᱟ ᱾ ᱦᱚᱨ ᱨᱮ ᱥᱟᱱᱟᱢ ᱦᱚᱲ ᱱᱟᱨᱟ ᱠᱳ ᱞᱟᱹᱭ ᱤᱫᱤ ᱮᱫ ᱛᱟᱦᱮᱸᱠᱟᱱᱟ ᱟᱨ ᱯᱷᱩᱨᱜᱟᱹᱞ ᱨᱮᱱᱟᱜ ᱥᱮᱨᱮᱧ ᱦᱚᱸ ᱠᱳ ᱥᱮᱨᱮᱧ ᱮᱫ ᱛᱟᱦᱮᱸᱠᱟᱱᱟ ᱾ ᱢᱤᱫ ᱯᱟᱦᱴᱟ ᱨᱟᱡᱟ ᱣᱟᱜ ᱱᱤᱨᱱᱟᱹᱭ ᱵᱤᱨᱩᱫᱷ ᱨᱮ ᱯᱩᱨᱟᱹ ᱠᱚᱞᱦᱟᱱ ᱞᱚ ᱠᱟᱱ ᱛᱟᱦᱮᱸᱠᱟᱱᱟ, ᱫᱚᱥᱟᱨ ᱯᱟᱦᱴᱟ ᱥᱤᱝᱵᱷᱩᱢ ᱫᱚ ᱳᱰᱤᱥᱟ ᱨᱟᱡᱽ ᱨᱮ ᱢᱮᱥᱟ ᱞᱟᱹᱜᱤᱫ ᱳᱰᱤᱥᱟ ᱨᱮᱱ ᱢᱩᱠᱷᱭᱟᱹᱢᱟᱱᱛᱨᱤ ᱵᱤᱡᱟᱹᱭ ᱯᱟᱱᱤ ᱦᱚᱸ ᱟᱡᱟᱜ ᱪᱟᱠᱨᱟᱵᱷᱭᱩᱼᱭ ᱵᱮᱱᱟᱣ ᱞᱮᱫᱼᱟ ᱾ ᱪᱮᱫᱟᱜ ᱥᱮ ᱥᱤᱝᱵᱷᱩᱢ ᱴᱚᱴᱷᱟ ᱫᱚ ᱵᱩᱨᱩ ᱟᱨ ᱵᱤᱨ ᱛᱮ ᱮᱥᱮᱫ ᱛᱟᱦᱮᱸ ᱠᱟᱱᱟ, ᱡᱟᱦᱟᱸ ᱫᱚ ᱠᱷᱟᱫᱟᱱ ᱥᱟᱹᱢᱯᱟᱹᱛᱛᱤ ᱛᱮ ᱯᱮᱨᱮᱡ ᱛᱟᱦᱮᱸ ᱠᱟᱱᱟ, ᱡᱟᱦᱟᱸ ᱨᱮᱱᱟᱜ ᱵᱟᱰᱟᱭ ᱳᱰᱤᱥᱟ ᱨᱮᱱ ᱢᱩᱠᱷᱭᱟᱹᱢᱟᱱᱛᱨᱤ ᱵᱤᱡᱟᱭ ᱯᱟᱱᱤ ᱴᱷᱮᱱ ᱛᱟᱦᱮᱸ ᱠᱟᱱᱟ ᱾ ᱱᱚᱣᱟ ᱞᱳᱵᱷ ᱠᱷᱟᱹᱛᱤᱨ ᱜᱮ ᱩᱰᱤᱥᱟ ᱨᱮᱱ ᱢᱩᱠᱷᱭᱟᱹᱢᱟᱱᱛᱨᱤ ᱫᱚ ᱱᱟᱦᱟᱪᱟᱨ ᱨᱮᱱᱟᱜ ᱥᱤᱢᱟᱹᱭ ᱯᱟᱨᱚᱢ ᱞᱮᱫᱼᱟ ᱾
ᱩᱲᱤᱥᱟ ᱨᱟᱡᱽ ᱯᱨᱟᱥᱟᱥᱟᱱ ᱫᱚ ᱯᱩᱞᱤᱥ ᱠᱷᱟᱨᱥᱟᱶᱟᱸ ᱛᱮᱭ ᱵᱷᱮᱡᱟᱣ ᱠᱮᱫ ᱠᱳᱣᱟ, ᱡᱟᱦᱟᱸᱭ ᱫᱚ ᱛᱷᱤᱨ ᱛᱷᱤᱨ ᱛᱮ ᱢᱩᱬᱩᱛ ᱦᱚᱨ ᱵᱟᱹᱜᱤ ᱠᱟᱛᱮ ᱮᱴᱟᱜ ᱦᱚᱨ ᱛᱮ ᱧᱩᱛ ᱨᱮ ᱑᱘ ᱰᱤᱥᱮᱢᱵᱟᱹᱨ ᱑᱙᱔᱗ ᱨᱮᱜᱮ ᱦᱟᱹᱛᱤᱭᱟᱹᱨ ᱥᱟᱶ ᱯᱮᱭᱟ ᱠᱚᱢᱯᱟᱹᱱᱤ ᱯᱷᱳᱨᱥ (Police) ᱠᱷᱟᱨᱥᱟᱶᱟᱸ ᱢᱤᱰᱤᱞ ᱥᱠᱩᱞ ᱠᱚ ᱥᱮᱴᱮᱨ ᱞᱮᱱᱟ ᱾ ᱥᱳᱡᱷᱮ ᱥᱟᱹᱯᱩᱣᱟᱹ ᱟᱹᱫᱤᱵᱟᱹᱥᱤ ᱫᱚ ᱱᱚᱣᱟ ᱪᱟᱠᱨᱟᱵᱷᱭᱩ ᱵᱟᱠᱳ ᱵᱩᱡᱷᱟᱹᱣ ᱫᱟᱲᱮᱭᱟᱫᱼᱟ ᱟᱨ ᱵᱮᱜᱟᱨ ᱨᱟᱡᱽ ᱨᱮᱱᱟᱜ ᱟᱥᱟ ᱫᱚᱦᱚ ᱠᱟᱛᱮ ᱱᱚᱣᱟ ᱠᱷᱚᱱ ᱵᱮ-ᱵᱟᱰᱟᱭ ᱟᱠᱳᱣᱟᱜ ᱥᱟᱯᱲᱟᱣ ᱨᱮ ᱠᱳ ᱛᱟᱦᱮᱸ ᱠᱟᱱᱟ ᱾ ᱟᱹᱫᱤᱵᱟᱹᱥᱤ ᱦᱚᱲ ᱫᱚ 'ᱡᱟᱹᱭ ᱡᱷᱟᱨᱠᱷᱷᱟᱱᱰ' ᱱᱟᱨᱟ ᱥᱟᱶ-ᱥᱟᱶ ᱛᱮ ᱩᱲᱤᱥᱟ ᱨᱮᱱ ᱢᱩᱠᱷᱭᱟᱹᱢᱟᱱᱛᱨᱤ ᱵᱤᱨᱩᱫᱷ ᱨᱮ ᱦᱚᱸ ᱱᱟᱨᱟ ᱠᱳ ᱞᱟᱹᱭ ᱮᱫ ᱛᱟᱦᱮᱸᱠᱟᱱᱟ ᱾
ᱞᱟᱹᱭ ᱟᱠᱳ ᱡᱮ ᱑ ᱡᱟᱱᱩᱣᱟᱨᱤ ᱑᱙᱔᱘ ᱥᱮᱛᱟᱜ, ᱨᱟᱡᱽ ᱨᱮᱱᱟᱜ ᱢᱩᱬᱩᱛ ᱦᱚᱨ ᱠᱚᱛᱮ ᱡᱩᱞᱩᱥ ᱩᱰᱩᱠ ᱞᱮᱱᱟ ᱾ ᱚᱱᱟ ᱛᱟᱭᱚᱢ ᱟᱹᱫᱤᱵᱟᱹᱥᱤ ᱢᱚᱦᱟᱥᱚᱵᱷᱟ ᱨᱮᱱ ᱠᱤᱪᱷᱤ ᱟᱹᱭᱩᱨᱤᱭᱟᱹ ᱫᱚ ᱠᱷᱚᱨᱥᱚᱶᱟ ᱨᱟᱡᱟ ᱣᱟᱜ ᱢᱚᱦᱚᱞ ᱛᱮ ᱥᱮᱱ ᱠᱟᱛᱮ ᱩᱱᱤ ᱠᱚ ᱧᱟᱯᱟᱢ ᱠᱮᱫᱮᱭᱟ ᱟᱨ ᱥᱤᱝᱵᱷᱩᱢ ᱨᱮᱱ ᱦᱚᱲ ᱠᱳᱣᱟᱜ ᱢᱚᱱᱮ ᱠᱟᱛᱷᱟ ᱠᱳ ᱞᱟᱹᱭ ᱟᱫᱮᱭᱟ ᱾ ᱱᱚᱣᱟ ᱨᱮ ᱨᱟᱡᱟ ᱫᱚ ᱵᱷᱟᱨᱥᱟᱭ ᱮᱢ ᱠᱮᱫᱼᱟ ᱡᱮ ᱱᱚᱣᱟ ᱵᱟᱵᱚᱛ ᱵᱷᱟᱨᱚᱛ ᱥᱟᱨᱠᱟᱨ ᱥᱟᱶ ᱮ ᱜᱟᱞᱢᱟᱨᱟᱣᱟ ᱾ ᱥᱟᱵᱷᱟ ᱫᱚ ᱛᱤᱠᱤᱱ ᱵᱟᱨ ᱴᱟᱲᱟᱝ ᱠᱷᱚᱱ ᱯᱩᱱ ᱴᱟᱲᱟᱝ ᱦᱟᱹᱵᱤᱡ ᱦᱩᱭ ᱞᱮᱱᱟ ᱾ ᱥᱟᱵᱷᱟ ᱛᱟᱭᱚᱢ ᱟᱹᱫᱤᱵᱟᱹᱥᱤ ᱢᱟᱦᱟᱥᱟᱵᱷᱟ ᱨᱮᱱ ᱟᱹᱭᱩᱨᱤᱭᱟᱹ ᱠᱳ ᱥᱟᱱᱟᱢ ᱦᱚᱲ ᱟᱯᱟᱱ-ᱟᱹᱯᱤᱱ ᱚᱲᱟᱜ ᱥᱮᱱᱚᱜ ᱠᱳ ᱢᱮᱛᱟᱫ ᱠᱳᱣᱟ ᱾ ᱥᱟᱱᱟᱢ ᱦᱚᱲ ᱚᱲᱟᱜ ᱥᱮᱫ ᱠᱳ ᱩᱰᱩᱠ ᱮᱱᱟ ᱾ ᱚᱱᱟ ᱟᱫᱷᱟ ᱜᱷᱚᱱᱴᱟ ᱛᱟᱭᱚᱢ ᱵᱮᱜᱚᱨ ᱡᱟᱦᱟᱸᱱᱟᱜ ᱥᱟᱣᱫᱷᱟᱱ ᱛᱮᱜᱮ ᱯᱷᱟᱭᱨᱤᱝ ᱮᱛᱚᱦᱚᱵ ᱮᱱᱟ ᱾
᱑ ᱡᱟᱱᱩᱣᱟᱨᱤ ᱑᱙᱔᱘ ᱠᱷᱟᱨᱥᱟᱶᱟᱸ ᱠᱟᱸᱰ ᱨᱮ ᱥᱟᱦᱤᱫᱽ ᱟᱠᱟᱱ ᱦᱚᱲ ᱠᱳᱣᱟᱜ ᱭᱟᱫᱽ ᱛᱷᱟᱢᱵᱤ (Memorial Pillar)
ᱜᱷᱚᱱᱴᱟ ᱜᱷᱚᱱᱴᱟ ᱵᱷᱩᱨ ᱜᱳᱞᱤ ᱪᱟᱞᱟᱣ ᱮᱱᱟ ᱟᱨ ᱜᱳᱞᱤ ᱪᱟᱞᱟᱣ ᱞᱟᱹᱜᱤᱫ ᱩᱱ ᱡᱚᱠᱷᱮᱡ ᱨᱮᱱᱟᱜ ᱱᱟᱶᱟ ᱦᱟᱹᱛᱤᱭᱟᱹᱨ ᱠᱳ ᱵᱮᱣᱦᱟᱨ ᱞᱮᱫᱼᱟ ᱾ ᱱᱚᱣᱟ ᱯᱷᱟᱭᱨᱤᱝ ᱨᱮ ᱦᱚᱲ ᱫᱚ ᱜᱮᱫ ᱟᱠᱟᱱ ᱫᱟᱨᱮ ᱞᱮᱠᱟ ᱠᱳ ᱧᱩᱨ ᱮᱱᱟ ᱾ ᱥᱟᱶᱛᱮ ᱚᱲᱟᱜ ᱨᱩᱣᱟᱹᱲᱚᱜ ᱠᱟᱱ ᱦᱚᱲ ᱠᱳ ᱪᱮᱛᱟᱱ ᱨᱮᱦᱚᱸ ᱩᱰᱤᱥᱟ ᱥᱟᱨᱠᱟᱨ ᱨᱮᱱ ᱥᱤᱯᱟᱹᱦᱤ ᱠᱳ ᱜᱳᱞᱤ ᱠᱳ ᱪᱟᱞᱟᱣ ᱠᱮᱫᱼᱟ ᱾ ᱱᱚᱣᱟ ᱜᱳᱞᱤᱠᱟᱸᱰ ᱠᱷᱚᱱ ᱵᱟᱧᱪᱟᱣ ᱞᱟᱹᱜᱤᱫ ᱛᱤᱱᱟᱹᱜ ᱜᱟᱱ ᱦᱚᱲ ᱫᱚ ᱦᱟᱥᱟ ᱨᱮ ᱠᱳ ᱜᱤᱛᱤᱡ ᱮᱱᱟ, ᱛᱤᱱᱟᱹᱜ ᱜᱟᱱ ᱦᱚᱲ ᱫᱚ ᱠᱳ ᱫᱟᱹᱲ ᱠᱮᱫᱼᱟ, ᱟᱭᱢᱟ ᱦᱚᱲ ᱡᱤᱣᱤ ᱵᱟᱧᱪᱟᱣ ᱞᱟᱹᱜᱤᱫ ᱥᱩᱨ ᱨᱮᱱᱟᱜ ᱠᱩᱸᱭ ᱨᱮᱦᱚᱸ ᱠᱳ ᱫᱚᱱ ᱠᱮᱫᱼᱟ, ᱡᱟᱦᱟᱸ ᱨᱮ ᱥᱟᱭ ᱥᱟᱭ ᱦᱚᱲ ᱠᱳᱣᱟᱜ ᱡᱤᱣᱤ ᱥᱮᱱ ᱮᱱᱟ ᱾ ᱢᱮᱱᱠᱷᱟᱱ ᱥᱤᱯᱟᱹᱦᱤ ᱠᱳᱣᱟᱜ ᱜᱳᱞᱤ ᱪᱟᱞᱟᱣ ᱫᱚ ᱵᱟᱝ ᱛᱷᱩᱢ ᱞᱮᱱᱟ ᱾
ᱫᱟᱹᱲ ᱮᱫ ᱠᱟᱱ ᱠᱩᱲᱤ, ᱠᱳᱲᱟ ᱵᱮᱜᱚᱨ ᱜᱤᱫᱽᱨᱟᱹ ᱠᱳᱣᱟᱜ ᱫᱮᱭᱟ ᱨᱮᱦᱚᱸ ᱜᱳᱞᱤ ᱠᱳ ᱪᱟᱞᱟᱣ ᱠᱮᱫᱼᱟ ᱾ ᱱᱚᱱᱰᱮ ᱦᱟᱹᱵᱤᱡ ᱡᱮ ᱥᱟᱫᱚᱢ, ᱢᱮᱨᱚᱢ ᱟᱨ ᱜᱟᱹᱭ ᱦᱚᱸ ᱱᱚᱣᱟ ᱢᱟᱭᱟᱢ ᱜᱷᱚᱴᱚᱱ ᱨᱮ ᱠᱳ ᱜᱚᱡ ᱞᱮᱱᱟ ᱾ ᱜᱳᱞᱤ ᱪᱟᱞᱟᱣ ᱮᱱ ᱛᱟᱭᱚᱢ ᱯᱩᱨᱟᱹ ᱵᱟᱡᱟᱨ ᱴᱟᱹᱱᱰᱤ ᱨᱮ ᱦᱚᱲ ᱠᱳᱣᱟᱜ ᱜᱚᱡ ᱦᱚᱲᱢᱳ (Dead bodies) ᱯᱟᱛᱷᱨᱟᱣ ᱞᱮᱱᱟ ᱟᱨ ᱥᱟᱶᱛᱮ ᱟᱭᱢᱟ ᱜᱷᱟᱹᱞ ᱟᱠᱟᱱ ᱦᱚᱲ ᱦᱚᱸ ᱠᱳ ᱧᱩᱨ ᱞᱮᱱᱟ ᱾ ᱜᱷᱟᱹᱞ ᱟᱠᱟᱱ ᱦᱚᱲ ᱫᱚ ᱩᱰᱤᱥᱟ ᱥᱚᱨᱠᱟᱨ ᱨᱮᱱ ᱥᱤᱯᱟᱹᱦᱤ ᱠᱳ ᱜᱚᱴᱟ ᱯᱟᱲᱟ ᱛᱮ ᱠᱚ ᱮᱥᱮᱫ ᱞᱮᱫ ᱠᱳᱣᱟ ᱾ ᱥᱤᱯᱟᱹᱦᱤ ᱠᱳ ᱡᱟᱦᱟᱸᱭ ᱜᱮ ᱜᱷᱟᱹᱞ ᱦᱚᱲ ᱵᱟᱦᱨᱮ ᱵᱟᱠᱳ ᱥᱮᱱ ᱳᱪᱳᱼᱟᱫ ᱠᱳᱣᱟ ᱟᱨ ᱵᱟᱝ ᱜᱮ ᱜᱚᱲᱚ ᱮᱢᱚᱜ ᱞᱟᱹᱜᱤᱫ ᱡᱟᱦᱟᱸᱭ ᱵᱷᱤᱛᱨᱤ ᱛᱮ ᱵᱚᱞᱚ ᱨᱮᱱᱟᱜ ᱪᱷᱩᱴ ᱠᱳ ᱮᱢᱟᱫ ᱠᱳᱣᱟ ᱾
ᱜᱷᱚᱴᱚᱱ ᱛᱟᱭᱚᱢ ᱟᱹᱭᱩᱵ ᱮᱱ ᱠᱷᱟᱱ ᱜᱮ ᱩᱰᱤᱥᱟ ᱥᱟᱨᱠᱟᱨ ᱨᱮᱱ ᱥᱤᱯᱟᱹᱦᱤ ᱠᱳ ᱦᱚᱛᱮᱛᱮ ᱟᱹᱰᱤ ᱱᱟᱦᱟᱪᱟᱨ ᱛᱮ ᱱᱚᱣᱟ ᱡᱟᱱᱥᱟᱝᱦᱟᱨ ᱨᱮᱱᱟᱜ ᱯᱨᱟᱢᱟᱱ (evidence) ᱢᱮᱴᱟᱣ ᱠᱳ ᱮᱛᱚᱦᱚᱵ ᱠᱮᱫᱼᱟ ᱾ ᱥᱤᱯᱟᱹᱦᱤ ᱠᱳ ᱜᱚᱡ ᱦᱚᱲᱢᱚ ᱠᱚ ᱡᱟᱣᱨᱟ ᱠᱮᱫᱼᱟ ᱟᱨ ᱚᱱᱟ ᱟᱱᱫᱟᱡᱽ ᱑᱐ ᱴᱟᱝ ᱴᱨᱟᱠ ᱨᱮ ᱞᱟᱫᱮ ᱠᱟᱛᱮ ᱠᱳ ᱤᱫᱤ ᱠᱮᱫᱼᱟ ᱟᱨ ᱥᱟᱨᱟᱱᱰᱟ ᱨᱮᱱᱟᱜ ᱵᱤᱨ ᱜᱟᱡᱟᱲ ᱨᱮ ᱠᱳ ᱜᱤᱰᱤ ᱠᱮᱫ ᱠᱳᱣᱟ ᱾ ᱡᱚᱛᱚ ᱠᱷᱚᱱ ᱫᱩᱠᱷ ᱨᱮᱱᱟᱜ ᱠᱟᱛᱷᱟ ᱫᱚ ᱱᱚᱣᱟ ᱛᱟᱦᱮᱸ ᱠᱟᱱᱟ ᱡᱮ ᱜᱷᱟᱹᱞ ᱟᱠᱟᱱ ᱦᱚᱲ ᱫᱚ ᱨᱟᱵᱟᱝ ᱧᱤᱫᱟᱹ ᱨᱮ ᱯᱩᱨᱟᱹ ᱧᱤᱫᱟᱹ ᱵᱟᱦᱨᱮ ᱨᱮ ᱠᱳ ᱵᱟᱹᱜᱤ ᱟᱫ ᱠᱳᱣᱟ ᱟᱨ ᱩᱱᱠᱩ ᱫᱚ ᱫᱟᱜ ᱦᱚᱸ ᱵᱟᱠᱳ ᱮᱢᱟᱫ ᱠᱳᱣᱟ ᱾ ᱚᱱᱟ ᱛᱟᱭᱚᱢ ᱩᱰᱤᱥᱟ ᱥᱚᱨᱠᱟᱨ ᱫᱚ ᱵᱟᱦᱨᱮ ᱫᱷᱟᱹᱨᱛᱤ ᱠᱷᱚᱱ ᱱᱚᱣᱟ ᱜᱷᱚᱴᱚᱱ ᱩᱠᱩ ᱫᱚᱦᱚ ᱞᱟᱹᱜᱤᱫ ᱟᱹᱰᱤ ᱠᱩᱨᱩᱢᱩᱴᱩ ᱞᱮᱫᱼᱟ ᱾
ᱵᱟᱦᱟᱫᱩᱨ ᱩᱨᱟᱶᱼᱟᱜ ᱢᱮᱱ ᱞᱮᱠᱟᱛᱮ ᱩᱰᱤᱥᱟ ᱥᱟᱨᱠᱟᱨ ᱵᱟᱝ ᱥᱟᱱᱟᱼᱮ ᱠᱟᱱ ᱛᱟᱦᱮᱸᱠᱟᱱᱟ ᱡᱮ ᱱᱚᱣᱟ ᱜᱷᱚᱴᱚᱱ ᱨᱮᱱᱟᱜ ᱠᱷᱚᱵᱚᱨ ᱵᱟᱦᱨᱮ ᱥᱮᱱᱚᱜ ᱢᱟ ᱟᱨ ᱱᱚᱣᱟ ᱟᱴᱠᱟᱣ ᱞᱟᱹᱜᱤᱫ ᱯᱩᱨᱟᱹ ᱠᱩᱨᱩᱢᱩᱴᱩ ᱦᱩᱭ ᱞᱮᱱᱟ ᱾ ᱱᱚᱱᱰᱮ ᱦᱟᱹᱵᱤᱡ ᱡᱮ ᱵᱤᱦᱟᱨ ᱥᱚᱨᱠᱟᱨ ᱫᱚ ᱜᱷᱟᱹᱞ ᱦᱚᱲ ᱠᱳᱣᱟᱜ ᱨᱟᱱ ᱢᱩᱨᱜᱟᱹᱱ ᱞᱟᱹᱜᱤᱫ ᱰᱟᱠᱴᱚᱨ ᱫᱚᱞ ᱟᱨ ᱥᱮᱣᱟ ᱫᱚᱞᱼᱮ ᱵᱷᱮᱡᱟᱣ ᱞᱮᱫ ᱠᱳᱣᱟ, ᱡᱟᱦᱟᱸᱭ ᱫᱚ ᱨᱩᱣᱟᱹᱲ ᱳᱪᱳ ᱠᱟᱫ ᱠᱳᱣᱟ ᱠᱳ ᱾ ᱥᱟᱶᱛᱮ ᱯᱟᱛᱨᱟᱹᱠᱟᱨ (Journalists) ᱠᱳ ᱦᱚᱸ ᱱᱚᱣᱟ ᱡᱟᱭᱜᱟ ᱛᱮ ᱥᱮᱱᱚᱜ ᱨᱮᱱᱟᱜ ᱪᱷᱩᱴ ᱵᱟᱠᱳ ᱮᱢᱟᱫ ᱠᱳᱣᱟ ᱾
ᱠᱷᱟᱨᱥᱟᱶᱟ ᱨᱮᱱᱟᱜ ᱱᱚᱣᱟ ᱱᱟᱜᱟᱢᱤᱭᱟᱹ ᱴᱟᱹᱱᱰᱤ ᱨᱮ ᱢᱤᱫᱴᱟᱹᱝ ᱠᱩᱸᱭ ᱛᱟᱦᱮᱸ ᱠᱟᱱᱟ, ᱫᱟᱹᱲ ᱨᱮᱱᱟᱜ ᱡᱟᱦᱟᱸᱱᱟᱜ ᱦᱚᱨ ᱵᱟᱝ ᱛᱟᱦᱮᱸ ᱠᱟᱱᱟ ᱾ ᱛᱤᱱᱟᱹᱜ ᱜᱟᱱ ᱦᱚᱲ ᱡᱤᱣᱤ ᱵᱟᱧᱪᱟᱣ ᱞᱟᱹᱜᱤᱫ ᱴᱟᱹᱱᱰᱤ ᱨᱮ ᱢᱮᱱᱟᱜ ᱮᱥᱠᱟᱨ ᱠᱩᱸᱭ ᱨᱮ ᱠᱳ ᱫᱚᱱ ᱠᱮᱫᱼᱟ, ᱢᱮᱱᱠᱷᱟᱱ ᱧᱮᱞ-ᱧᱮᱞ ᱛᱮᱜᱮ ᱚᱱᱟ ᱠᱩᱸᱭ ᱦᱚᱸ ᱜᱚᱡ ᱦᱚᱲᱢᱚ ᱛᱮ ᱯᱮᱨᱮᱡ ᱮᱱᱟ ᱾
ᱜᱳᱞᱤᱠᱟᱸᱰ ᱛᱟᱭᱚᱢ ᱡᱟᱦᱟᱸ ᱜᱚᱡ ᱦᱚᱲᱢᱳ ᱠᱳ ᱩᱱᱠᱩ ᱨᱮᱱ ᱯᱮᱲᱟ ᱠᱳ ᱵᱟᱠᱳ ᱤᱫᱤ ᱞᱮᱫᱼᱟ, ᱚᱱᱟ ᱠᱳ ᱦᱚᱸ ᱚᱱᱟ ᱠᱩᱸᱭ ᱨᱮᱜᱮ ᱠᱳ ᱜᱤᱰᱤ ᱠᱟᱫᱼᱟ ᱠᱳᱣᱟ ᱟᱨ ᱠᱩᱸᱭ ᱨᱮᱱᱟᱜ ᱢᱚᱪᱟ ᱠᱚ ᱵᱚᱱᱫᱚ ᱠᱮᱫᱟ ᱾ ᱡᱟᱦᱟᱸ ᱨᱮ ᱱᱤᱛᱚᱜ 'ᱥᱟᱦᱤᱫᱽ ᱥᱢᱟᱨᱟᱠ' (Martyr's Memorial) ᱵᱮᱱᱟᱣ ᱟᱠᱟᱱᱟ ᱾ ᱱᱚᱣᱟ ᱥᱢᱟᱨᱟᱠ ᱨᱮᱜᱮ ᱑ ᱡᱟᱱᱩᱣᱟᱨᱤ ᱦᱤᱞᱳᱜ ᱵᱟᱦᱟ ᱟᱨ ᱥᱩᱱᱩᱢ ᱫᱩᱞ ᱠᱟᱛᱮ ᱥᱟᱦᱤᱫᱽ ᱠᱳ ᱥᱨᱟᱫᱷᱟᱧᱡᱟᱹᱞᱤ ᱮᱢ ᱦᱩᱭᱩᱜᱼᱟ ᱾
᱑ ᱡᱟᱱᱩᱣᱟᱨᱤ ᱑᱙᱔᱘ ᱱᱚᱣᱟ ᱡᱟᱭᱜᱟ ᱨᱮᱜᱮ ᱜᱳᱞᱤᱠᱟᱸᱰ ᱦᱩᱭ ᱞᱮᱱᱟ, ᱡᱟᱦᱟᱸ ᱫᱚ ᱱᱤᱛᱚᱜ ᱯᱟᱨᱠ ᱞᱮᱠᱟᱛᱮ ᱵᱮᱱᱟᱣ ᱟᱠᱟᱱᱟ᱾
