ᱡᱟᱱᱟᱢ ᱟᱹᱨᱤᱪᱟᱹᱞᱤ/Janam Arichali/जानाम आ़रिचा़ली

            ᱡᱟᱱᱟᱢ ᱟᱹᱨᱤᱪᱟᱹᱞᱤ

ᱡᱟᱱᱟᱢ ᱟᱹᱨᱤᱪᱟᱹᱞᱤ

ᱡᱟᱱᱟᱢ ᱪᱷᱟᱹᱴᱭᱟᱹᱨ ᱨᱮᱱᱟᱜ ᱛᱮᱛᱮᱫ ᱠᱟᱛᱷᱟ

ᱠᱷᱮᱨᱣᱟᱞ ᱵᱚᱝᱥᱚ ᱥᱟᱱᱛᱟᱲ ᱥᱟᱶᱛᱟ ᱨᱮ ᱫᱚ ᱟᱹᱰᱤᱜᱟᱱ ᱟᱹᱨᱤᱪᱟᱹᱞᱤ ᱢᱮᱱᱟᱜ-ᱟ᱾ ᱚᱱᱟ ᱠᱚ ᱢᱩᱫᱨᱮ ᱡᱮᱛᱮ ᱠᱷᱚᱱ ᱢᱟᱲᱟᱝ ᱟᱨ ᱢᱟᱨᱟᱝ ᱟᱹᱨᱤᱪᱟᱹᱞᱤ ᱫᱚ ᱠᱟᱱᱟ •ᱡᱟᱱᱟᱢ ᱟᱹᱨᱤᱪᱟᱹᱞᱤ•᱾
•ᱪᱷᱩᱛ ᱪᱷᱟᱲᱟᱣ
•ᱪᱷᱟᱹᱴᱭᱟᱹᱨ
•ᱧᱩᱛᱩᱢ

         ᱪᱷᱩᱛ ᱪᱷᱟᱲᱟᱣᱺ-ᱮᱸᱜᱟᱛ ᱠᱩᱠᱷᱤ ᱠᱷᱚᱱ ᱟᱨᱮ ᱪᱟᱸᱫᱚ ᱛᱟᱭᱚᱢ ᱜᱤᱫᱽᱨᱟᱹ ᱟᱬᱜᱚ ᱞᱮᱱᱠᱷᱟᱱ ᱜᱮ ᱚᱲᱟᱜ ᱨᱮᱱ ᱦᱚᱲ ᱠᱚ ᱫᱚ ᱥᱟᱲᱤᱢ ᱥᱟᱛᱮ ᱠᱚ ᱫᱟᱞᱟ, ᱯᱤᱛᱚᱞ ᱵᱟᱹᱴᱤ ᱠᱚ ᱨᱩᱭᱟ, ᱦᱩᱲᱩ ᱟᱨ ᱜᱩᱨᱤᱡ ᱫᱩᱣᱟᱹᱨ ᱨᱮᱠᱚ ᱫᱚᱦᱚᱭᱟ᱾ ᱜᱤᱫᱽᱨᱟᱹ ᱟᱬᱜᱚ ᱞᱮᱱᱠᱷᱟᱱ ᱜᱮ ᱫᱷᱟᱹᱭ ᱵᱩᱲᱦᱤ ᱵᱟᱝᱠᱷᱟᱱ ᱚᱲᱟᱜ ᱦᱚᱲ ᱫᱚ ᱜᱤᱫᱽᱨᱟᱹ ᱣᱟᱜ ᱱᱟᱲ ᱠᱚ ᱜᱮᱫᱟ᱾ ᱜᱤᱫᱽᱨᱟᱹ ᱣᱟᱜ ᱵᱩᱠᱟ ᱫᱚ ᱥᱩᱛᱟᱹᱢ ᱛᱮ ᱛᱚᱞ ᱚᱠᱚ᱾ ᱜᱤᱫᱽᱨᱟᱹ ᱟᱯᱟᱛ ᱫᱚ ᱜᱟᱱᱟᱰᱮ ᱨᱮ ᱵᱟᱹᱭᱟᱣ ᱟᱠᱟᱱ ᱪᱚᱠᱟᱴᱷ ᱟᱨ ᱚᱲᱟᱜ ᱨᱮᱱᱟᱜ ᱥᱮᱱᱮᱨ ᱛᱟᱞᱟᱨᱮ ᱮᱸᱜᱟᱛᱟᱜ ᱵᱟᱦᱟ ᱫᱚᱭ ᱛᱚᱯᱟ ᱠᱟᱜ-ᱟ᱾ ᱟᱱᱟ ᱛᱟᱭᱚᱢ ᱫᱷᱟᱹᱭ ᱵᱩᱲᱦᱤ ᱫᱚ ᱟᱦᱟᱨ ᱪᱟᱞᱟᱣ ᱠᱟᱛᱮᱜ ᱜᱤᱫᱽᱨᱟᱹ ᱣᱟᱜ ᱪᱷᱩᱛ ᱮ ᱪᱷᱤᱸᱰᱟᱣᱟ ᱜᱤᱫᱽᱨᱟᱹ ᱟᱨ ᱮᱸᱜᱟᱛ ᱡᱟᱦᱟᱸ ᱯᱟᱨᱠᱚᱢ ᱨᱮ ᱠᱤᱱ ᱜᱤᱛᱤᱡ-ᱟ, ᱚᱸᱰᱮ ᱫᱚ ᱢᱤᱫᱴᱟᱝ ᱥᱟᱨ ᱠᱚ ᱵᱤᱫ ᱠᱟᱜ-ᱟ᱾
        
          ᱪᱷᱟᱹᱴᱭᱟᱹᱨ ᱺ- ᱪᱷᱟᱹᱴᱭᱟᱹᱨ ᱫᱚ ᱯᱮ ᱢᱟᱦᱟᱸ ᱵᱟᱝᱠᱷᱟᱱ ᱢᱚᱬᱮ ᱢᱟᱦᱟᱸ ᱛᱟᱭᱚᱢ ᱦᱩᱭᱩᱜ-ᱟ᱾ ᱪᱷᱟᱹᱴᱭᱟᱹᱨ ᱫᱤᱱ ᱦᱤᱞᱚᱜ ᱫᱚ ᱟᱹᱛᱩ ᱨᱮᱱ ᱦᱟᱲᱟᱢ ᱵᱩᱲᱦᱤ ᱦᱚᱲ ᱠᱚ ᱡᱟᱣᱨᱟᱜ-ᱟ᱾ ᱫᱷᱟᱹᱭ ᱦᱟᱲᱟᱢ ᱵᱩᱲᱦᱤ ᱜᱮ ᱪᱷᱟᱹᱴᱭᱟᱹᱨ ᱠᱟᱹᱢᱤ ᱫᱚ ᱠᱤᱱ ᱪᱷᱤᱸᱰᱟᱣᱟ᱾
ᱡᱮᱛᱮ ᱠᱷᱚᱱ ᱢᱟᱲᱟᱝ ᱫᱚ ᱚᱡᱷᱟ ᱦᱟᱲᱟᱢ ᱫᱚ ᱥᱟᱨᱡᱚᱢ ᱯᱷᱩᱬᱩᱜ ᱨᱮ ᱫᱟᱜ ᱮ ᱫᱚᱦᱚᱭᱟ, ᱚᱱᱟ ᱫᱟᱜ ᱨᱮ ᱥᱚᱥᱚ ᱡᱟᱝ ᱟᱨ ᱵᱟᱪᱠᱚᱢ ᱥᱟᱠᱟᱢ ᱮ ᱡᱚᱵᱮᱭᱟ᱾ ᱚᱱᱟ ᱫᱟᱜ ᱛᱮ ᱜᱤᱫᱽᱨᱟᱹ ᱣᱟᱜ ᱵᱚᱦᱚᱜ ᱩᱵ ᱮ ᱦᱚᱭᱚᱭᱟ᱾ ᱚᱱᱟ ᱛᱟᱭᱚᱢ ᱵᱟᱪᱷᱟᱣ ᱟᱠᱟᱱ ᱥᱟᱥᱟᱝ ᱨᱤᱫ ᱠᱟᱛᱮᱜ ᱜᱤᱫᱽᱨᱟᱹ ᱠᱚ ᱩᱢ ᱚᱡᱚᱜ ᱮᱭᱟ᱾ ᱮᱸᱜᱟᱛ ᱩᱢ ᱚᱡᱚᱜ ᱞᱟᱹᱜᱤᱫ ᱫᱚ ᱥᱟᱥᱟᱝ ᱫᱚ ᱵᱟᱝ ᱠᱚ ᱵᱟᱪᱷᱟᱣᱟ᱾ ᱮᱸᱜᱟᱛ ᱫᱚ ᱚᱲᱟᱜ ᱵᱟᱝᱠᱷᱟᱱ ᱯᱩᱠᱷᱨᱤ ᱨᱮ ᱥᱟᱨ ᱤᱫᱤ ᱠᱟᱛᱮᱜ ᱫᱟᱜ ᱜᱷᱟᱴ ᱨᱮ ᱫᱚᱦᱚᱭᱟ ᱟᱨ ᱚᱱᱟ ᱥᱟᱨ ᱨᱮᱭ ᱥᱤᱸᱫᱩᱨᱟᱜ-ᱟ᱾ ᱥᱮᱫᱟᱭ ᱫᱚ ᱩᱜᱽᱞᱤ ᱥᱟᱨ ᱛᱮᱜᱮ ᱱᱟᱹᱲ ᱠᱚ ᱜᱮᱫ ᱮᱫ ᱛᱟᱦᱮᱫ ᱡᱟᱦᱟᱸ ᱥᱟᱨ ᱛᱮ ᱜᱤᱫᱽᱨᱟᱹ ᱣᱟᱜ ᱱᱟᱹᱲ ᱠᱚ ᱜᱮᱫᱟ ᱚᱱᱟ ᱥᱟᱨ ᱫᱚ ᱥᱮᱸᱫᱨᱟ ᱛᱮ ᱵᱟᱝ ᱠᱚ ᱤᱫᱤᱭᱟ᱾ ᱪᱷᱟᱹᱴᱭᱟᱹᱨ ᱥᱩᱢᱩᱝ ᱫᱚ ᱵᱟᱨ ᱴᱷᱮᱱ ᱠᱚ ᱦᱟᱹᱴᱤᱧᱟ, ᱢᱤᱫ ᱯᱷᱩᱬᱩᱜ ᱫᱚ ᱜᱤᱫᱟᱹᱨᱟ ᱮᱸᱜᱟᱛ ᱞᱟᱹᱜᱤᱫ ᱟᱨ ᱢᱤᱫ ᱯᱷᱩᱬᱩᱜ ᱫᱚ ᱜᱟᱶᱞᱟ ᱦᱚᱲ ᱠᱚ ᱞᱟᱹᱜᱤᱫ ᱟᱨ ᱩᱢᱩᱜ ᱠᱚ ᱪᱟᱞᱟᱜ-ᱟ᱾ ᱜᱤᱫᱽᱨᱟᱹ ᱩᱢ ᱡᱚᱦᱚᱜ ᱫᱚ, ᱜᱤᱫᱽᱨᱟᱹ ᱫᱚ ᱟᱛᱱᱟᱜ ᱥᱟᱠᱟᱢ ᱨᱮ ᱦᱚᱱᱚᱨ ᱠᱟᱛᱮᱜ ᱠᱚ ᱩᱢᱮᱭᱟ᱾ ᱟᱛᱱᱟᱜ ᱥᱟᱠᱟᱢ ᱵᱚᱫᱚᱞ ᱛᱮ ᱛᱩᱞᱥᱤ ᱥᱟᱠᱟᱢ ᱦᱚᱸ ᱱᱮᱛᱟᱨ ᱫᱚ ᱜᱟᱱᱚᱜ ᱠᱟᱱᱟ᱾ ᱟᱹᱛᱩ ᱦᱟᱲ ᱠᱚ ᱪᱷᱟᱹᱴᱭᱟᱹᱨ ᱧᱩᱛᱩᱢ ᱩᱢ ᱵᱟᱲᱟ ᱦᱮᱡ ᱠᱟᱛᱮᱜ, ᱫᱷᱟᱹᱭ ᱵᱩᱲᱦᱤ ᱫᱚ ᱟᱲᱟᱜ ᱜᱟᱱᱟᱰᱮ ᱨᱮ ᱦᱟᱺᱰᱤ ᱟᱨ ᱫᱟᱜ ᱮ ᱪᱚᱰᱚᱨᱟ᱾ ᱚᱲᱟᱜ ᱵᱷᱤᱛᱨᱤ ᱯᱟᱦᱴᱟ ᱠᱷᱚᱱ ᱜᱤᱫᱽᱨᱟᱹ ᱮᱸᱜᱟᱛ ᱫᱚ ᱥᱟᱠᱟᱢ ᱯᱷᱩᱬᱩᱜ ᱛᱮ ᱦᱟᱺᱰᱤ ᱮ ᱟᱬᱛᱤᱭᱟ ᱟᱨ ᱚᱱᱟ ᱟᱬᱛᱤ ᱦᱟᱺᱰᱤ ᱫᱚ ᱚᱡᱷᱟ ᱵᱩᱲᱦᱤ ᱥᱟᱵ ᱠᱟᱛᱮᱜ ᱯᱷᱩᱬᱩᱜ ᱢᱮᱥᱟ ᱨᱟᱪᱟᱥᱮᱫ ᱮ ᱜᱤᱲᱤ ᱠᱟᱜ-ᱟ᱾
ᱟᱹᱱᱠᱟ ᱜᱮ ᱫᱟᱜ ᱦᱚᱸ ᱠᱤᱱ ᱮᱯᱮᱢᱟ ᱟᱨ ᱠᱤᱱ ᱪᱟᱯᱟᱫᱽ ᱜᱤᱰᱤᱭᱟ᱾ ᱱᱟᱶᱟ ᱠᱟᱹᱢᱤ ᱫᱚ ᱯᱮ-ᱯᱮ ᱯᱷᱩᱬᱩᱜ ᱠᱤᱱ ᱮᱯᱮᱢᱟ ᱟᱨ ᱠᱤᱱ ᱵᱚᱸᱜᱟᱭᱟ᱾ ᱚᱱᱟ ᱛᱟᱭᱚᱢ ᱦᱮᱸᱥᱟᱜ ᱥᱟᱠᱟᱢ ᱨᱮ ᱯᱤᱴᱷᱟᱹ ᱟᱠᱟᱱ, ᱵᱟᱨᱭᱟ ᱯᱤᱴᱷᱟᱹ ᱫᱚ ᱥᱟᱠᱟᱢ ᱨᱮ ᱠᱚ ᱫᱚᱦᱚᱭᱟ ᱟᱨ ᱚᱱᱟ ᱯᱤᱴᱷᱟᱹ ᱫᱚ ᱜᱤᱫᱽᱨᱟᱹ ᱣᱟᱜ ᱞᱩᱛᱩᱨ ᱨᱮ ᱠᱚ ᱡᱚᱴᱮᱫᱟ-ᱟ᱾ ᱚᱱᱟ ᱛᱟᱭᱚᱢ ᱫᱷᱟᱹᱭ ᱵᱩᱲᱦᱤ ᱫᱚ ᱦᱚᱞᱚᱝ ᱫᱟᱜ ᱮ ᱤᱨᱪᱤᱭᱟ, ᱢᱤᱫ ᱯᱷᱩᱬᱩᱜ ᱛᱮ ᱫᱚ ᱮᱸᱜᱟᱛ ᱟᱨ ᱜᱤᱫᱽᱨᱟᱹ, ᱫᱚᱥᱟᱨ ᱯᱷᱩᱬᱩᱜ ᱛᱮ ᱫᱚ ᱠᱚᱲᱟᱠᱚ  ᱟᱨ ᱛᱮᱥᱟᱨ ᱯᱷᱩᱬᱩᱜ ᱨᱮᱱᱟᱜ ᱦᱚᱞᱚᱝ ᱫᱟᱜ ᱛᱮᱫᱟ ᱠᱩᱲᱤ ᱠᱚ, ᱠᱚᱲᱟᱢ ᱨᱮᱭ ᱤᱨᱪᱤᱭᱟᱠᱚᱣᱟ᱾ ᱦᱟᱞᱚᱝ ᱫᱟᱜ ᱤᱨᱪᱤ ᱞᱮᱱᱠᱷᱟᱱ ᱜᱮ ᱮᱸᱜᱟᱛ ᱟᱨ ᱜᱤᱫᱽᱨᱟᱹ ᱣᱟᱜ ᱪᱷᱩᱶᱟᱛ ᱸᱪᱟᱵᱟᱜ-ᱟ᱾ ᱟᱱᱟ ᱛᱟᱭᱚᱢ ᱚᱲᱟᱜ ᱟᱥᱟᱢᱤ ᱫᱚ``ᱱᱤᱢ ᱫᱟᱜ ᱢᱟᱹᱰᱤ`` ᱵᱷᱤᱛᱤᱨ ᱨᱮᱭ ᱵᱚᱸᱜᱟᱭᱟ᱾ ᱟᱨ ᱟᱱᱟ ᱛᱟᱭᱚᱢ ᱟᱹᱛᱩ ᱨᱮᱱ ᱦᱚᱲ ᱟᱨ ᱯᱮᱲᱟ ᱯᱟᱺᱭᱲᱟ ᱠᱚᱭ ᱡᱚᱢ ᱧᱩ ᱦᱚᱪᱚ ᱠᱚᱣᱟ᱾


                ᱧᱩᱛᱩᱢ ᱺ-  ᱜᱤᱫᱽᱨᱟᱹ ᱣᱟᱜ ᱧᱩᱛᱩᱢ ᱫᱚᱦᱚᱭ ᱞᱟᱹᱜᱤᱫ ᱫᱚ ᱢᱤᱫᱴᱟᱝ ᱫᱤᱱ ᱠᱚ ᱛᱚᱞᱟ, ᱟᱹᱛᱩ ᱦᱚᱲ ᱟᱨ ᱯᱮᱲᱟ ᱯᱟᱺᱭᱲᱟ ᱠᱚ ᱱᱮᱶᱛᱟ ᱠᱟᱣᱟ᱾ ᱢᱟᱨᱟᱝ ᱠᱟᱲᱟ ᱟᱨ ᱢᱟᱨᱟᱝ ᱠᱩᱲᱤ ᱫᱚ ᱠᱚᱲᱟ ᱯᱟᱦᱴᱟ ᱨᱤᱱ ᱜᱟᱲᱚᱢ ᱦᱟᱲᱟᱢ-ᱜᱚᱲᱚᱢ ᱵᱩᱲᱦᱤ ᱠᱚ ᱧᱩᱛᱩᱢ ᱠᱚᱣᱟ᱾ ᱟᱨ ᱚᱱᱟ ᱛᱟᱭᱚᱢ ᱨᱤᱱ ᱜᱤᱫᱽᱨᱟᱹ ᱫᱚ ᱮᱸᱜᱟᱛ ᱯᱟᱦᱴᱟ ᱨᱤᱱ ᱜᱚᱲᱚᱢ ᱦᱟᱲᱟᱢ-ᱵᱩᱲᱦᱤ ᱠᱚ ᱧᱩᱛᱩᱢ ᱠᱚᱣᱟ᱾


                 ᱡᱟᱱᱟᱢ ᱪᱷᱟᱹᱴᱭᱟᱹᱨ ᱤᱫᱤ ᱠᱟᱛᱮᱜ ᱜᱟᱞᱢᱟᱨᱟᱣ

ᱟᱹᱛᱩ ᱦᱚᱲᱠᱚ- ᱡᱚᱦᱟᱨ, ᱚᱡᱷᱟ ᱵᱟᱵᱟ, ᱜᱤᱫᱽᱨᱟᱹ ᱣᱟᱜ ᱱᱟᱹᱲ ᱪᱮᱫᱟᱜ ᱥᱟᱨ                                                ᱛᱮᱠᱚ ᱜᱮᱫᱟ?
ᱚᱡᱷᱟ-             ᱵᱟᱹᱵᱩ ᱟᱸᱡᱚᱢ ᱯᱮ, ᱥᱮᱫᱟᱭ ᱦᱟᱲᱟᱢ ᱵᱤᱫᱟᱞ ᱨᱮ ᱢᱟᱨᱟᱝ ᱵᱩᱨᱩ
                         ᱫᱚ ᱟᱡᱟᱜ ᱥᱟᱨ ᱛᱮ ᱯᱤᱞᱪᱩ ᱦᱟᱲᱟᱢ ᱟᱨ ᱯᱤᱞᱪᱩ ᱵᱩᱲᱦᱤ ᱭᱟᱜ ᱱᱟᱹᱲ
                         ᱜᱮᱫ ᱠᱮᱫᱟ, ᱟᱱᱟᱛᱮ ᱱᱮᱛᱟᱨ ᱦᱚᱸ ᱱᱟᱹᱲ ᱫᱚ ᱥᱟᱨ ᱛᱮᱜᱮ ᱠᱚ ᱜᱮᱫᱟ᱾ 
                         ᱟᱨ ᱡᱟᱦᱟᱸ ᱯᱟᱨᱠᱚᱢ ᱨᱮ ᱜᱤᱫᱽᱨᱟᱹ ᱟᱨ ᱮᱸᱜᱟᱛ ᱠᱤᱱ ᱜᱤᱛᱤᱡ-ᱟ, ᱚᱸᱰᱮ
                         ᱵᱚᱦᱚᱜ ᱯᱟᱦᱴᱟ ᱨᱮ ᱥᱟᱨ ᱫᱚ ᱠᱚ ᱫᱟᱦᱚ ᱠᱟᱜ-ᱟ᱾

ᱦᱚᱲ ᱠᱚ            ᱺ-  ᱚᱡᱷᱟ ᱵᱟᱵᱟ, ᱮᱸᱜᱟᱛᱟᱜ ᱦᱚᱲᱢᱚ ᱨᱮᱱᱟᱜ ᱜᱤᱫᱟᱹᱨᱟ ᱵᱟᱦᱟ 
                          ᱛᱚᱯᱟ ᱡᱚᱦᱚᱜ ᱫᱚ, ᱪᱮᱫᱟᱜ ᱥᱟᱵᱲᱤ ᱛᱮ ᱚᱛ ᱫᱚᱠᱚ ᱞᱟᱭᱟ,                                                 ᱢᱮᱱᱠᱟᱷᱟᱱ ᱜᱤᱫᱽᱨᱟᱹ ᱣᱟᱜ ᱨᱚᱦᱚᱲ ᱱᱟᱹᱲ ᱛᱚᱯᱟ ᱡᱟᱦᱚᱜ ᱫᱚ 
                          ᱪᱮᱫᱟᱜ ᱥᱩᱭ ᱛᱮᱜᱮ ᱚᱛ ᱞᱟ ᱠᱟᱛᱮᱜ ᱠᱚ ᱛᱚᱯᱟᱭᱟ?
ᱚᱡᱷᱟ.              ᱺ- ᱵᱟᱹᱵᱩ ᱠᱚ, ᱵᱟᱦᱟ ᱫᱚ ᱟᱨ ᱦᱚᱹ ᱫᱚᱦᱲᱟ ᱛᱮ ᱡᱚ ᱚᱢᱚᱱᱚᱜ 
                          ᱞᱟᱹᱜᱤᱫ ᱛᱮᱜᱮ ᱥᱟᱹᱵᱲᱤ ᱵᱟᱝᱠᱷᱟᱱ ᱯᱷᱟᱞ ᱛᱮ ᱜᱮ ᱚᱛ ᱫᱚᱠᱚ 
                          ᱞᱟᱭᱟ᱾ ᱢᱮᱱᱠᱷᱟᱱ ᱜᱤᱫᱽᱨᱟᱹ ᱣᱟᱜ ᱨᱚᱦᱚᱲ ᱱᱟᱹᱲ ᱛᱚᱯᱟ ᱡᱟᱦᱚᱜ
                          ᱫᱚ ᱚᱛ ᱫᱚ ᱥᱩᱭ ᱛᱮ ᱵᱟᱝᱠᱷᱟᱱ ᱱᱟᱱᱦᱟ ᱛᱟᱨ ᱛᱮ ᱛᱮᱠᱚ ᱞᱟᱭᱟ᱾
                          ᱦᱟᱥᱟ ᱫᱚ ᱠᱟᱹᱡ ᱜᱮ ᱛᱟᱲᱮᱡ ᱦᱩᱭᱩᱜ-ᱟ᱾ ᱠᱟᱹᱡ ᱠᱟᱹᱡ ᱛᱮ ᱛᱟᱲᱮᱡ
                          ᱞᱮᱱᱠᱷᱟᱱ ᱴᱟᱰᱟ ᱱᱟᱯᱟᱭ ᱚᱢᱚᱱᱚᱜ-ᱟ, ᱵᱟᱝ ᱯᱷᱟᱨᱠᱟᱜ-ᱟ᱾

ᱦᱚᱲ ᱠᱚ.           ᱺ-  ᱚᱡᱷᱟ ᱦᱟᱲᱟᱢ, ᱚᱡᱷᱟ ᱵᱩᱲᱦᱤ ᱫᱚ ᱫᱟᱜ ᱟᱨ ᱦᱟᱺᱬᱤ ᱪᱮᱫᱟᱜ
                          ᱢᱤᱫ ᱛᱮᱭ ᱵᱚᱸᱜᱟᱭᱟ ᱟᱨᱮ ᱟᱨᱮᱡ ᱜᱤᱰᱤᱭᱟ?
ᱚᱡᱷᱟ               :- ᱵᱟᱹᱵᱩ, ᱛᱮᱦᱮᱧ ᱫᱚ ᱜᱤᱫᱽᱨᱟᱹ ᱫᱚ ᱵᱟᱨ ᱯᱟᱦᱴᱟ ᱨᱮ ᱢᱮᱱᱟᱭᱟ᱾
                          ᱪᱷᱩᱣᱟᱹᱛ ᱨᱮ ᱢᱮᱱᱟᱭᱟ ᱛᱮ ᱫᱟᱜ ᱛᱮᱫᱚ ᱵᱚᱸᱜᱟ ᱠᱚᱭ ᱟᱨᱩᱵ 
                          ᱥᱟᱯᱷᱟ ᱠᱚᱣᱟ, ᱟᱱᱟ ᱛᱟᱭᱚᱢ ᱦᱟᱸᱰᱤ ᱛᱮ ᱵᱚᱸᱜᱟᱭ ᱫᱮᱵᱟ ᱥᱮᱵᱟ 
                          ᱠᱚᱣᱟ᱾
    
ᱦᱚᱲ ᱠᱚ            ᱺ- ᱦᱮᱸ ᱟᱪᱷᱟ, ᱮᱸᱜᱟᱛ ᱟᱨ ᱜᱤᱫᱽᱨᱟᱹ ᱫᱚ ᱚᱲᱟᱜ ᱵᱷᱤᱛᱨᱤ ᱨᱮ ᱟᱨ
                          ᱚᱡᱷᱟ ᱵᱩᱲᱦᱤ ᱫᱚ ᱨᱟᱪᱟ ᱯᱟᱦᱴᱟ ᱨᱮ ᱫᱩᱲᱩᱵ‌ ᱠᱟᱛᱮᱜ ᱠᱟᱛᱮᱜ
                          ᱜᱤᱫᱽᱨᱟᱹ ᱫᱚ ᱪᱮᱫᱟᱜ ᱠᱤᱱ ᱮᱯᱮᱢᱟ?
ᱚᱡᱷᱟ               :- ᱵᱟᱹᱵᱩ ᱚᱲᱟᱜ ᱨᱮᱱᱟᱜ ᱥᱤᱢᱟ ᱫᱚ ᱜᱟᱱᱟᱰᱮ ᱠᱟᱱᱟ᱾ ᱜᱤᱫᱽᱨᱟᱹ ᱫᱚ
                          ᱪᱷᱩᱣᱟᱹᱛ ᱜᱮᱭᱟᱭ, ᱚᱱᱟᱛᱮ ᱜᱟᱱᱟᱰᱮ ᱯᱟᱨᱚᱢ ᱞᱟᱹᱜᱤᱫ ᱛᱮᱜᱮ 
                          ᱜᱤᱫᱽᱨᱟᱹ ᱫᱚ ᱚᱡᱷᱟ ᱵᱩᱲᱦᱤ ᱵᱟᱦᱨᱮ ᱠᱷᱚᱱᱮ ᱟᱛᱟᱝ ᱮᱭᱟ ᱾ ᱮᱱᱠᱷᱟᱱ
                          ᱜᱮ ᱜᱤᱫᱽᱨᱟᱹ ᱫᱚ ᱜᱟᱱᱟᱰᱮ ᱠᱷᱚᱱᱮ ᱯᱟᱨᱚᱢ ᱮᱱᱟ ᱟᱨ ᱟᱵᱚ ᱛᱟᱞᱟ
                          ᱛᱮᱭ ᱦᱮᱡ ᱮᱱᱟ᱾

ᱦᱚᱲ ᱠᱚ            ᱺ- ᱚᱡᱷᱟ ᱦᱟᱲᱟᱢ ᱜᱤᱫᱽᱨᱟᱹ ᱣᱟᱜ ᱡᱮᱛᱮ ᱠᱷᱚᱱ ᱢᱟᱲᱟᱝ ᱛᱮ ᱪᱮᱛᱟᱱ
                          ᱚᱰᱚᱷ ᱞᱮᱱᱠᱷᱟᱱ ᱪᱮᱫᱟᱜ ᱥᱮᱛᱟ ᱥᱟᱶ ᱠᱚ ᱵᱟᱯᱞᱟ ᱠᱚᱣᱟ? ᱟᱨ ᱵᱚᱦᱚᱜ
                          ᱩᱵ ᱨᱮ ᱵᱟᱨᱭᱟ ᱜᱷᱩᱨᱱᱤ ᱚᱲᱚᱜ ᱞᱮᱱᱠᱷᱟᱱ ᱪᱮᱫᱟᱜ ᱜᱟᱰᱟ ᱫᱟᱜ ᱨᱮᱠᱚ 
                          ᱟᱹᱛᱩ ᱠᱚᱣᱟ?
ᱚᱡᱷᱟ                :- ᱵᱟᱹᱵᱩ ᱱᱚᱶᱟ ᱫᱚ ᱜᱤᱫᱽᱨᱟᱹ ᱣᱟᱜ ᱵᱟᱹᱜᱷᱩᱫ ᱜᱩᱪᱟᱹᱣ ᱞᱟᱹᱜᱤᱫ ᱠᱚ
                          ᱠᱟᱹᱢᱤᱭᱟ᱾

ᱦᱚᱲ ᱠᱚ            ᱺ- ᱜᱩᱫᱽᱨᱟ ᱡᱟᱱᱟᱢᱚᱜ ᱚᱠᱛᱚ ᱪᱮᱫᱟᱜ ᱥᱟᱲᱤᱢ ᱠᱚ ᱫᱟᱞᱟ ᱟᱨ ᱠᱟᱺᱥᱟ 
                          ᱠᱚ ᱨᱩᱭᱟ?
ᱚᱡᱷᱟ.              ᱺ- ᱜᱤᱫᱽᱨᱟ ᱡᱟᱱᱟᱢᱚᱜ ᱚᱠᱛᱚ ᱥᱟᱲᱤᱢ ᱫᱟᱞ ᱢᱟᱱᱮ ᱫᱚ ᱦᱩᱭᱩᱜ ᱠᱟᱱᱟ, 
                          ᱜᱤᱫᱽᱨᱟᱣᱟᱜ ᱡᱤᱣᱤ ᱵᱟᱹᱭᱥᱟᱹᱣᱚᱜ ᱞᱟᱹᱜᱤᱫ ᱜᱮ, ᱯᱤᱛᱚᱞ ᱫᱟᱞ ᱨᱩ 
                          ᱨᱮᱱᱟᱜ ᱢᱟᱱᱮ ᱫᱚ ᱞᱩᱛᱩᱨ ᱨᱮ ᱥᱟᱰᱮ ᱛᱟᱨᱠᱚ ᱵᱚᱞᱚᱱ ᱜᱮ᱾ ᱛᱚᱵᱮ ᱮᱱᱟᱝ 
                          ᱜᱮ ᱡᱤᱣᱤ ᱵᱟᱹᱭᱥᱟᱹᱣᱚᱜ-ᱟ᱾
ᱦᱚᱲ ᱠᱚ            ᱺ- ᱠᱩᱲᱤ ᱦᱚᱯᱚᱱ ᱵᱷᱟᱹᱨᱤ ᱦᱚᱲᱢᱚ ᱛᱟᱦᱮᱱ ᱡᱚᱦᱚᱜ, ᱡᱟᱦᱟᱸᱱ ᱱᱤᱪᱚᱞ 
                          ᱱᱤᱪᱚᱞ ᱡᱟᱭᱜᱟ ᱛᱮ ᱵᱟᱝ ᱠᱚ ᱪᱟᱞᱟᱜ-ᱟ, ᱪᱟᱸᱫᱚ ᱜᱟᱦᱱᱟ ᱵᱟᱝ ᱠᱚ 
                          ᱟᱨ ᱠᱚᱲᱟ ᱦᱚᱯᱚᱱ ᱫᱚ ᱡᱤᱣ ᱡᱤᱭᱟᱹᱞᱤ ᱵᱟᱝ ᱠᱚ ᱜᱚᱡ ᱡᱚᱣᱟ ᱪᱮᱫᱟᱜ?
ᱚᱡᱷᱟ.              ᱺ- ᱥᱮᱫᱟᱭ ᱠᱷᱚᱱ ᱜᱮ ᱟᱵᱚ ᱥᱟᱱᱛᱟᱲ ᱥᱟᱶᱛᱟ ᱨᱮ ᱯᱟᱹᱛᱭᱟᱹᱣ ᱢᱮᱱᱟᱜ-ᱟ,
                           ᱡᱮ ᱱᱤᱪᱚᱞ ᱡᱟᱭᱜᱟ ᱨᱮ ᱫᱚ ᱵᱟᱹᱲᱤᱡ ᱵᱳᱸᱜᱟ ᱠᱚ ᱛᱟᱦᱮᱱᱟ᱾ ᱦᱚᱲᱢᱚ ᱨᱮ 
                           ᱵᱟᱨᱭᱟ ᱡᱤᱣᱤ ᱛᱟᱦᱮᱱᱟᱱ ᱛᱮ ᱵᱟᱝ ᱠᱚ ᱪᱟᱞᱟᱜ-ᱟ᱾ ᱪᱟᱸᱫᱚ ᱜᱟᱦᱱᱟ 
                           ᱫᱚ ᱟᱫᱷᱟ ᱜᱮᱭ ᱛᱟᱦᱮᱱᱟ ᱚᱱᱟᱛᱮ ᱵᱟᱝᱠᱚ ᱧᱮᱞ ᱠᱚᱣᱟ ᱵᱟᱝᱠᱷᱟᱱ 
                           ᱜᱤᱫᱽᱨᱟᱣᱟᱜ ᱡᱟᱦᱟᱸᱱ ᱟᱸᱜᱚ ᱠᱚ ᱜᱮ ᱟᱫᱷᱟ ᱵᱮᱱᱟᱜ-ᱟ᱾ ᱡᱤᱣ ᱡᱤᱭᱟᱞᱤ 
                           ᱱᱚᱶᱟ ᱠᱷᱟᱹᱛᱤᱨ ᱛᱮ ᱵᱟᱝᱠᱚ ᱜᱚᱡ ᱠᱚᱣᱟ ᱡᱮ ᱜᱤᱫᱽᱨᱟᱣᱟᱜ ᱦᱚᱲᱢᱚ  
                           ᱵᱮᱱᱟᱣᱜ ᱠᱟᱱᱟ ᱵᱟᱝᱠᱷᱟᱱ ᱚᱱᱟ ᱨᱮᱱᱟᱜ ᱵᱟᱹᱲᱤᱡ ᱮᱥᱮᱨ ᱜᱤᱫᱽᱨᱟ ᱨᱮ 
                           ᱨᱮ ᱧᱩᱨᱩᱜ-ᱟ᱾
                          
ᱦᱚᱲ ᱠᱚ            ᱺ-ᱜᱤᱫᱽᱨᱟᱣᱟᱜ ᱧᱩᱛᱩᱢ ᱵᱟᱝ ᱦᱩᱭ ᱠᱟᱛᱮᱜ ᱵᱟᱯᱞᱟ ᱦᱩᱭᱩᱜ-ᱟ ᱥᱮ ᱵᱟᱝ-
                           ᱟ?
ᱚᱡᱷᱟ               ᱺ- ᱵᱟᱹᱵᱩ, ᱵᱟᱯᱞᱟ ᱢᱟᱲᱟᱝ ᱜᱩᱫᱽᱨᱟ ᱧᱩᱛᱩᱢ ᱦᱩᱭ ᱞᱟᱠᱛᱤᱭᱟᱱᱟ,                                       ᱜᱤᱫᱽᱨᱟ ᱟᱣᱨᱤ ᱧᱩᱛᱩᱢ ᱮ ᱦᱟᱹᱵᱤᱡ ᱜᱩᱫᱽᱨᱟ ᱫᱚ ᱥᱟᱶᱛᱟ ᱨᱮ ᱵᱟᱭ                                     ᱞᱮᱠᱷᱟᱜ-ᱟ᱾ ᱜᱩᱫᱽᱨᱟ ᱧᱩᱛᱩᱢ ᱠᱮ ᱮᱱᱟᱝ ᱜᱮ, ᱵᱳᱸᱜᱟ ᱵᱳᱨᱳ ᱠᱚ                                           ᱵᱟᱰᱟᱭᱟ ᱠᱟᱱᱟᱭ ᱢᱮᱱᱛᱮ, ᱜᱤᱫᱽᱨᱟ ᱧᱩᱛᱩᱢ ᱡᱚᱦᱚᱜ ᱫᱚ ᱜᱤᱫᱽᱨᱟ                                   ᱧᱩᱛᱩᱢ ᱦᱟᱸᱰᱤ ᱠᱚ ᱪᱚᱰᱚᱨᱟ᱾ ᱚᱱᱟᱛᱮ  ᱜᱤᱫᱽᱨᱟ ᱫᱚ ᱠᱚ ᱧᱩᱨᱩᱢ ᱠᱚᱣᱟ᱾                             ᱱᱚᱶᱟ ᱠᱟᱛᱷᱟ ᱨᱮᱱᱟᱜ ᱟᱹᱨᱤᱪᱟᱹᱞᱤ ᱥᱮᱨᱮᱧ ᱫᱚ ᱱᱚᱸᱜ-ᱚᱭ ᱱᱚᱸᱠᱟ                                         ᱢᱮᱱᱟᱜ-ᱟ᱾


ᱡᱟᱱᱟᱢ ᱪᱷᱟᱹᱴᱭᱟᱹᱨ ᱥᱮᱨᱮᱧ

 ᱑) ᱛᱟᱺᱦᱟᱸ ᱨᱤᱛᱟ ᱱᱟᱱᱟ ᱛᱟᱨᱱᱟ ᱛᱟᱦᱟᱺ ᱨᱮᱛᱟ ᱱᱟᱱᱟ ᱛᱟᱨᱱᱟ
      ᱛᱚᱠᱚᱭᱟᱜ ᱨᱟᱪᱟ ᱨᱮ ᱫᱟᱜ ᱵᱩᱢ ᱵᱩᱠᱚᱜ
ᱫᱟᱜ ᱵᱩᱢᱵᱩᱠᱚ ᱢᱟᱱᱟ ᱪᱟᱣᱞᱮ ᱵᱚᱦᱮᱞᱚᱜ᱾
ᱯᱷᱟᱨᱱᱟᱣᱟᱜ ᱨᱟᱪᱟ ᱨᱮ ᱫᱟᱜ ᱵᱩᱢᱵᱩᱠᱚᱜ 
ᱫᱟᱜ ᱵᱩᱢᱵᱩᱠᱚᱜ ᱢᱟᱱᱟ ᱪᱟᱣᱞᱮ ᱵᱚᱦᱮᱞᱚᱜ᱾



ᱠᱷᱮᱨᱣᱟᱞ ᱟᱹᱨᱤ ᱵᱟᱺᱫᱤ ᱯᱚᱛᱚᱵ 
ᱥᱚᱫᱚᱨᱤᱡ= ᱠᱨᱤᱥᱬᱚ ᱪᱚᱱᱫᱽᱨᱚ ᱴᱩᱰᱩ
ᱥᱟ-ᱥᱟᱯᱲᱟᱣᱤᱡ =ᱵᱤᱡᱮᱱᱫᱽᱨᱚ ᱦᱟᱺᱥᱫᱟ
                              Bijendra Hansda