ᱯᱤ.ᱳ. ᱵᱳᱰᱤᱝ
ᱟᱝᱜᱽᱨᱮᱡᱽ ᱚᱠᱛᱮ ᱨᱮ ᱵᱳᱰᱤᱝ ᱥᱟᱦᱮᱵᱽ
᱐᱒/᱑᱑/᱑᱘᱖᱕ ᱨᱮ ᱥᱟᱱᱛᱟᱞᱤ ᱯᱟᱹᱨᱥᱤ ᱥᱟᱶᱦᱮᱸᱫᱨᱮᱱ ᱢᱟᱨᱟᱝ ᱯᱟᱹᱨᱥᱤᱵᱤᱫᱷ ᱟᱨ ᱢᱟᱨᱟᱝ ᱟᱹᱠᱤᱞᱟᱹᱱᱤᱡ ᱟᱹᱰᱤ ᱢᱟᱱᱚᱛᱟᱱ ᱯ. ᱳ. ᱵᱳᱰᱤᱝᱟᱜ ᱤᱨᱟᱹᱞ ᱜᱮᱞ ᱯᱮᱭᱟᱜ ᱜᱩᱨ ᱵᱟᱹᱪᱷᱨᱤᱠᱟᱱ ᱛᱟᱭᱟ᱾ ᱩᱱᱤᱭᱟᱜ ᱱᱳᱣᱟ ᱜᱩᱨ ᱵᱟᱹᱪᱷᱲᱤᱨᱮ ᱥᱟᱭ ᱥᱟᱭ ᱡᱚᱦᱟᱨ ᱟᱨ ᱢᱟᱱᱚᱛ ᱵᱟᱦᱟ ᱟᱯᱟᱱᱡᱽᱞᱮ 🙏🙏🌹🌹🌹🙏🙏
==᱾ ᱾ ᱾ ᱾ ᱾ ᱾ ᱾ ᱾ ᱾ ᱾ ᱾==
᱒᱕/᱐᱖/᱑᱙᱓᱘ ᱛᱟᱹᱨᱤᱠᱷᱜᱮ ᱱᱳᱨᱣᱮᱭ ᱫᱤᱥᱚᱢᱨᱮᱱ ᱧᱩᱛᱩᱢᱟᱱ ᱢᱤᱥᱚᱱᱟᱹᱨᱤ ᱯᱳᱣᱞ ᱳᱞᱟᱯᱷ ᱵᱳᱰᱤᱝ ᱫᱚ ᱰᱮᱱᱢᱟᱨᱠ ᱫᱤᱥᱚᱢ ᱨᱮᱭᱟᱜ ᱳᱫᱮᱱᱥᱮ ᱧᱩᱛᱩᱢᱟᱱᱟᱜ ᱡᱟᱭᱜᱟᱨᱮ ᱥᱮᱛᱟᱜ ᱴᱟᱦᱞᱟᱣᱜ ᱡᱚᱠᱷᱮᱱᱮ ᱵᱤᱱᱫᱟᱹᱲᱮᱱᱟ ᱟᱨ ᱛᱟᱨᱟᱥᱤᱧ ᱒:᱓᱐ ᱵᱟᱡᱮ ᱞᱮᱠᱟ ᱟᱡᱨᱮᱱ ᱫᱩᱞᱟᱹᱲᱤᱭᱟᱹ ᱡᱩᱨᱤ ᱠᱨᱤᱥᱛᱤᱱ ᱞᱟᱨᱥᱮᱱ ᱵᱳᱰᱤᱝᱟᱜ ᱦᱚᱵᱚᱨᱨᱮ ᱢᱩᱪᱟᱹᱫ ᱥᱟᱦᱮᱸᱫᱼᱮ ᱦᱟᱛᱟᱣᱞᱮᱫᱟ ᱾ ᱩᱱᱡᱚᱠᱷᱮᱡ ᱩᱱᱤᱭᱟᱜ ᱩᱢᱮᱨ ᱫᱚ ᱮᱭᱟᱭ ᱜᱮᱞ ᱯᱮ ᱥᱮᱨᱢᱟ ᱛᱟᱦᱮᱸᱠᱟᱱᱛᱟᱭᱟ᱾ ᱪᱷᱨᱤᱥᱛᱤᱱᱮ ᱞᱟᱨᱥᱮᱱ ᱵᱳᱰᱤᱝ ᱫᱚ ᱧᱩᱛᱩᱢᱟᱱ ᱰᱟᱠᱴᱚᱨᱮ ᱛᱟᱦᱮᱸᱠᱟᱱᱟ ᱢᱮᱱᱠᱷᱟᱱ ᱵᱤᱫᱷᱤ ᱨᱮᱭᱟᱜ ᱵᱤᱫᱷᱟᱱ ᱪᱟᱞᱟᱜ ᱦᱚᱲ ᱫᱚ ᱚᱠᱚᱭ ᱦᱚᱸ ᱵᱟᱢ ᱨᱩᱣᱟᱹᱲ ᱫᱟᱲᱮᱣᱟᱭᱟ ᱾ ᱵᱳᱰᱤᱝ ᱥᱟᱦᱮᱵᱮ ᱪᱟᱞᱟᱣ ᱞᱟᱦᱟᱭᱮᱱᱛᱮ ᱥᱟᱱᱛᱟᱞᱤ ᱥᱟᱶᱦᱮᱸᱫ ᱨᱮᱭᱟᱜ ᱟᱹᱰᱤ ᱢᱟᱨᱟᱝ ᱞᱳᱠᱥᱟᱱᱜᱮ ᱦᱳᱭᱮᱱᱟ ᱾ ᱩᱱᱤ ᱫᱚ ᱢᱟᱨᱟᱝ ᱚᱱᱚᱞᱤᱭᱟᱹ, ᱢᱟᱨᱟᱝ ᱛᱩᱜᱢᱟᱹᱞᱤᱡ, ᱢᱟᱨᱟᱝ ᱛᱚᱨᱡᱳᱢᱟᱭᱤᱡ, ᱢᱟᱨᱟᱝ ᱠᱷᱚᱱᱫᱽᱨᱚᱱᱤᱭᱟᱹ, ᱢᱟᱨᱟᱝ ᱥᱟᱥᱟᱯᱟᱲᱟᱣᱤᱡ, ᱢᱟᱨᱟᱝ ᱥᱟᱵᱟᱫᱽ ᱢᱩᱨᱟᱹᱭ ᱵᱮᱜᱱᱟᱣᱤᱡ ᱟᱨ ᱨᱟᱱ ᱢᱩᱨᱜᱟᱹᱱ ᱵᱟᱜᱰᱟᱭᱡ, ᱫᱟᱨᱮ ᱱᱟᱹᱬᱤᱸᱨᱮᱱ ᱵᱤᱫᱟᱹᱠᱤᱞᱟᱹᱱᱤᱡ ᱟᱨ ᱢᱟᱨᱟᱝ ᱜᱩᱨᱩᱜᱮᱭ ᱛᱟᱦᱮᱸᱠᱟᱱᱟ ᱾ ᱥᱟᱱᱛᱟᱞᱤ ᱥᱟᱶᱦᱮᱸᱫᱨᱮ ᱩᱱᱤᱭᱟᱜ ᱳᱠᱟ ᱮᱱᱮᱢ ᱢᱮᱱᱟᱜ ᱳᱱᱟ ᱫᱚ ᱟᱹᱰᱤ ᱟᱡᱽᱜᱩᱛᱜᱮᱭᱟ ᱾ ᱩᱱᱤᱭᱟᱜ ᱠᱟᱹᱨᱫᱷᱟᱹᱱᱤ ᱫᱚ ᱚᱠᱚᱭ ᱦᱚᱸ ᱯᱟᱥᱮᱡ ᱵᱟᱠᱳ ᱡᱟᱜ ᱛᱤᱭᱳᱜ ᱫᱟᱲᱮᱭᱟᱜᱼᱟ ᱾
ᱵᱳᱰᱤᱝ ᱥᱟᱦᱮᱵᱽ ᱫᱚ ᱵᱷᱟᱨᱚᱛ ᱫᱤᱥᱚᱢ ᱨᱮᱭᱟᱜ ᱥᱟᱱᱛᱟᱞ ᱯᱟᱨᱜᱟᱱᱟ ᱡᱤᱞᱟᱹᱨᱮ ᱢᱮᱱᱟᱜ ᱵᱮᱱᱟᱜᱟᱲᱤᱭᱟ ᱢᱤᱥᱥᱤᱭᱳᱱ ᱰᱤᱱᱰᱟᱹᱨᱮ ᱯᱟᱹᱦᱤᱞ ᱫᱷᱟᱣ ᱑᱖ ᱡᱟᱱᱩᱣᱟᱨᱤ ᱑᱘᱙᱐ ᱥᱟᱞᱨᱮᱭ ᱥᱮᱴᱮᱨᱞᱮᱱᱟ᱾ ᱩᱱᱡᱚᱠᱷᱮᱡ ᱩᱱᱤ ᱫᱚ ᱵᱟᱨ ᱜᱮᱞ ᱵᱟᱨ ᱥᱮᱨᱢᱟ ᱩᱢᱮᱨᱨᱮᱱ ᱡᱩᱣᱟᱹᱱ ᱠᱳᱲᱟᱭ ᱛᱟᱦᱮᱸᱠᱟᱱᱟ ᱾ ᱢᱤᱫ ᱪᱟᱱᱫᱳ ᱵᱮᱱᱟᱜᱟᱲᱤᱭᱟᱨᱮ ᱡᱤᱨᱟᱹᱣᱠᱟᱛᱮ ᱫᱩᱢᱠᱟ ᱨᱟᱢᱯᱩᱨᱦᱟᱴ ᱥᱚᱲᱚᱠᱨᱮ ᱢᱮᱱᱟᱜ ᱢᱚᱹᱦᱩᱞᱯᱟᱦᱟᱲᱤ ᱧᱩᱛᱩᱢᱟᱱᱟᱜ ᱢᱤᱥᱚᱱ ᱰᱤᱱᱰᱟᱛᱮᱭ ᱩᱪᱟᱹᱲ ᱪᱟᱞᱟᱣᱮᱱᱟ᱾ ᱚᱱᱰᱮ ᱛᱟᱦᱮᱸᱠᱟᱛᱮᱜᱮ ᱩᱱᱤ ᱫᱚ ᱥᱟᱱᱛᱟᱞ ᱟᱨ ᱥᱟᱱᱛᱟᱞᱤ ᱥᱟᱶᱦᱮᱸᱫ ᱞᱟᱹᱜᱤᱫᱼᱮ ᱜᱮᱨᱵᱤᱫᱞᱮᱱᱟ᱾ ᱩᱱᱤ ᱫᱚ ᱢᱚᱹᱦᱩᱞᱯᱟᱦᱟᱲᱤᱨᱮ ᱵᱟᱨ ᱜᱮᱞ ᱯᱮ ᱥᱮᱨᱢᱟ ᱠᱟᱹᱢᱤᱠᱟᱛᱮ ᱫᱩᱢᱠᱟ ᱱᱟᱝᱜᱽᱨᱟᱦᱟᱨᱮ ᱢᱮᱱᱟᱜ ᱢᱤᱥᱟᱹᱱ ᱠᱳᱢᱯᱟᱹᱣᱩᱱᱰ ᱛᱮᱭ ᱩᱪᱟᱹᱲ ᱪᱟᱞᱟᱣᱮᱱᱟ ᱾ ᱚᱱᱰᱮ ᱜᱮᱞ ᱵᱟᱨ ᱥᱮᱨᱢᱟ ᱠᱟᱹᱢᱤᱠᱟᱛᱮ ᱟᱨᱦᱚᱸ ᱢᱚᱹᱦᱩᱞᱯᱟᱦᱟᱲᱤᱛᱮᱭ ᱨᱩᱣᱟᱹᱲ ᱦᱟᱞᱟᱭᱮᱱᱟ ᱟᱨ ᱢᱩᱪᱟᱹᱫ ᱦᱟᱹᱵᱤᱡ ᱚᱱᱰᱮᱜᱮᱭ ᱛᱟᱦᱮᱸᱭᱮᱱᱟ᱾ ᱩᱱᱤᱭᱟᱜ ᱟᱹᱰᱤ ᱢᱚᱱᱥᱩᱵᱟᱹ ᱛᱟᱦᱮᱸᱠᱟᱱᱛᱟᱭᱟ ᱡᱮ ᱦᱚᱲ ᱦᱚᱯᱚᱱᱠᱳ ᱛᱟᱞᱟᱨᱮ ᱟᱡᱼᱟᱜ ᱢᱩᱪᱟᱹᱫ ᱦᱟᱹᱵᱤᱡ ᱱᱚᱱᱰᱮᱜᱮ ᱛᱟᱦᱮᱱ ᱢᱮᱱᱠᱷᱟᱱ ᱳᱱᱠᱟ ᱵᱟᱝ ᱦᱳᱭᱞᱮᱱᱟ᱾ ᱩᱱᱤ ᱫᱚ ᱟᱠᱳ ᱫᱤᱥᱳᱢ ᱱᱳᱨᱣᱮ ᱛᱮ ᱨᱩᱣᱟᱹᱲ ᱪᱟᱞᱟᱜ ᱨᱮᱭᱟᱜ ᱦᱩᱠᱩᱢᱮ ᱧᱟᱢᱠᱮᱫᱟ᱾ ᱩᱱᱤ ᱫᱚ ᱥᱟᱱᱛᱟᱞ ᱟᱨ ᱥᱟᱱᱛᱟᱞᱤ ᱥᱟᱶ ᱱᱳᱝᱠᱟᱭ ᱢᱤᱞᱟᱹᱣ ᱢᱤᱫᱼᱟᱠᱟᱱ ᱛᱟᱦᱮᱸᱠᱟᱱᱟ ᱡᱮ ᱳᱱᱟ ᱠᱷᱚᱱ ᱪᱷᱟᱯᱟᱰᱟᱣᱜ ᱫᱚ ᱟᱹᱰᱤ ᱟᱡᱷᱟᱸᱴᱜᱮ ᱛᱟᱦᱮᱸᱠᱟᱱᱟ ᱾ ᱥᱟᱱᱛᱟᱞ ᱟᱨ ᱥᱟᱱᱛᱟᱞᱤ ᱥᱟᱶ ᱩᱱᱤᱭᱟᱜ ᱫᱩᱞᱟᱹᱲ ᱛᱚᱱᱚᱞ ᱫᱚ ᱟᱹᱰᱤ ᱜᱟᱹᱦᱤᱨᱜᱮ ᱛᱟᱦᱮᱸᱠᱟᱱᱛᱟᱭᱟ ᱾
ᱢᱟᱱᱚᱛᱟᱱ ᱵᱳᱰᱤᱝ ᱥᱟᱦᱮᱵᱽ ᱫᱚ ᱟᱠᱳ ᱫᱤᱥᱚᱢᱛᱮ ᱨᱩᱣᱟᱹᱲ ᱪᱟᱞᱟᱜ ᱨᱮᱭᱟᱜ ᱦᱩᱠᱩᱢᱮ ᱧᱟᱢᱠᱮᱫ ᱠᱷᱟᱱ ᱑᱖ ᱟᱯᱨᱤᱞ ᱑᱙᱓᱔ ᱥᱟᱞᱨᱮ ᱫᱩᱢᱠᱟ ᱨᱮᱭᱟᱜ ᱵᱟᱱᱫᱟᱨᱡᱳᱨᱤ ᱢᱤᱥᱟᱹᱱ ᱠᱳᱢᱯᱟᱹᱣᱩᱱᱰ ᱨᱮ ᱢᱩᱪᱟᱹᱫ ᱵᱤᱫᱟᱹ ᱡᱚᱦᱟᱨᱠᱳ ᱮᱢᱟᱣᱟᱫᱮᱭᱟ ᱾ ᱢᱟᱱᱚᱛᱟᱱ ᱡᱳᱦᱟᱱᱥ ᱜᱳᱣᱥᱰᱟᱞ ᱫᱚ ᱱᱳᱣᱟ ᱵᱤᱫᱟᱹ ᱡᱚᱦᱟᱨ ᱟᱠᱷᱲᱟ ᱪᱟᱜᱞᱟᱣᱤᱡ ᱞᱮᱠᱟᱛᱮᱭ ᱛᱟᱦᱮᱸᱠᱟᱱᱟ ᱾
ᱵᱳᱰᱤᱝ ᱥᱟᱦᱮᱵᱽ ᱫᱚ ᱦᱚᱲ ᱦᱚᱯᱚᱱᱠᱳ ᱛᱟᱞᱟᱨᱮ ᱯᱳᱱ ᱜᱮᱞ ᱯᱳᱱ ᱥᱮᱨᱢᱟ ᱛᱟᱦᱮᱸᱠᱟᱛᱮ ᱟᱡᱼᱟᱜ ᱥᱟᱱᱟᱢ ᱟᱹᱠᱤᱞ ᱟᱨ ᱫᱟᱲᱮ ᱥᱟᱱᱛᱟᱞ ᱟᱨ ᱥᱟᱱᱛᱟᱞᱤ ᱞᱟᱹᱜᱤᱫᱛᱮ ᱟᱞᱟᱭᱞᱮᱫᱟ᱾ ᱠᱷᱟᱹᱴᱤ ᱠᱟᱛᱷᱟᱠᱟᱱᱜᱮᱭᱟ ᱡᱮ ᱱᱳᱝᱠᱟ ᱵᱮᱜᱟᱨ ᱪᱟᱞᱟᱣᱜ ᱫᱚ ᱟᱹᱰᱤ ᱦᱟᱥᱳᱣᱟᱱᱟᱜᱠᱟᱱᱜᱮᱭᱟ ᱾ ᱟᱨ ᱱᱳᱝᱠᱟ ᱞᱮᱠᱟ ᱵᱳᱰᱤᱝ ᱥᱟᱦᱮᱵᱽ ᱫᱚ ᱟᱡᱨᱮᱱ ᱫᱩᱞᱟᱹᱲᱤᱭᱟᱹ ᱡᱩᱨᱤ ᱰᱨ. ᱠᱨᱤᱥᱪᱟᱹᱱ ᱞᱟᱨᱥᱮᱱ ᱵᱳᱰᱤᱝ ᱥᱟᱶ ᱦᱚᱲ ᱦᱚᱯᱚᱱᱠᱳᱣᱟᱜ ᱫᱤᱱᱟᱹᱢ ᱫᱤᱱ ᱨᱮᱭᱟᱜ ᱵᱮᱣᱦᱟᱨᱚᱜ ᱡᱤᱱᱤᱥᱠᱳ ᱥᱚᱢᱚᱞᱠᱟᱛᱮ ᱟᱹᱰᱤ ᱦᱟᱢᱟᱞ ᱢᱚᱱᱮᱭᱟᱱᱛᱮ ᱟᱠᱳ ᱫᱤᱥᱳᱢᱛᱮ ᱨᱩᱣᱟᱹᱲ ᱪᱟᱞᱟᱣᱮᱱᱟ᱾
ᱢᱩᱪᱟᱹᱫ ᱵᱤᱫᱟᱹ ᱡᱚᱦᱟᱨ ᱟᱠᱷᱲᱟᱨᱮ ᱱᱚᱱᱰᱮᱱ ᱦᱚᱲ ᱦᱚᱯᱚᱱᱠᱳ ᱞᱟᱹᱜᱤᱫ ᱟᱡᱼᱟᱜ ᱢᱩᱪᱟᱹᱫ ᱠᱟᱛᱷᱟ ᱟᱨ ᱥᱟᱱᱫᱮᱥ ᱟᱹᱰᱤ ᱜᱟᱹᱦᱤᱨ ᱫᱩᱠ ᱥᱟᱞᱟᱜ ᱱᱳᱝᱠᱟᱭ ᱞᱟᱹᱭ ᱥᱚᱫᱚᱨᱠᱮᱫᱟᱼ
★"ᱫᱩᱞᱟᱹᱲᱤᱭᱟᱹ ᱵᱳᱭᱦᱟ ᱟᱨ ᱢᱤᱥᱮᱨᱟᱠᱳ!
ᱠᱷᱟᱹᱱᱫᱽᱨᱤ ᱢᱚᱱᱮ ᱠᱷᱚᱱ ᱟᱹᱰᱤ ᱫᱩᱠ ᱥᱟᱞᱟᱜ ᱱᱳᱣᱟ ᱞᱟᱹᱭᱟᱯᱮ ᱦᱳᱭᱳᱜᱠᱟᱱᱛᱤᱧᱟᱹ ᱡᱮ ᱟᱯᱮ ᱠᱷᱚᱱ ᱥᱟᱹᱝᱜᱤᱧ ᱪᱟᱞᱟᱜ ᱨᱮᱭᱟᱜ ᱦᱩᱠᱩᱢ ᱦᱮᱡᱟᱹᱫᱤᱧᱟ ᱾ ᱥᱟᱱᱟ ᱛᱟᱦᱮᱸᱠᱟᱱᱟ ᱡᱮ ᱟᱯᱮᱠᱳ ᱛᱟᱞᱟᱨᱮᱜᱮ ᱡᱮᱢᱚᱱ ᱤᱧ ᱦᱚᱸᱧ ᱛᱳᱯᱟ ᱳᱪᱳᱜ, ᱢᱮᱱᱠᱷᱟᱱ ᱳᱱᱠᱟ ᱵᱟᱝ ᱦᱳᱭ ᱫᱟᱲᱮᱭᱟᱜᱠᱟᱱᱟ ᱾ ᱳᱱᱟᱛᱮ ᱵᱤᱫᱟᱹᱜ ᱨᱮᱭᱟᱜ ᱚᱠᱛᱮ ᱫᱚ ᱥᱮᱴᱮᱨᱮᱱᱟ ᱾
ᱟᱯᱮ ᱫᱚ ᱟᱹᱰᱤ ᱢᱟᱨᱟᱝ ᱡᱟᱹᱛ ᱠᱟᱱᱟᱯᱮ, ᱤᱥᱚᱨᱨᱮᱱ ᱵᱟᱪᱷᱟᱣ ᱦᱚᱲᱠᱳ ᱠᱟᱱᱟᱯᱮ, ᱟᱯᱮᱭᱟᱜ ᱤᱛᱤᱦᱟᱥ ᱫᱚ ᱟᱹᱰᱤᱜᱮ ᱥᱚᱨᱚᱥ ᱟᱨ ᱯᱮᱨᱮᱡ ᱯᱩᱨᱩᱱ ᱜᱮᱭᱟ ᱾
ᱟᱯᱮᱭᱟᱜ ᱥᱟᱵᱫᱟᱵ ᱟᱨ ᱟᱹᱨᱤᱪᱟᱹᱞᱤ, ᱞᱮᱜᱽ ᱟᱪᱟᱨ ᱨᱮᱭᱟᱜ ᱟᱹᱨᱤ ᱵᱟᱹᱱᱫᱷᱤ ᱫᱚ ᱚᱞ ᱨᱟᱠᱟᱵᱠᱟᱛᱮ ᱤᱧ ᱥᱟᱶᱤᱧ ᱤᱫᱤ ᱛᱳᱨᱟᱭᱮᱫᱟ ᱾ ᱮᱱᱛᱮ ᱱᱳᱣᱟᱠᱳ ᱨᱟᱹᱠᱷᱤ ᱡᱳᱜᱟᱣ ᱫᱚᱦᱚᱭ ᱞᱟᱹᱜᱤᱫ ᱱᱤᱛ ᱵᱟᱯᱮ ᱥᱟᱯᱲᱟᱣ ᱫᱟᱲᱮᱭᱟᱠᱟᱣᱟᱫᱟ ᱾ ᱱᱳᱣᱟ ᱫᱚ ᱟᱯᱮᱭᱟᱜ ᱫᱷᱚᱱᱜᱮ, ᱟᱞᱮ ᱫᱤᱥᱳᱢᱨᱮ ᱱᱳᱣᱟ ᱫᱷᱚᱱ ᱨᱟᱹᱠᱷᱤ ᱡᱳᱜᱟᱣ ᱫᱚᱦᱚᱠᱟᱜ ᱨᱮᱭᱟᱜᱼᱤᱧ ᱵᱮᱵᱚᱥᱛᱟ ᱳᱴᱳᱠᱟᱜᱠᱟᱱᱟ ᱾ ᱟᱫᱚ ᱡᱟᱸᱦᱟᱸᱛᱤᱥ ᱞᱮᱠᱢᱟᱱᱯᱮ ᱦᱳᱭᱳᱜ, ᱩᱱᱨᱮ ᱱᱳᱣᱟ ᱫᱚ ᱥᱩᱴᱤᱠ ᱛᱤᱭᱟᱹᱜᱽᱯᱮ, ᱱᱳᱣᱟ ᱫᱚ ᱟᱯᱮᱭᱟᱜᱜᱮ ᱛᱟᱦᱮᱱᱟ᱾"★
ᱥᱟᱭ ᱥᱟᱭ ᱢᱟᱱᱚᱛ ᱡᱚᱦᱟᱨ ᱢᱟᱨᱟᱝ ᱜᱩᱨᱩ ᱵᱳᱰᱤᱝ ᱥᱟᱦᱮᱵᱽ! ᱟᱢᱟᱜ ᱧᱩᱛᱩᱢ ᱫᱚ ᱛᱤᱨᱮ ᱡᱩᱜᱮ ᱥᱤᱧ ᱪᱟᱱᱫᱳ ᱞᱮᱠᱟ ᱡᱷᱟᱠ ᱡᱷᱟᱠᱟᱣᱜᱼᱟ᱾ ᱟᱢ ᱫᱚ ᱵᱟᱹᱱᱩᱢᱨᱮ ᱦᱚᱸ ᱟᱢᱟᱜ ᱩᱢᱩᱞ ᱟᱢᱟᱜ ᱛᱟᱲᱟᱢ ᱯᱟᱧᱡᱟ ᱡᱟᱣᱜᱮ ᱟᱞᱮ ᱛᱟᱞᱟᱨᱮ ᱛᱟᱦᱮᱱᱟ ᱡᱩᱜᱽ ᱢᱩᱪᱟᱹᱫ ᱦᱟᱹᱵᱤᱡ ᱮᱱᱠᱟ ᱯᱩᱨᱴᱷᱟᱹᱜᱮ ᱾
ᱡᱚᱹᱭ ᱵᱳᱰᱤᱝ!
ᱡᱚᱹᱭ ᱥᱟᱱᱛᱟᱞᱤ
||=======||
