ᱟᱢ ᱥᱟᱶ ᱯᱟᱹᱦᱤᱞ ᱧᱮᱯᱮᱞ

  ᱟᱢ ᱥᱟᱶ ᱯᱟᱹᱦᱤᱞ ᱧᱮᱯᱮᱞ 

ᱯᱟᱹᱦᱤᱞ ᱧᱮᱯᱮᱞ ᱟᱢ ᱥᱟᱶ
ᱳᱠᱳ ᱪᱳᱠᱳ ᱠᱚᱭᱚᱜ ᱧᱟᱯᱟᱢ
ᱟᱢᱮᱢ ᱠᱚᱭᱚᱜᱼᱟᱹᱧᱨᱮ
ᱤᱧᱤᱧ ᱞᱟᱡᱟᱣᱜᱠᱟᱱ
ᱤᱧᱤᱧ ᱠᱚᱭᱚᱜᱼᱟᱢᱨᱮ
ᱟᱢᱮᱢ ᱞᱟᱡᱟᱣᱜᱠᱟᱱ ᱾
ᱞᱟᱡᱟᱣᱢᱟ ᱡᱟᱞᱟᱛᱮ
ᱢᱮᱸᱫ ᱢᱮᱸᱫᱜᱮ ᱵᱟᱝ ᱢᱤᱞᱟᱹᱣᱳᱜᱠᱟᱱ
ᱮᱱ ᱦᱚᱸ ᱮᱱᱠᱟᱛᱮᱜᱮ
ᱞᱟᱡᱟᱣ ᱢᱮᱥᱟᱞ ᱵᱮᱝᱜᱮᱫᱛᱮᱜᱮ
ᱟᱢ ᱦᱚᱸ ᱤᱧᱨᱮᱢ ᱠᱩᱥᱤᱭᱱ
ᱤᱧ ᱦᱚᱸ ᱟᱢᱨᱮᱧ ᱢᱟᱹᱞᱩᱝᱮᱱ ᱾
ᱵᱟᱨᱮᱭᱟ ᱟᱹᱱᱟᱹᱲᱤ ᱦᱚᱲ
ᱵᱟᱨᱮᱭᱟ ᱟᱹᱱᱟᱹᱲᱤ ᱢᱚᱱ
ᱫᱩᱞᱟᱹᱲ ᱥᱩᱛᱟᱹᱢᱛᱮ ᱛᱚᱞ ᱡᱳᱲᱟᱣᱮᱱ
ᱠᱩᱯᱩᱞᱤ ᱵᱳᱜᱮ ᱡᱩᱫᱟᱹ 
ᱥᱟᱹᱝᱜᱤᱧ ᱦᱚᱲᱞᱟᱝ ᱥᱳᱨ ᱤᱫᱤᱭᱮᱱ ᱾
ᱱᱤᱛᱚᱜ ᱱᱳᱝᱠᱟᱧ ᱵᱩᱡᱷᱟᱹᱣᱮᱫᱠᱟᱱᱟ
ᱛᱤᱥ ᱠᱷᱚᱱ ᱪᱚᱝᱞᱟᱝ ᱧᱮᱞᱯᱮᱞᱟᱠᱟᱱᱟ
ᱫᱩᱞᱟᱹᱲ ᱫᱩᱯᱩᱞᱟᱹᱲ ᱜᱟᱞᱢᱟᱨᱟᱣ
ᱦᱮᱲᱮᱢ ᱥᱮᱹᱵᱮᱹᱞ ᱨᱚᱲ ᱞᱟᱱᱫᱟ
ᱵᱟᱪᱚᱞᱟᱝ ᱵᱷᱟᱜᱟᱣᱜᱠᱟᱱᱟ ᱾
ᱱᱤᱛᱚᱜ ᱢᱤᱫ ᱵᱮᱞᱟ ᱵᱟᱞᱟᱝ ᱨᱚᱲ ᱞᱮᱠᱷᱟᱱ
ᱮᱠᱟᱞ ᱱᱳᱝᱠᱟ ᱵᱩᱡᱷᱟᱹᱣᱳᱜᱠᱟᱱᱟ
ᱵᱮ ᱜᱟᱞᱢᱟᱨᱟᱣᱛᱮ ᱯᱟᱥᱮᱡ
ᱢᱤᱫ ᱥᱮᱨᱢᱟ ᱞᱮᱠᱟ ᱪᱚᱝ ᱯᱟᱨᱚᱢᱟᱠᱟᱱᱟ᱾
ᱯᱟᱹᱦᱤᱞ ᱧᱮᱯᱮᱞ ᱵᱮᱝᱜᱮᱫ ᱧᱟᱯᱟᱢ
ᱳᱠᱳ ᱪᱳᱠᱳ ᱳᱠᱳ ᱫᱟᱱᱟᱝ
ᱢᱚᱱᱮ ᱢᱚᱱᱮᱞᱟᱝ ᱛᱚᱞᱟᱠᱟᱱ
ᱵᱟᱨᱮᱭᱟ ᱡᱤᱣᱤ ᱵᱟᱨᱮᱭᱟ ᱦᱚᱲᱢᱚ
ᱟᱡ ᱟᱡᱛᱮᱜᱮ ᱢᱤᱞᱟᱹᱣ ᱢᱤᱫᱼᱟᱠᱟᱱ ᱾
ᱟᱢ ᱥᱟᱶ ᱵᱟᱹᱧ ᱨᱚᱲ ᱞᱮᱠᱷᱟᱱ
ᱟᱢᱟᱜ ᱟᱲᱟᱝ ᱵᱟᱹᱧ ᱟᱧᱡᱚᱢ ᱞᱮᱠᱷᱟᱱ
ᱱᱳᱣᱟ ᱫᱷᱟᱹᱨᱛᱤ ᱜᱳᱴᱟ ᱱᱤᱥᱩᱱᱜᱮᱭᱟ

ᱪᱮᱫᱟᱜ ᱱᱳᱝᱠᱟᱹᱧ ᱟᱹᱭᱠᱟᱹᱣᱮᱫᱠᱟᱱ?

               ||÷÷÷÷÷÷÷÷÷||