ᱫᱤᱥᱳᱢ ᱫᱚ ᱠᱟᱜᱚᱪᱨᱮ ᱵᱮᱱᱟᱣ ᱱᱟᱠᱥᱟ ᱵᱟᱝᱠᱟᱱᱟ
ᱡᱩᱫᱤ ᱟᱢᱟᱜ ᱳᱲᱟᱜ ᱨᱮᱭᱟᱜ
ᱢᱤᱫᱴᱮᱹᱱ ᱠᱟᱱᱫᱷᱟᱨᱮ ᱥᱮᱹᱝᱜᱮᱹᱞ ᱞᱟᱜᱟᱣᱟᱠᱟᱱᱠᱷᱟᱱ
ᱛᱚᱵᱮᱹ ᱪᱮᱠᱟ ᱟᱢ ᱫᱚ
ᱮᱴᱟᱜᱼᱟᱜ ᱠᱟᱱᱫᱷᱟᱨᱮᱢ ᱡᱟᱹᱯᱤᱫ ᱫᱟᱲᱮᱭᱟᱜᱼᱟ?
ᱡᱩᱫᱤ ᱟᱢᱟᱜ ᱳᱲᱟᱜ ᱨᱮᱭᱟᱜ ᱢᱤᱫᱴᱮᱹᱱ ᱠᱟᱱᱫᱷᱟᱨᱮ
ᱜᱚᱡ ᱦᱚᱲᱢᱚ ᱥᱮᱭᱟᱜᱠᱟᱱᱠᱷᱟᱱ
ᱛᱚᱵᱮᱹ ᱪᱮᱠᱟ ᱟᱢ ᱫᱚ
ᱮᱴᱟᱜᱼᱟᱜ ᱠᱟᱱᱫᱷᱟᱨᱮᱢ ᱵᱤᱱᱛᱤ ᱫᱟᱲᱮᱭᱟᱜᱼᱟ?
ᱡᱩᱫᱤ ᱦᱮᱸ
ᱛᱚᱵᱮᱹ ᱤᱧ ᱫᱚ ᱟᱢ ᱴᱷᱮᱱ
ᱪᱮᱹᱫ ᱦᱚᱸ ᱢᱮᱹᱱ ᱨᱮᱭᱟᱜ ᱵᱟᱹᱱᱩᱜᱛᱤᱧᱟᱹ ᱾
ᱫᱤᱥᱳᱢ ᱫᱚ ᱠᱟᱜᱚᱪᱨᱮ ᱵᱮᱱᱟᱣᱟᱠᱟᱱ
ᱱᱟᱠᱥᱟ ᱫᱚ ᱵᱟᱝᱠᱟᱱᱟ
ᱡᱮ ᱢᱤᱫ ᱦᱤᱸᱥ ᱚᱲᱮᱹᱡ ᱛᱟᱱᱟᱜᱞᱮᱱᱠᱷᱟᱱ
ᱥᱟᱨᱮᱹᱡ ᱦᱤᱸᱥ ᱳᱱᱠᱟᱜᱮ ᱛᱮᱹᱥᱱᱮᱹᱜ ᱛᱟᱦᱮᱸ ᱫᱟᱲᱮᱭᱟᱜᱼᱟ
ᱟᱨ ᱜᱟᱰᱟᱠᱳ, ᱵᱩᱨᱩᱠᱳ, ᱱᱟᱜᱽᱨᱟᱦᱟᱠᱳ, ᱟᱛᱳᱠᱳ
ᱳᱱᱠᱟᱜᱮ ᱟᱯᱟᱱ ᱟᱹᱯᱤᱱ ᱴᱷᱟᱺᱭᱨᱮ ᱧᱮᱹᱞᱳᱜ
ᱵᱮᱹ ᱵᱮᱜᱟᱨᱜᱮ ᱛᱟᱦᱮᱹᱱ ᱾
ᱡᱩᱫᱤ ᱟᱢ ᱫᱚ ᱱᱳᱣᱟ ᱵᱟᱢ ᱢᱟᱱᱟᱣᱮᱫᱠᱟᱱᱠᱷᱟᱱ
ᱛᱚᱵᱮᱹ ᱤᱧ ᱫᱚ ᱟᱢ ᱥᱟᱶ
ᱚᱦᱚᱹᱧ ᱛᱟᱦᱮᱸ ᱫᱟᱲᱮᱞᱮᱱᱟ ᱾
ᱱᱳᱣᱟ ᱫᱩᱱᱤᱭᱟᱹᱨᱮ ᱢᱟᱱᱣᱟᱣᱟᱜ ᱡᱤᱣᱤ ᱠᱷᱚᱱ ᱞᱟᱹᱴᱩ
ᱪᱮᱹᱫᱜᱮ ᱵᱟᱹᱱᱩᱜᱼᱟ
ᱵᱟᱝ ᱫᱚ ᱤᱥᱚᱨ
ᱵᱟᱝ ᱫᱚ ᱟᱠᱮᱞ
ᱵᱟᱝ ᱫᱚ ᱵᱟᱪᱷᱱᱟᱣ
ᱠᱟᱜᱚᱪᱨᱮ ᱚᱞᱟᱠᱟᱱ ᱡᱟᱸᱦᱟᱸᱱ ᱚᱞᱟᱜᱜᱮ
ᱪᱤᱨᱟᱹ ᱫᱟᱲᱮᱭᱟᱜᱼᱟ
ᱟᱨ ᱚᱛ ᱨᱮᱭᱟᱜ ᱮᱭᱟᱭ ᱪᱟᱹᱴᱤᱠᱳ ᱵᱷᱤᱛᱨᱤ
ᱛᱳᱯᱟ ᱯᱚᱛᱚᱢ ᱫᱟᱲᱮᱭᱟᱜᱼᱟ ᱾
ᱳᱠᱟ ᱫᱤᱥ ᱦᱩᱫᱤᱥ
ᱛᱮᱝᱜᱳ ᱢᱮᱱᱟᱜᱼᱟ ᱜᱚᱡ ᱦᱚᱲᱢᱳᱠᱳᱨᱮ ᱛᱟᱜᱦᱮᱱ
ᱳᱱᱟ ᱫᱚ ᱠᱟᱬᱟᱸᱜᱮᱭᱟ
ᱳᱠᱟ ᱥᱟᱥᱚᱱ
ᱪᱟᱞᱟᱜᱠᱟᱱᱟ ᱵᱟᱹᱱᱫᱩᱠ ᱨᱮᱭᱟᱜ ᱱᱚᱞᱛᱮ
ᱠᱷᱩᱱᱤᱭᱟᱹᱦᱤᱠᱳᱣᱟᱜ ᱫᱟᱱᱫᱷᱟᱠᱟᱱᱟ
ᱡᱩᱫᱤ ᱟᱢ ᱱᱳᱣᱟ ᱵᱟᱢ ᱢᱟᱱᱟᱣᱟ
ᱛᱚᱵᱮᱹ ᱤᱧ ᱫᱚ
ᱱᱤᱛ ᱢᱤᱫ ᱜᱷᱟᱹᱲᱤ ᱦᱚᱸ
ᱚᱦᱚᱹᱧ ᱥᱟᱦᱟᱣ ᱫᱟᱲᱮᱠᱮᱢᱟ ᱾
ᱫᱤᱥᱟᱹ ᱫᱚᱦᱚᱭᱢᱮ
ᱢᱤᱫᱴᱮᱹᱱ ᱜᱤᱫᱽᱨᱟᱹᱣᱟᱜ ᱠᱷᱩᱱ
ᱢᱤᱫᱴᱮᱹᱱ ᱟᱭᱳ ᱦᱚᱲᱟᱜ ᱜᱩᱡᱩᱜ
ᱢᱤᱫᱴᱮᱹᱱ ᱦᱚᱲᱟᱜ
ᱥᱮᱹᱝᱜᱮᱹᱞ ᱴᱩᱴᱤᱛᱠᱳᱛᱮ ᱚᱲᱮᱹᱡᱼᱟᱠᱟᱱ ᱦᱚᱲᱢᱚ
ᱮᱹᱠᱮᱹᱱ ᱥᱟᱥᱚᱱ ᱢᱚᱛᱚ ᱫᱚ ᱵᱟᱝ
ᱯᱩᱨᱟᱹᱣ ᱫᱤᱥᱳᱢ ᱨᱮᱭᱟᱜ ᱢᱚᱨᱚᱱᱠᱟᱱᱟ ᱾
ᱱᱳᱝᱠᱟᱱ ᱢᱟᱸᱭᱟᱸᱢ ᱡᱚᱨᱚᱠᱟᱛᱮ
ᱫᱷᱟᱹᱨᱛᱤᱨᱮ ᱵᱟᱝ ᱥᱟᱹᱠᱤᱫᱳᱜᱠᱟᱱᱟ
ᱨᱤᱢᱤᱞᱨᱮ ᱦᱤᱯᱤᱲᱳᱜ ᱡᱷᱟᱬᱰᱤᱠᱳ
ᱦᱮᱹᱱᱫᱮᱹᱭᱮᱫᱠᱟᱱᱟ ᱾
ᱳᱠᱟ ᱫᱷᱟᱹᱨᱛᱤᱨᱮ
ᱯᱷᱟᱹᱫᱽ ᱯᱟᱱᱟᱦᱤᱠᱳ ᱨᱮᱭᱟᱜ ᱱᱤᱥᱴᱟᱹᱱ ᱢᱮᱱᱟᱜᱼᱟ
ᱟᱨ ᱳᱱᱟᱠᱳᱨᱮ
ᱢᱟᱹᱬᱤᱸ ᱵᱷᱤᱱᱫᱟᱹᱲᱳᱜᱠᱟᱱᱟ
ᱳᱱᱟ ᱫᱷᱟᱹᱨᱛᱤ
ᱡᱩᱫᱤ ᱟᱢᱟᱜ ᱢᱟᱸᱭᱟᱸᱢᱨᱮ
ᱥᱮᱹᱝᱜᱮᱹᱞ ᱵᱮᱱᱟᱣᱠᱟᱛᱮ ᱵᱟᱝ ᱯᱤᱰᱜᱟᱹᱣᱜ
ᱛᱚᱵᱮᱹ ᱵᱩᱡᱽᱠᱟᱢ
ᱟᱢ ᱫᱚ ᱴᱳᱱᱰᱟᱝ ᱡᱩᱢᱤᱢ ᱦᱳᱮᱭᱟᱠᱟᱱᱟ –
ᱟᱢ ᱫᱚ ᱥᱟᱦᱮᱸᱫᱽ ᱨᱮᱭᱟᱜ ᱦᱚᱸ
ᱵᱟᱹᱱᱩᱜᱛᱟᱢᱟ ᱟᱹᱭᱫᱟᱹᱨ
ᱟᱢ ᱞᱟᱹᱜᱤᱫ ᱫᱚ ᱵᱟᱝ ᱛᱟᱦᱮᱸᱞᱮᱱᱟ
ᱱᱳᱣᱟ ᱥᱚᱝᱥᱟᱨ ᱾
ᱢᱩᱪᱟᱹᱫ ᱠᱟᱛᱷᱟ
ᱮᱠᱟᱞ ᱯᱷᱟᱹᱨᱤᱭᱟᱹᱯᱷᱟᱹᱴᱤ
ᱡᱟᱸᱦᱟᱸᱭ ᱠᱷᱩᱱᱤᱭᱟᱹᱦᱤᱜᱮ
ᱛᱤᱥᱜᱮ ᱟᱞᱳᱢ ᱤᱠᱟᱹᱠᱟᱭᱟ
ᱪᱮᱫᱟᱜ ᱵᱟᱝ ᱟᱢᱨᱮᱱ ᱜᱟᱛᱮ ᱠᱟᱱ
ᱫᱷᱚᱨᱚᱢᱨᱮᱱ ᱴᱷᱤᱠᱟᱹᱫᱟᱨ ᱠᱟᱱ
ᱪᱟᱦᱮᱹ ᱫᱚ ᱦᱚᱲᱛᱟᱱᱛᱟᱨᱨᱮᱱ
ᱟᱯᱱᱟᱨ ᱧᱩᱛᱩᱢᱛᱮ ᱵᱷᱳᱨᱟᱱ ᱦᱚᱦᱚᱨᱦᱚᱭᱡᱠᱟᱱ ᱾
................................................
— ᱥᱟᱨᱣᱮᱥᱣᱟᱨ ᱫᱟᱭᱟᱞ ᱥᱟᱠᱥᱮᱱᱟ
[ᱛᱚᱨᱡᱚᱢᱟ – ᱦᱟᱸᱥᱫᱟᱜ ᱯᱩᱨᱩᱫᱷᱩᱞ]
0 Comments