ᱴᱩᱣᱟᱹᱨ ᱜᱤᱫᱽᱨᱟᱹ

ᱪᱤᱠᱟᱹᱭᱟᱢ ᱫᱩᱱᱤᱭᱟᱹᱨᱮ ᱴᱩᱣᱟᱹᱨᱠᱳᱣᱟᱜ ᱞᱤᱠᱷᱟᱹᱱᱜᱮ ᱡᱟᱹᱱᱤᱡ ᱳᱱᱠᱟᱱᱟ᱾ ᱟᱯᱟᱛᱮ ᱜᱚᱡ ᱴᱩᱣᱟᱹᱨ ᱳᱴᱳᱠᱟᱫᱮ ᱠᱷᱟᱱ ᱮᱝᱜᱟᱛ ᱦᱚᱸ ᱡᱤᱣᱮᱫᱛᱮᱭᱮ ᱴᱩᱣᱟᱹᱨ ᱵᱟᱹᱜᱤᱭᱟᱫᱮᱭᱟ ᱵᱤᱨ ᱵᱟᱦᱟ ᱞᱮᱠᱟ; ᱪᱟᱦᱮ ᱫᱚᱢ ᱡᱤᱣᱮᱫᱚᱜ ᱪᱟᱦᱮ ᱫᱚᱢ ᱜᱩᱡᱩᱜ"᱾

ᱥᱟᱜᱚᱨ ᱟᱡ ᱟᱹᱰᱤ ᱠᱟᱹᱴᱤᱡᱼᱮ ᱛᱟᱦᱮᱸᱠᱟᱱ ᱡᱳᱠᱷᱮᱡᱜᱮ ᱟᱡ ᱵᱟᱵᱟ ᱫᱚ ᱢᱟᱝᱜᱟᱲ ᱜᱩᱯᱤᱭ ᱥᱮᱱ ᱞᱟᱦᱟᱭᱮᱱᱛᱮᱭ ᱟᱯᱟᱛ ᱴᱩᱣᱟᱹᱨᱮᱱᱟ᱾ ᱤᱱᱟᱹᱠᱟᱛᱮ ᱵᱟᱨ ᱯᱮ ᱵᱚᱪᱷᱚᱨ ᱛᱟᱭᱚᱢ ᱟᱡᱨᱮᱱ ᱫᱩᱞᱟᱹᱲᱤᱭᱟᱹ ᱛᱳᱣᱟᱫᱟᱨᱮ ᱦᱚᱸ ᱳᱲᱟᱜᱨᱮᱜᱮᱭ ᱵᱟᱹᱜᱤᱭᱟᱫᱮᱛᱮ ᱮᱝᱜᱟᱛᱴᱷᱮᱱ ᱠᱷᱚᱱ ᱡᱤᱣᱮᱫᱛᱮᱜᱮᱭ ᱴᱩᱣᱟᱹᱨᱮᱱᱟ᱾

ᱥᱟᱜᱚᱨ ᱫᱚ ᱟᱡᱨᱮᱱ ᱦᱚᱯᱚᱱ ᱵᱟ ᱟᱨ ᱜᱚ ᱛᱟᱹᱠᱤᱱᱴᱷᱮᱱ ᱟᱹᱰᱤ ᱠᱚᱥᱴᱚᱛᱮᱭᱮ ᱦᱟᱨᱟᱭᱮᱱᱟ᱾ ᱥᱟᱜᱚᱨ ᱟᱡ ᱦᱚᱯᱚᱱ ᱵᱟ ᱟᱨ ᱜᱚ ᱛᱟᱹᱠᱤᱱ ᱫᱚ ᱟᱹᱰᱤ ᱠᱩᱢᱟᱸᱭᱟᱸ ᱦᱚᱲᱜᱮ᱾ ᱦᱟᱨᱟ ᱫᱚᱠᱤᱱ ᱦᱟᱨᱟᱠᱮᱫᱮᱜᱮᱭᱟ ᱢᱮᱱᱠᱷᱟᱱ ᱩᱱᱠᱤᱱ ᱫᱚ ᱩᱱᱤ ᱥᱟᱶ ᱡᱟᱱᱣᱟᱨ ᱞᱮᱠᱟᱠᱤᱱ ᱵᱮᱣᱦᱟᱨᱮᱫ ᱛᱟᱦᱮᱸᱠᱟᱱᱟ᱾ ᱩᱱᱤ ᱫᱚ ᱢᱮᱨᱚᱢ ᱜᱩᱯᱤ ᱠᱷᱚᱱ ᱜᱟᱹᱭ ᱜᱩᱯᱤᱭᱨᱮᱠᱳ ᱵᱷᱤᱲᱟᱹᱣᱠᱮᱫᱮᱭᱟ᱾ ᱵᱷᱟᱹᱜᱽ ᱞᱮᱠᱟ ᱰᱩᱜᱽᱨᱩ ᱧᱩᱛᱩᱢᱟᱱ ᱤᱥᱠᱩᱞ ᱢᱟᱦᱟᱥᱚᱭᱟᱜ ᱧᱚᱧᱡᱚᱨᱮ ᱯᱟᱲᱟᱣᱮᱱᱛᱮ ᱟᱛᱳᱨᱮᱱ ᱜᱤᱫᱽᱨᱟᱹᱠᱳ ᱛᱩᱞᱩᱡ ᱤᱥᱠᱩᱞ ᱦᱚᱸ ᱪᱟᱞᱟᱜᱼᱮ ᱮᱦᱚᱵᱠᱮᱫᱟ᱾ 

ᱥᱟᱹᱨᱤᱜᱮᱠᱳ ᱢᱮᱱᱟᱠᱟᱫᱟ ᱮᱝᱜᱟᱛ ᱟᱯᱟᱛ ᱫᱩᱞᱟᱹᱲ ᱞᱮᱠᱟ ᱫᱚ ᱱᱳᱣᱟ ᱫᱷᱟᱹᱨᱛᱤᱨᱮ ᱪᱮᱫ ᱦᱚᱸ ᱵᱟᱹᱱᱩᱜᱼᱟ᱾ ᱚᱠᱚᱭ ᱴᱩᱣᱟᱹᱨᱟᱠᱟᱱᱟ ᱳᱱᱠᱳᱜᱮ ᱱᱳᱣᱟ ᱨᱮᱭᱟᱜ ᱢᱚᱨᱢᱚ ᱫᱚᱠᱳ ᱵᱟᱰᱟᱭ ᱫᱟᱲᱮᱭᱟᱜᱼᱟ᱾ 

ᱥᱟᱜᱚᱨ ᱥᱟᱶ ᱜᱩᱞᱟᱹᱢ ᱞᱮᱠᱟ ᱵᱮᱣᱦᱟᱨ ᱦᱳᱭᱳᱜᱠᱟᱱᱛᱮ ᱳᱱᱟ ᱳᱲᱟᱜ ᱠᱷᱚᱱ ᱧᱤᱨ ᱳᱰᱳᱝᱳᱜᱜᱮ ᱵᱷᱟᱜᱮ ᱢᱮᱛᱟᱣᱟᱫᱟ᱾ ᱜᱩᱛᱤᱠᱳ ᱥᱟᱶ ᱦᱚᱸ ᱩᱱᱟᱹᱜ ᱵᱟᱹᱲᱤᱡ ᱫᱚ ᱵᱟᱠᱳ ᱵᱮᱣᱦᱟᱨᱟ ᱢᱮᱱᱠᱷᱟᱱ ᱥᱟᱜᱚᱨ ᱥᱟᱶ ᱫᱚ ᱥᱟᱦᱟᱣ ᱠᱷᱚᱱ ᱵᱟᱦᱨᱮ᱾ ᱟᱨ ᱥᱮᱥᱨᱮ ᱳᱱᱟᱜᱮ ᱪᱮᱠᱟᱠᱮᱫᱟ᱾ ᱳᱰᱳᱝ ᱪᱟᱞᱟᱣᱮᱱᱟᱭ ᱳᱱᱟ ᱡᱳᱞᱳᱜᱠᱟᱱ ᱱᱚᱨᱚᱠ ᱥᱮᱝᱜᱮᱞ ᱠᱷᱚᱱ ᱡᱟᱭᱡᱩᱜᱽ ᱞᱟᱹᱜᱤᱫᱜᱮ᱾ ᱵᱮ ᱵᱟᱰᱟᱭ ᱟᱹᱰᱤ ᱥᱟᱹᱝᱜᱤᱧ ᱵᱮ ᱴᱷᱤᱠᱟᱹᱱᱜᱮ᱾ ᱳᱠᱟᱨᱮ ᱴᱷᱤᱠᱟᱹᱱᱟ ᱦᱚᱭᱚᱜᱛᱟᱭᱟ ᱳᱱᱟ ᱫᱚ ᱟᱡ ᱦᱚᱸ ᱵᱟᱭ ᱵᱟᱰᱟᱭᱟ᱾ ᱳᱠᱟᱨᱮᱭ ᱛᱟᱦᱮᱸᱱᱟ, ᱚᱠᱚᱭ ᱜᱳᱨᱟᱥᱮᱭᱟ, ᱡᱤᱣᱮᱫᱳᱜᱼᱟ ᱥᱮ ᱜᱩᱡᱩᱜᱼᱟ ᱥᱟᱱᱟᱢᱟᱜ ᱫᱚ ᱪᱟᱱᱫᱳ ᱦᱤᱨᱞᱟᱹᱨᱮᱜᱮ ᱡᱤᱢᱟᱹᱠᱮᱫᱟ᱾ 

ᱢᱮᱱᱟᱠᱳ ᱚᱠᱚᱭᱨᱮᱱ ᱪᱮᱞᱮᱜᱮ ᱵᱟᱹᱱᱩᱜᱠᱳᱣᱟ ᱩᱱᱤᱨᱮᱱ ᱫᱚ ᱪᱟᱱᱫᱳ ᱢᱮᱱᱟᱭᱟ᱾ ᱱᱳᱣᱟ ᱠᱟᱛᱷᱟ ᱫᱚ ᱥᱟᱜᱚᱨ ᱞᱟᱹᱜᱤᱫ ᱟᱹᱰᱤ ᱡᱳᱡᱟᱣᱮᱱᱟ᱾ ᱪᱟᱞᱟᱜ ᱪᱟᱞᱟᱜᱛᱮ ᱢᱤᱫ ᱟᱛᱳᱨᱮ ᱢᱮᱱᱟᱜ ᱳᱲᱟᱜ ᱠᱩᱰᱟᱹᱢᱨᱮᱭ ᱟᱝᱜᱟᱭᱮᱱᱟ᱾ ᱫᱳᱥᱟᱨ ᱦᱤᱞᱳᱜ ᱥᱮᱛᱟᱜ ᱳᱱᱟ ᱳᱲᱟᱜᱨᱮᱱ ᱡᱩᱨᱤ ᱯᱟᱹᱨᱤ ᱩᱱᱤ ᱜᱤᱫᱽᱨᱟᱹ ᱧᱮᱞᱛᱮ ᱫᱟᱭᱟ ᱦᱮᱡᱼᱟᱫᱠᱤᱱᱟᱹ ᱟᱨ ᱟᱠᱤᱱᱟᱜ ᱳᱲᱟᱜᱨᱮᱠᱤᱱ ᱫᱚᱦᱚᱠᱮᱫᱮᱭᱟ᱾ ᱳᱱᱟ ᱳᱲᱟᱜᱨᱮ ᱩᱱᱤ ᱫᱚ ᱜᱩᱛᱤ ᱞᱮᱠᱟ ᱢᱮᱱᱟᱭᱨᱮ ᱦᱚᱸ ᱩᱱᱠᱤᱱᱨᱮᱱ ᱟᱯᱱᱟᱨ ᱜᱤᱫᱽᱨᱟᱹ ᱞᱮᱠᱟᱠᱤᱱ ᱡᱚᱛᱚᱱ ᱡᱤᱜᱟᱹᱥᱠᱮᱫᱮᱭᱟ᱾ ᱩᱱᱠᱤᱱᱨᱮᱱ ᱠᱳᱲᱟ ᱜᱤᱫᱽᱨᱟᱹ ᱵᱟᱠᱳ ᱛᱟᱦᱮᱸᱠᱟᱱᱛᱮ ᱥᱟᱜᱚᱨᱜᱮ ᱟᱹᱠᱤᱱᱨᱮᱱ ᱠᱳᱲᱟ ᱜᱤᱫᱽᱨᱟᱹ ᱞᱮᱠᱟᱠᱤᱱ ᱫᱩᱞᱟᱹᱲᱠᱮᱫᱮᱭᱟ᱾ ᱟᱨ ᱢᱩᱪᱟᱹᱫᱨᱮ ᱳᱱᱟ ᱳᱲᱟᱜᱨᱮᱱ ᱥᱟᱫᱷᱮᱨ ᱦᱚᱯᱚᱱᱮᱨᱮᱱ ᱡᱟᱶᱟᱸᱭ ᱦᱳᱭᱮᱱᱟ᱾ ᱟᱨ ᱟᱹᱰᱤ ᱨᱟᱹᱥᱠᱟᱹ ᱥᱟᱞᱟᱜ ᱟᱡᱼᱟᱜ ᱜᱷᱟᱨᱚᱧᱡᱽ ᱞᱟᱹᱣᱠᱟᱹ ᱪᱟᱞᱟᱣᱮ ᱮᱦᱚᱵᱼᱮᱱᱟ᱾