ᱵᱟᱦᱟ ᱥᱮᱨᱮᱧ

                                 
                  🌷ᱵᱟᱦᱟ ᱥᱮᱨᱮᱧ🌹

                   

ᱚᱱᱚᱞᱤᱭᱟᱹ,ᱛᱩᱢᱟᱞᱤᱭᱟ-ᱥᱨᱤᱠᱟᱸᱛ ᱴᱩᱰᱩ
ᱢᱟᱨᱮ ᱞᱟᱠᱪᱟᱨ-ᱥᱟᱨᱮᱧ ᱯᱩᱛᱷᱤ


ᱵᱟᱦᱟ ᱥᱮᱨᱮᱧ

᱑) ᱚᱠᱚᱭ ᱢᱮ ᱫᱚᱭ ᱪᱤᱭᱟᱹ ᱞᱮᱫᱟ ᱡᱟ ᱜᱚᱥᱟᱸᱭ
ᱵᱤᱨ ᱫᱤᱥᱚᱢ ᱥᱟᱹᱨᱤ ᱥᱟᱨᱡᱚᱢ ᱡᱟᱦᱮᱨ ᱫᱚ 
ᱚᱠᱚᱭ ᱢᱮ ᱫᱚᱭ ᱪᱤᱭᱟᱹ ᱞᱮᱫᱟ ᱡᱟ ᱜᱚᱥᱟᱸᱭ
ᱟᱹᱛᱩ ᱰᱤᱦᱟᱫ ᱫᱚ?
ᱢᱟᱨᱟᱝ ᱵᱳᱨᱳᱭ ᱪᱤᱭᱟᱹ ᱞᱮᱫᱟ ᱡᱟ ᱜᱚᱥᱟᱸᱭ
ᱵᱤᱨ ᱫᱤᱥᱚᱢ ᱥᱟᱹᱨᱤ ᱥᱟᱨᱡᱚᱢ ᱫᱚ 
ᱡᱟᱦᱮᱨ ᱮᱨᱟᱭ ᱪᱤᱭᱟᱹ ᱞᱮᱫᱟ ᱡᱟ ᱜᱚᱥᱟᱸᱭ
ᱟᱹᱛᱩ ᱵᱟᱭᱥᱤ ᱫᱚ᱾

᱒) ᱦᱮᱥᱟᱜ ᱢᱟ ᱪᱚᱴ ᱨᱮ ᱡᱟ ᱜᱚᱥᱟᱸᱭ
ᱛᱩᱫᱮ ᱫᱚᱭ ᱨᱟᱜᱮ ᱞᱮᱫ
ᱵᱟᱲᱮ ᱢᱟ ᱞᱟᱲᱮ ᱨᱮ ᱡᱟ ᱜᱚᱥᱟᱸᱭ 
ᱜᱩᱛᱨᱩ ᱫᱚᱭ ᱥᱟᱦᱮᱫ ᱞᱮᱫ
ᱫᱤᱥᱚᱢ ᱪᱚᱝ ᱟᱹᱪᱩᱨ ᱮᱱ ᱡᱟ ᱜᱚᱥᱟᱸᱭ 
ᱛᱩᱫᱮ ᱫᱚᱭ ᱨᱟᱜᱮ ᱞᱮᱫ
ᱫᱤᱥᱚᱢ ᱪᱚᱝ ᱵᱤᱦᱩᱨᱮᱱ ᱡᱟ ᱜᱚᱥᱟᱸᱭ
ᱜᱩᱛᱨᱟᱭ ᱫᱚᱭ ᱥᱟᱦᱮᱫ ᱞᱮᱫ᱾

᱓)ᱚᱠᱚᱭ ᱨᱮᱱ ᱯᱩᱬ ᱥᱟᱫᱚᱢ ᱡᱟ ᱜᱚᱥᱟᱸᱭ
ᱛᱟᱞᱟ ᱱᱟᱹᱭ ᱠᱟᱥᱟᱭᱨᱮ 
ᱚᱠᱚᱭ ᱨᱮᱱ ᱠᱟᱯᱤᱞ ᱜᱟᱹᱭ ᱡᱟ ᱜᱚᱥᱟᱸᱭ
ᱟᱨᱩᱱ ᱵᱤᱨ ᱛᱟᱞᱟ ᱨᱮ?
ᱢᱟᱨᱟᱝ ᱵᱩᱨᱩ ᱨᱮᱱ ᱯᱩᱬ ᱥᱟᱫᱚᱢ ᱡᱟ ᱜᱚᱥᱟᱸᱭ
ᱛᱟᱞᱟ ᱱᱟᱹᱭ ᱠᱟᱥᱟᱭᱨᱮ
ᱡᱟᱦᱮᱨ ᱮᱨᱟ ᱨᱮᱱ ᱠᱟᱯᱤᱞ ᱜᱟᱹᱭ ᱡᱟ ᱜᱚᱥᱟᱸᱭ
ᱟᱨᱩᱱ ᱵᱤᱨ ᱛᱟᱞᱟ ᱨᱮ᱾

᱔) ᱚᱠᱚᱭ ᱢᱮ ᱫᱚᱭ ᱪᱤᱭᱟ ᱞᱮᱫᱟ ᱡᱟ ᱜᱚᱥᱟᱸᱭ
ᱥᱟᱹᱨᱤ ᱥᱟᱨᱡᱚᱢ ᱫᱚ
ᱚᱠᱚᱭ ᱢᱮ ᱫᱚᱭ ᱪᱤᱭᱟ ᱞᱮᱫᱟ ᱡᱟ ᱜᱚᱥᱟᱸᱭ
ᱠᱷᱟᱫᱮ ᱢᱟᱛᱠᱚᱢ ᱫᱚ?
ᱢᱚᱬᱮ ᱠᱚᱠᱚ ᱪᱤᱭᱟ ᱞᱮᱫᱟ ᱡᱟ ᱜᱚᱥᱟᱸᱭ
ᱥᱟᱹᱨᱤ ᱥᱟᱨᱡᱚᱢ ᱫᱚ
ᱛᱤᱨᱩᱭ ᱠᱚᱠᱚ ᱪᱤᱭᱟ ᱞᱮᱫᱟ ᱡᱟ ᱜᱚᱥᱟᱸᱭ
ᱠᱷᱟᱫᱮ ᱢᱟᱛᱠᱚᱢ ᱫᱚ᱾

᱕) ᱚᱠᱚᱭ ᱠᱚᱠᱚ ᱫᱩᱠᱟᱹᱱ ᱡᱟ ᱜᱚᱥᱟᱸᱭ
ᱥᱤᱝ ᱵᱤᱨ ᱟᱮᱸᱫᱨᱟ ᱫᱚ
ᱚᱠᱚᱭ ᱠᱚᱠᱚ ᱫᱩᱠᱟᱹᱱ ᱟ
ᱢᱟᱱ ᱵᱤᱨ ᱟᱮᱸᱫᱨᱟ ᱫᱚ
ᱢᱚᱬᱮ ᱠᱚᱠᱚ ᱫᱩᱠᱟᱹᱱ ᱟ ᱡᱟ ᱜᱚᱥᱟᱸᱭ
ᱥᱤᱝ ᱵᱤᱨ ᱟᱮᱸᱫᱨᱟ ᱫᱚ ᱛᱩᱨᱩᱭ ᱠᱚᱠᱚ ᱫᱩᱠᱟᱹᱱ ᱟ ᱡᱟ ᱜᱚᱥᱟᱸᱭ
ᱢᱟᱱ ᱵᱤᱨ ᱥᱮᱸᱫᱨᱟ ᱫᱚ᱾

᱖)ᱢᱩᱡ ᱠᱚᱫᱚ ᱢᱩᱡ ᱠᱚᱫᱚ ᱫᱚᱜᱚᱭ ᱫᱚᱜᱚᱭᱚᱭ
ᱰᱟᱦᱟᱨ ᱫᱷᱟᱨᱮ ᱵᱟᱲᱮ ᱨᱮ ᱠᱚ  ᱫᱚᱜᱚᱭᱚᱜ᱾
᱗)ᱥᱟᱠᱲᱟ ᱨᱮ ᱥᱟᱠᱲᱟ ᱨᱮ ᱦᱟᱴ ᱵᱟᱦᱟ ᱟᱠᱟᱱ ᱫᱟᱹᱭᱱᱟ
ᱥᱤᱫ ᱟᱞᱟᱝ ᱜᱚᱪᱷᱟ ᱟᱞᱟᱝ ᱫᱟᱹᱭᱱᱟ
ᱜᱟᱞᱟᱝ ᱟᱞᱟᱝ ᱢᱟᱞᱟ ᱟᱞᱟᱝ ᱫᱟᱹᱭᱱᱟ
ᱵᱟᱦᱟ ᱟᱞᱟᱝ ᱫᱟᱞᱟᱭ ᱫᱟᱞᱟᱭ᱾

᱘) ᱚᱠᱚᱭ ᱢᱮ ᱫᱚᱭ ᱪᱤᱭᱟ ᱞᱮᱫᱟ ᱡᱟ ᱜᱚᱥᱟᱸᱭ
ᱵᱩᱨᱩ ᱥᱟᱨᱡᱚᱢ ᱫᱚ
ᱚᱠᱚᱭ ᱢᱮ ᱫᱚᱭ ᱪᱤᱭᱟ ᱞᱮᱫᱟ ᱡᱟ ᱜᱚᱥᱟᱸᱭ
ᱦᱟᱨᱟᱨᱮ ᱢᱟᱛᱠᱚᱢ ᱫᱚ?
ᱢᱚᱬᱮ ᱠᱚᱠᱚ ᱪᱤᱭᱟ ᱞᱮᱫᱟ ᱡᱟ ᱜᱚᱥᱟᱸᱭ
ᱵᱩᱨᱩ ᱥᱟᱨᱡᱚᱢ ᱫᱚ
ᱛᱩᱨᱩᱭ ᱠᱚᱠᱚ ᱪᱤᱭᱟ ᱞᱮᱫᱟ ᱡᱟ ᱜᱚᱥᱟᱸᱭ
ᱦᱟᱨᱟᱨᱮ ᱢᱟᱛᱠᱚᱢ ᱫᱚ᱾

᱙)ᱡᱟ ᱜᱚᱥᱟᱸᱭ ᱥᱮᱨᱢᱟ ᱦᱩᱰᱩᱨᱮ
ᱡᱟ ᱜᱚᱥᱟᱸᱭ ᱫᱟᱜ ᱫᱚ ᱡᱷᱚᱢᱚᱨᱮ ᱡᱷᱚᱢᱚᱨᱮ
ᱡᱟ ᱜᱚᱥᱟᱸᱭ ᱦᱚᱭ ᱫᱟᱜ ᱫᱚ ᱦᱟᱞᱟᱭ ᱦᱟᱞᱟᱭ᱾

᱑᱐) ᱪᱮᱛᱮ ᱛᱮᱯᱮ ᱩᱢᱟᱠᱟᱱ ᱦᱚ ᱪᱷᱤᱛᱚ
ᱪᱮᱛᱮ ᱛᱮᱯᱮ ᱱᱟᱹᱭ ᱟᱠᱟᱱ
ᱪᱮᱛᱮ ᱛᱮᱯᱮ ᱜᱮᱡ ᱜᱩᱨᱤᱡ ᱦᱚ ᱪᱷᱤᱛᱚ
ᱪᱮᱛᱮ ᱛᱮᱯᱮ ᱱᱟᱹᱭ ᱟᱠᱟᱱ
ᱛᱚᱣᱟ ᱛᱮᱯᱮ ᱩᱢ ᱟᱠᱟᱱ ᱦᱚ ᱪᱷᱤᱛᱚ
ᱫᱟᱦᱮ ᱛᱮᱯᱮ ᱩᱢ ᱱᱟᱹᱭ ᱟᱠᱟᱱ
ᱠᱟᱹᱨᱤ ᱜᱟᱹᱭ ᱜᱩᱨᱤᱡ ᱛᱮ ᱫᱚ ᱦᱚ ᱪᱷᱤᱛᱚ
ᱯᱮ
ᱜᱮᱡ ᱜᱩᱨᱤᱡ᱾

᱑᱑)ᱡᱚᱦᱟᱨ ᱡᱚᱦᱟᱨ ᱢᱟᱨᱟᱝ ᱵᱩᱨᱩ
ᱡᱚᱦᱟᱨ ᱡᱟᱦᱮᱨ ᱟᱭᱚ
ᱟᱞᱮ ᱨᱮᱭᱟᱜ ᱡᱚᱦᱟᱨ ᱱᱮᱦᱚᱨ ᱟᱛᱟᱝ ᱛᱟᱞᱮ ᱵᱤᱱ
ᱟᱞᱮ ᱫᱚᱞᱮ ᱦᱩᱰᱤᱝ ᱜᱮᱭᱟ
ᱵᱟᱞᱮ ᱵᱟᱰᱟᱭ ᱵᱩᱜᱤ ᱵᱟᱹᱲᱤᱡ
ᱵᱩᱜᱤ ᱵᱟᱹᱲᱤᱡ ᱫᱚ ᱪᱟᱸᱫᱚ ᱤᱠᱟ ᱠᱟᱞᱮᱵᱤᱱ
ᱫᱷᱤ ᱫᱟᱲᱮ ᱮᱢᱟ ᱞᱮ ᱵᱤᱱ
ᱵᱩᱨᱥᱷᱤ ᱫᱟᱲᱮ ᱮᱢᱟ ᱞᱮ ᱵᱤᱱ 
ᱟᱵᱤᱱ ᱦᱤᱨᱞᱟ ᱨᱮ ᱜᱮ ᱪᱟᱸᱫᱚ ᱫᱚᱦᱚ ᱠᱟᱞᱮ ᱵᱤᱱ
ᱫᱷᱚᱱ ᱫᱚᱨᱤᱵ ᱵᱟᱞᱮ ᱠᱷᱚᱡᱟ
ᱴᱟᱠᱟ ᱯᱩᱭᱥᱟᱹ ᱵᱟᱞᱮ ᱠᱷᱚᱡᱟ
ᱫᱤᱥ ᱦᱩᱫᱤᱥ ᱵᱩᱨᱫᱷᱤ ᱜᱮᱭᱟᱱ ᱟᱞᱮ  ᱫᱚᱞᱮ ᱠᱷᱚᱡᱟ᱾







ᱥᱟᱯᱲᱟᱣ - ᱵᱤᱡᱮᱱᱫᱨᱟ ᱦᱟᱺᱥᱫᱟ
                   Bijendra Hansda
                   bijendrahansda79@gmail.com
                   hansdabijendra05@gmail.com