ᱦᱚᱲ ᱦᱚᱯᱚᱱᱠᱳᱣᱟᱜ ᱠᱩᱠᱢᱩ ᱨᱮᱭᱟᱜ ᱫᱤᱥᱟᱹᱢ
 |
| ᱥᱟᱱᱛᱟᱞ ᱦᱩᱞ ᱓᱐ ᱡᱩᱱ |
ᱟᱹᱰᱤ ᱫᱤᱱ ᱠᱷᱳᱱᱜᱮ ᱦᱚᱲ ᱦᱚᱯᱚᱱᱟᱜ ᱢᱚᱱᱨᱮ, ᱥᱟᱱᱟᱢ ᱡᱟᱭᱜᱟᱨᱮ ᱱᱚᱝᱠᱟᱱ ᱟᱥ ᱵᱷᱚᱨᱥᱟ ᱛᱟᱦᱮᱸᱠᱟᱱᱛᱟᱠᱳᱣᱟ, ᱚᱱᱮ ᱚᱠᱟᱨᱮ ᱳᱱᱠᱳ ᱫᱚ ᱥᱩᱠ ᱟᱨ ᱨᱟᱹᱥᱠᱟᱹ ᱡᱟᱭᱜᱟᱨᱮᱠᱳ ᱛᱟᱦᱮᱸᱱ ᱟᱨ ᱥᱟᱹᱫᱷᱤᱱ ᱞᱮᱠᱟᱛᱮ ᱠᱷᱟᱴᱟᱣᱠᱟᱛᱮ ᱡᱤᱱᱜᱤᱠᱳ ᱠᱷᱮᱢᱟᱣ᱾ ᱱᱳᱣᱟ ᱠᱟᱱᱜᱮᱭᱟ ᱦᱚᱲ ᱦᱚᱯᱚᱱᱟᱜ ᱛᱟᱭᱚᱢ ᱫᱟᱨᱟᱢ ᱡᱤᱱᱜᱤ ᱨᱮᱭᱟᱜ ᱦᱩᱫᱤᱥ ᱪᱤᱱᱛᱟᱹᱣᱟᱠᱟᱱ ᱫᱤᱥᱟᱹᱢ ᱫᱚ᱾ ᱢᱮᱱᱠᱷᱟᱱ ᱳᱝᱠᱟᱱ ᱡᱟᱭᱜᱟ ᱫᱚ ᱛᱤᱥᱨᱮ ᱦᱚᱸ ᱵᱟᱠᱳ ᱧᱟᱢᱫᱟᱲᱮᱭᱟᱫᱟ᱾ ᱢᱩᱪᱟᱹᱫᱨᱮ ᱦᱚᱲ ᱦᱚᱯᱚᱱᱠᱳᱣᱟᱜ ᱟᱥᱚᱞ ᱫᱤᱥᱟᱹᱢ ᱦᱳᱭᱮᱱᱟ ᱥᱟᱱᱛᱟᱞ ᱯᱟᱨᱜᱟᱱᱟ, ᱟᱨ ᱰᱩᱢᱠᱟᱹ ᱫᱚ ᱦᱳᱭᱳᱜᱠᱟᱱᱟ ᱦᱚᱲ ᱦᱚᱯᱚᱱᱠᱳᱣᱟᱜ ᱟᱥᱚᱞ ᱱᱟᱜᱽᱨᱟᱦᱟ ᱥᱮ ᱨᱟᱡᱽᱫᱷᱟᱱᱤ ᱵᱳᱱ ᱢᱮᱱᱠᱮᱭᱟ᱾ ᱟᱫᱚ ᱥᱮᱥ ᱦᱟᱹᱵᱤᱡᱜᱮ ᱰᱩᱢᱠᱟᱹ ᱫᱚ ᱟᱥᱚᱞ ᱛᱟᱦᱮᱸᱱ ᱡᱟᱭᱜᱟ ᱢᱮᱱᱛᱮ ᱦᱟᱯᱲᱟᱢᱠᱳ ᱫᱳᱠᱳ ᱱᱤᱨᱤᱠ ᱩᱨᱤᱡ ᱩᱛᱟᱹᱨᱠᱮᱫᱟ, ᱚᱱᱮ ᱚᱠᱟᱨᱮ ᱦᱚᱲ ᱦᱚᱯᱚᱱᱠᱳ ᱛᱷᱟᱢᱜᱟᱹᱰᱤᱜ ᱨᱮᱭᱟᱜ ᱴᱷᱟᱺᱭᱠᱳ ᱟᱴᱠᱟᱨᱠᱮᱫᱛᱮ ᱥᱮᱥ ᱦᱟᱹᱵᱤᱡᱜᱮᱠᱳ ᱛᱟᱦᱮᱸᱭᱮᱱᱟ᱾ ᱪᱷᱚᱴᱚᱱᱟᱜᱽᱯᱩᱨ ᱫᱚ ᱦᱳᱭᱳᱜᱠᱟᱱᱟ ᱤᱱᱰᱤᱭᱟ ᱫᱤᱥᱟᱹᱢ ᱨᱮᱭᱟᱜ ᱢᱤᱫᱴᱮᱱ ᱤᱞᱟᱹᱠᱟ᱾ ᱚᱱᱟ ᱫᱚ ᱵᱤᱦᱟᱨ ᱨᱮᱭᱟᱜ ᱵᱟᱝ ᱵᱮᱜᱟᱨᱳᱜ ᱧᱛᱩᱢᱠᱟᱱᱟ᱾ ᱵᱤᱦᱟᱨ ᱫᱚ ᱦᱳᱭᱳᱜᱠᱟᱱᱟ ᱟᱭᱢᱟ ᱟᱹᱫᱤᱵᱟᱹᱥᱤᱠᱳᱣᱟᱜ ᱴᱷᱟᱺᱭ᱾ ᱚᱱᱮ ᱚᱱᱟ ᱡᱟᱭᱜᱟᱨᱮ ᱥᱟᱱᱛᱟᱞ, ᱢᱩᱱᱰᱟᱹ, ᱩᱨᱟᱹᱶ ᱟᱨ ᱯᱟᱦᱟᱲᱤᱭᱟᱠᱳ ᱢᱮᱱᱟᱜᱠᱳᱣᱟ᱾ ᱑᱘᱓᱓ ᱥᱟᱞᱨᱮ ᱥᱟᱨᱠᱟᱨ ᱫᱚ ᱟᱹᱫᱤᱵᱟᱹᱥᱤᱠᱳ ᱛᱟᱦᱮᱸᱱ ᱞᱟᱹᱜᱤᱫᱛᱮ ᱢᱤᱫᱴᱮᱱ ᱡᱟᱭᱜᱟᱭ ᱴᱷᱤᱠᱠᱮᱫᱟ, ᱚᱱᱮ ᱚᱱᱟ ᱨᱮᱭᱟᱜ ᱱᱟᱹᱢᱩᱱᱟ ᱫᱳ ᱫᱟᱢᱤᱱᱤᱼᱠᱳᱦ᱾ ᱮᱴᱟᱜ ᱮᱴᱟᱜ ᱡᱟᱭᱜᱟ ᱠᱷᱳᱱ ᱦᱚᱲ ᱦᱮᱡᱠᱟᱛᱮ ᱦᱚᱲ ᱦᱚᱯᱚᱱᱠᱳ ᱚᱱᱟ ᱡᱟᱭᱜᱟᱨᱮ ᱛᱟᱦᱮᱸᱱ ᱞᱟᱹᱜᱤᱫᱠᱳ ᱛᱷᱟᱢᱜᱟᱹᱰᱤᱭᱮᱱᱟ᱾
ᱦᱚᱲ ᱦᱚᱯᱚᱱ ᱪᱮᱛᱟᱱᱨᱮ ᱮᱦᱳᱵᱮᱱᱟ ᱠᱚᱪᱞᱚᱱ᱾
ᱱᱤᱛ ᱦᱟᱹᱵᱤᱡᱛᱮ ᱦᱚᱲ ᱦᱚᱯᱚᱱᱟᱜ ᱤᱛᱤᱦᱟᱥ ᱫᱚ ᱦᱳᱭᱳᱜᱠᱟᱱᱟ ᱫᱟᱹᱲ ᱟᱨ ᱧᱤᱨ ᱵᱟᱲᱟᱭ ᱨᱮᱭᱟᱜ ᱤᱛᱤᱦᱟᱥᱜᱮ; ᱠᱟᱞᱟᱝ ᱰᱳᱞᱟᱝ ᱱᱤᱸᱨ ᱟᱨ ᱫᱟᱹᱲ ᱵᱟᱲᱟᱭᱛᱮᱜᱮ ᱡᱤᱱᱜᱤ ᱨᱮᱭᱟᱜ ᱰᱷᱮᱨ ᱫᱤᱱᱠᱳ ᱠᱷᱮᱢᱟᱣᱟᱠᱟᱫᱟ᱾ ᱦᱚᱲ ᱦᱚᱯᱚᱱᱟᱜ ᱢᱟᱱ ᱢᱟᱱᱚᱛ ᱟᱨ ᱡᱟᱹᱛ ᱨᱮᱭᱟᱜ ᱟᱹᱱ ᱟᱹᱨᱤ ᱴᱷᱤᱠᱛᱮ ᱨᱚᱠᱟᱣ ᱞᱟᱹᱜᱤᱫᱛᱮᱜᱮ ᱯᱟᱥᱮᱡ ᱟᱹᱜᱤᱞ ᱦᱟᱯᱲᱟᱢᱠᱳᱠᱳ ᱫᱟᱹᱲ ᱟᱨ ᱧᱤᱨ ᱯᱷᱟᱨᱟᱠᱞᱮᱱᱟ᱾ ᱵᱤᱨ ᱯᱟᱠᱟᱲᱠᱳ ᱛᱟᱦᱮᱸᱠᱟᱱᱛᱮ ᱟᱵᱳᱣᱟᱜ ᱵᱟᱧᱪᱟᱣ ᱫᱚ ᱦᱳᱭ ᱦᱮᱡᱮᱱᱟ, ᱟᱨ ᱵᱤᱨ ᱜᱟᱡᱟᱲ ᱥᱟᱯᱷᱟᱠᱟᱛᱮ ᱡᱩᱢᱤᱠᱳ ᱵᱮᱱᱟᱣᱮ̠ᱫᱠᱟᱱ ᱛᱟᱦᱮᱸᱠᱟᱱᱟ᱾ ᱢᱮᱱᱠᱷᱟᱱ ᱥᱮᱥᱨᱮ ᱢᱟᱦᱟᱡᱚᱱ ᱫᱚ ᱯᱩᱞᱤᱥᱟᱱᱛᱮ ᱦᱮᱡᱠᱟᱛᱮ ᱞᱟᱜᱟ ᱚᱪᱚᱜᱠᱳ ᱨᱮᱭᱟᱜ ᱯᱚᱱᱛᱷᱟᱠᱳ ᱞᱟᱜᱟᱣᱠᱮᱫᱟ᱾ ᱢᱟᱦᱟᱡᱚᱱ ᱟᱨ ᱡᱩᱢᱤᱫᱟᱨᱠᱳ ᱯᱟᱹᱦᱤᱞᱨᱮ ᱜᱟᱭᱞᱟ ᱢᱟᱪᱷᱟᱛᱮᱜᱮᱠᱳ ᱦᱩᱠᱩᱢᱟᱫᱠᱳᱣᱟ ᱡᱮ, ᱢᱟ ᱵᱤᱨ ᱯᱟᱠᱟᱲ ᱥᱟᱯᱷᱟᱡᱚᱝᱯᱮ᱾ ᱥᱟᱯᱷᱟᱠᱮᱫᱠᱷᱟᱱ ᱢᱟ ᱢᱟᱦᱟᱡᱚᱱ ᱡᱩᱢᱤᱫᱟᱨ ᱯᱩᱞᱤᱥ ᱱᱤᱟᱹᱛᱮ ᱦᱚᱲ ᱦᱚᱯᱚᱱᱠᱳ ᱞᱟᱜᱟ ᱜᱤᱰᱤ ᱨᱮᱭᱟᱜ ᱢᱚᱱᱥᱩᱵᱟᱹ ᱡᱟᱱᱟᱢᱟᱫᱠᱳᱣᱟ᱾ ᱯᱟᱹᱦᱤᱞ ᱫᱚ ᱱᱚᱝᱠᱟᱠᱳ ᱢᱮᱱᱠᱮᱫᱟᱼ “ᱡᱩᱢᱤ ᱫᱚ ᱟᱯᱮᱭᱟᱜ ᱫᱚ ᱵᱟᱝᱠᱟᱱᱟ, ᱱᱳᱣᱟ ᱨᱮᱭᱟᱜ ᱡᱟᱦᱟᱱ ᱯᱨᱚᱢᱟᱱ ᱥᱮ ᱫᱩᱞᱤᱞ ᱫᱚ ᱵᱟᱹᱱᱩᱜᱛᱟᱯᱮᱭᱟ, ᱵᱚᱨᱚᱝ ᱱᱚᱱᱰᱮ ᱠᱷᱚᱱ ᱚᱪᱚᱜᱠᱟᱛᱮ ᱮᱴᱟᱜᱨᱮ ᱡᱩᱢᱤᱡᱚᱝᱯᱮ᱾” ᱱᱳᱣᱟ ᱫᱷᱟᱨᱟᱛᱮ ᱟᱭᱢᱟ ᱠᱷᱮᱫᱽ ᱟᱨ ᱥᱟᱱᱛᱟᱣ ᱛᱟᱦᱮᱸᱠᱟᱱᱟ᱾ ᱱᱳᱣᱟ ᱵᱤᱨ ᱯᱟᱠᱟᱲ ᱥᱟᱯᱷᱟᱭ ᱞᱟᱹᱜᱤᱫᱛᱮ ᱡᱚᱢ ᱧᱩ ᱨᱮᱭᱟᱜ ᱡᱟᱹᱨᱩᱲ ᱛᱟᱦᱮᱸᱠᱟᱱᱟ, ᱢᱮᱱᱠᱷᱟ ᱚᱱᱟᱠᱳ ᱡᱚᱢ ᱧᱩ, ᱴᱟᱠᱟ ᱯᱟᱭᱥᱟ ᱢᱟᱦᱟᱡᱚᱱ ᱥᱮ ᱡᱩᱢᱤᱫᱟᱨ ᱴᱷᱮᱱ ᱠᱷᱚᱱ ᱟᱹᱜᱩᱠᱟᱛᱮᱠᱳ ᱟᱹᱥᱩᱞᱳᱜᱠᱟᱱ ᱛᱟᱦᱮᱸᱠᱟᱱᱟ᱾ ᱨᱩᱟᱹᱲ ᱮᱢᱚᱜ ᱨᱮᱭᱟᱜ ᱡᱟᱦᱟᱱ ᱩᱯᱟᱹᱭ ᱵᱟᱝ ᱛᱟᱦᱮᱸᱠᱟᱱᱛᱟᱠᱳᱣᱟ᱾ ᱡᱩᱫᱤᱨᱮᱦᱚᱸ ᱮᱢᱚᱜᱚᱜ ᱠᱷᱟᱱ ᱫᱚᱵᱽᱲᱟ ᱥᱩᱫᱽ ᱥᱟᱞᱟᱜ ᱮᱢᱚᱜ ᱦᱳᱭᱳᱜᱠᱟᱱ ᱛᱟᱦᱮᱸᱠᱟᱱᱟ᱾ ᱟᱨ ᱵᱟᱝ ᱥᱚᱫᱽᱞᱮᱱᱠᱷᱟᱱ ᱳᱱᱠᱳ ᱜᱩᱞᱟᱹᱢ ᱞᱮᱠᱟ ᱢᱟᱦᱟᱡᱚᱱ ᱥᱮ ᱡᱩᱢᱤᱫᱟᱨ ᱠᱳᱣᱟᱜ ᱠᱷᱮᱛᱨᱮ ᱠᱷᱟᱴᱟᱣᱠᱟᱛᱮᱠᱳ ᱥᱚᱫᱳᱪᱳᱭᱫᱠᱳᱠᱟᱱ ᱛᱟᱦᱮᱸᱠᱟᱱᱟ᱾ ᱟᱨ ᱚᱱᱟᱠᱳ ᱠᱚᱪᱞᱚᱱ ᱫᱚ ᱦᱳᱭᱞᱮᱱᱟ ᱑᱖᱒ ᱥᱮᱨᱢᱟ ᱞᱟᱦᱟᱨᱮ, ᱱᱤᱛ ᱦᱳᱸ ᱯᱟᱥᱮᱡ ᱟᱫᱚᱢ ᱟᱫᱚᱢ ᱡᱟᱭᱜᱟᱨᱮ ᱫᱚ ᱱᱚᱝᱠᱟᱱᱟᱜ ᱠᱚᱪᱞᱚᱱ ᱪᱟᱞᱟᱜᱠᱟᱱᱜᱮᱭᱟ᱾ ᱢᱟᱦᱟᱡᱚᱱᱠᱳᱣᱟᱜ ᱨᱤᱱ ᱠᱷᱚᱱ ᱵᱟᱧᱪᱟᱣᱜ ᱞᱟᱹᱜᱤᱫᱛᱮ ᱟᱹᱰᱤ ᱟᱭᱢᱟ ᱦᱚᱲᱠᱳ ᱫᱟᱹᱲᱠᱮᱫᱟ᱾ ᱚᱠᱚᱭᱠᱳ ᱫᱚ ᱱᱟᱣᱟ ᱨᱟᱴᱮᱱ ᱜᱟᱡᱟᱲ ᱵᱤᱨᱛᱮ, ᱚᱠᱚᱭᱠᱳ ᱫᱚ ᱳᱠᱟᱥᱮᱡ ᱪᱚᱝ᱾ ᱟᱨ ᱟᱫᱚᱢᱠᱳ ᱫᱚ ᱱᱳᱣᱟ ᱵᱟᱝᱞᱟᱫᱮᱥᱛᱮᱠᱳ ᱦᱮᱪ ᱯᱟᱨᱚᱢᱮᱱᱟ, ᱟᱨ ᱱᱤᱛ ᱦᱟᱹᱵᱤᱡ ᱦᱚᱸ ᱡᱟᱱᱟᱢ ᱫᱤᱥᱟᱹᱢᱛᱮ ᱵᱟᱠᱳ ᱦᱮᱡ ᱨᱩᱟᱹᱲ ᱫᱟᱲᱮᱭᱟᱫᱟ᱾ ᱱᱚᱱᱰᱮ ᱫᱚ ᱮᱠᱮᱱ ᱠᱟᱹᱢᱤ ᱱᱟᱞᱦᱟᱠᱳ ᱦᱮᱡᱞᱮᱱᱟ, ᱟᱨ ᱥᱮᱥᱟᱱᱨᱮ ᱫᱳᱠᱳ ᱛᱟᱦᱮᱸ ᱩᱛᱟᱹᱨᱮᱱᱟ᱾ ᱚᱠᱚᱭᱠᱳ ᱫᱚ ᱥᱟᱨᱠᱟᱨ ᱥᱮ ᱤᱧᱡᱤᱱᱤᱭᱟᱨ ᱥᱟᱦᱮᱵᱟᱜ ᱥᱚᱲᱚᱠ ᱵᱮᱱᱟᱣ, ᱟᱨ ᱚᱠᱚᱭᱠᱳ ᱫᱚ ᱠᱚᱱᱴᱨᱟᱠᱛᱚᱨ ᱨᱮᱞ ᱞᱟᱭᱱ ᱠᱟᱹᱢᱤᱨᱮᱠᱳ ᱞᱟᱹᱜᱤᱟᱹ ᱯᱟᱲᱟᱣᱮᱱᱟ᱾ ᱦᱚᱲ ᱦᱚᱯᱚᱱᱠᱳ ᱟᱹᱰᱤ ᱢᱟᱹᱦᱤᱨ ᱟᱨ ᱥᱟᱹᱵᱩᱫᱽᱜᱮᱠᱳ ᱟᱹᱭᱠᱟᱹᱣᱠᱮᱫᱠᱳ ᱠᱷᱟᱱ ᱳᱝᱠᱳᱜᱮ ᱚᱱᱟᱠᱳ ᱠᱟᱹᱢᱤᱨᱮ ᱟᱹᱰᱤ ᱠᱚᱢ ᱯᱟᱭᱥᱟᱛᱮᱠᱳ ᱠᱷᱟᱴᱟᱣᱮᱫᱠᱳᱠᱟᱱ ᱛᱟᱦᱮᱸᱠᱟᱱᱟ᱾
ᱥᱤᱫᱷᱚ, ᱠᱟᱹᱱᱦᱩ, ᱪᱟᱱᱫᱽ ᱟᱨ ᱵᱷᱟᱭᱨᱚ ᱛᱟᱠᱳᱣᱟᱜ ᱧᱮᱞᱟᱜ ᱫᱚᱨᱥᱚᱱ:
ᱥᱚᱢᱟᱡᱽᱨᱮ ᱟᱹᱰᱤ ᱞᱮᱠᱟᱱ ᱠᱚᱪᱞᱚᱱ ᱧᱮᱞᱛᱮ ᱯᱳᱱᱮᱭᱟ ᱵᱤᱨᱵᱟᱱᱴᱟ ᱦᱚᱲ ᱢᱮᱛᱟᱜᱢᱮ ᱥᱤᱫᱷᱚ (ᱥᱤᱫᱷᱩ), ᱠᱟᱹᱱᱦᱩ, ᱪᱟᱱᱫᱽ ᱟᱨ ᱵᱷᱟᱭᱨᱚ ᱛᱮᱠᱳ ᱵᱟᱝᱢᱟ ᱱᱳᱣᱟᱠᱳ ᱫᱚᱨᱥᱚᱱᱠᱳ ᱧᱮᱞᱠᱮᱫᱟᱼ
᱑. ᱥᱟᱭᱛᱟᱱᱟᱜ (ᱵᱳᱝᱜᱟ) ᱢᱩᱴᱷᱟᱹᱱᱠᱳ ᱧᱮᱞᱠᱮᱫᱟ᱾ ᱱᱳᱣᱟ ᱧᱮᱞᱛᱮ ᱥᱮᱫᱟᱭ ᱨᱮᱭᱟᱜ ᱪᱮᱛᱚᱱ ᱦᱮᱡᱼᱟᱫᱠᱳᱣᱟ ᱡᱮ, ᱯᱟᱥᱮᱡ ᱥᱮᱫᱟᱭ ᱞᱮᱠᱟᱜᱮ ᱵᱳᱝᱜᱟ ᱜᱚᱵᱚᱞᱨᱮ ᱯᱟᱲᱟᱣᱠᱟᱛᱮ ᱱᱤᱡᱽ ᱫᱷᱚᱨᱢᱚ ᱠᱚᱨᱢᱚ ᱟᱫᱠᱟᱛᱮ ᱟᱵᱳᱣᱟᱜ ᱡᱤᱱᱜᱤ ᱵᱟᱹᱲᱤᱡᱚᱜ ᱟᱨ ᱯᱟᱥᱮᱡ ᱥᱮᱥᱨᱮ ᱢᱟᱹᱨᱠᱷᱩᱵᱳᱱ ᱢᱟᱨᱟᱣ ᱪᱟᱵᱟᱜ᱾
᱒. ᱴᱷᱟᱹᱠᱩᱨ ᱡᱤᱣᱟᱜ ᱢᱩᱴᱷᱟᱹᱱ (ᱥᱮᱝᱜᱮᱞ ᱢᱩᱴᱷᱟᱹᱱᱜᱮ)᱾ ᱴᱷᱟᱹᱠᱩᱨ ᱡᱤᱣ (ᱤᱥᱚᱨ) ᱯᱟᱥᱮᱡ ᱢᱟᱨᱟᱝᱟᱜ ᱱᱟᱣᱟ ᱠᱟᱹᱢᱤ ᱞᱟᱹᱜᱤᱫᱛᱮᱭ ᱦᱩᱠᱩᱢᱮᱫᱠᱟᱱ ᱚᱱᱮ ᱚᱱᱟᱨᱮ ᱡᱚᱛᱚᱠᱳ ᱨᱩᱠᱷᱤᱭᱟᱹᱜ ᱨᱮᱭᱟᱜ ᱥᱟᱨᱵᱷᱟᱨᱟᱣᱮ ᱮᱢᱮᱫ ᱢᱮᱱᱛᱮᱭᱮ ᱦᱚᱦᱚᱭᱮᱫᱠᱟᱱ᱾
᱓. ᱢᱟᱱᱫᱷᱚᱥᱤᱧᱟᱜ ᱵᱚᱦᱚᱜ ᱨᱮᱭᱟᱜ ᱢᱩᱴᱷᱟᱹᱱ, ᱚᱱᱮ ᱚᱱᱟ ᱨᱮᱭᱟᱜ ᱪᱤᱱᱦᱟᱹ ᱫᱚ ᱦᱳᱭᱳᱜᱠᱟᱱ ᱥᱮᱫᱟᱭ ᱩᱱᱤ ᱦᱚᱛᱮᱛᱮᱜᱮ ᱵᱤᱰᱨᱟᱹᱣ ᱦᱳᱭᱞᱮᱱ᱾ ᱯᱟᱥᱮᱡ ᱱᱤᱛ ᱨᱮᱦᱳᱸ ᱵᱤᱰᱨᱟᱹᱣᱠᱟᱛᱮ ᱜᱩᱡᱽᱨᱟᱹᱱᱮ ᱩᱲᱟᱹᱣᱛᱟᱵᱳᱱ?
᱔. ᱥᱤᱧ ᱪᱟᱱᱫᱳ ᱨᱮᱭᱟᱜ ᱢᱩᱴᱷᱟᱹᱱ, ᱥᱤᱧ ᱪᱟᱱᱫᱳ ᱟᱨ ᱫᱚ ᱢᱟᱨᱥᱟᱞ ᱵᱟᱭ ᱮᱢᱚᱜᱚᱜᱠᱟᱱᱟ᱾ ᱵᱟᱹᱭ ᱵᱟᱹᱭᱛᱮᱭᱮ ᱧᱩᱛᱩᱜᱚᱜᱠᱟᱱᱟ᱾ ᱱᱳᱣᱟ ᱨᱮᱭᱟᱜ ᱢᱟᱱᱮ ᱫᱚ ᱦᱳᱭᱳᱜᱠᱟᱱᱟ: ᱫᱷᱟᱹᱨᱛᱤ ᱫᱚ ᱢᱟᱨᱥᱟᱞ ᱨᱮᱭᱟᱜ ᱰᱟᱦᱟᱨᱨᱮ ᱵᱟᱹᱱᱩᱜᱼᱟ᱾ ᱟᱨ ᱱᱤᱛ ᱵᱮᱜᱚᱨ ᱵᱤᱞᱚᱢᱛᱮ ᱡᱟᱦᱟᱸᱱᱟᱜ ᱵᱟᱝ ᱡᱟᱦᱟᱸᱱᱟᱜ ᱠᱟᱹᱢᱤ ᱦᱳᱭᱳᱜᱜᱮᱛᱟᱵᱳᱱᱟ᱾
᱕. ᱮᱠᱮᱱ ᱢᱤᱫᱴᱮᱱ ᱥᱟᱨᱡᱚᱢ ᱫᱟᱨᱮ᱾ ᱱᱳᱣᱟ ᱨᱮᱭᱟᱜ ᱢᱟᱱᱮ ᱫᱚ ᱵᱤᱨ ᱯᱟᱠᱟᱲ ᱪᱟᱵᱟᱭᱮᱱᱟ, ᱪᱮᱫ ᱟᱵᱳ ᱦᱚᱸᱵᱳᱱ ᱪᱟᱵᱟᱜᱼᱟ ᱥᱮ ᱪᱮᱛᱟ?
᱖. ᱵᱟᱹᱭᱦᱟᱹᱲᱨᱮ ᱢᱤᱫᱴᱮᱱ ᱵᱩᱨᱩ, ᱚᱱᱮ ᱚᱱᱟ ᱨᱮᱭᱟᱜ ᱵᱷᱮᱫᱽ ᱫᱚ ᱱᱳᱣᱟᱜᱮ ᱡᱮ, ᱢᱟᱨᱟᱝ ᱵᱩᱨᱩ ᱵᱤᱫᱟᱹᱞᱨᱮ ᱟᱵᱳᱣᱟᱜ ᱦᱟᱞᱚᱛ ᱟᱹᱰᱤᱛᱮᱫ ᱵᱟᱹᱲᱤᱡᱜᱮ ᱦᱳᱭᱞᱮᱱᱛᱟᱵᱳᱱᱟ᱾ ᱚᱱᱮ ᱚᱱᱟ ᱚᱠᱛᱮᱨᱮᱜᱮ ᱟᱵᱳᱣᱟᱜ ᱡᱟᱹᱛ ᱫᱚ ᱪᱚᱴ ᱠᱷᱚᱱ ᱯᱷᱮᱰ ᱦᱟᱹᱵᱤᱡ ᱦᱚᱥᱚᱨ ᱯᱷᱮᱰᱮᱱ᱾ ᱢᱮᱛᱟᱜᱢᱮ ᱵᱚᱝᱜᱟ ᱯᱩᱡᱟᱹ ᱫᱮᱣᱟ ᱥᱮᱣᱟᱛᱮᱜᱮ ᱡᱟᱹᱛ ᱨᱮᱭᱟᱜ ᱢᱟᱱ ᱢᱟᱱᱚᱛ ᱡᱚᱛᱚᱣᱟᱜᱜᱮ ᱟᱫᱼᱮᱱ, ᱟᱨ ᱥᱮᱫᱟᱭ ᱞᱮᱠᱟ ᱩᱰᱟᱹᱜᱪᱟᱞ ᱫᱮᱥᱯᱳᱰᱟ ᱦᱚᱲᱵᱳᱱ ᱦᱳᱭᱳᱜ᱾
᱗. ᱯᱳᱱᱰ ᱠᱤᱪᱨᱤᱡ ᱦᱚᱨᱚᱜᱼᱟᱠᱟᱫ ᱢᱤᱫᱴᱮᱱ ᱦᱚᱲ, ᱚᱱᱮ ᱚᱠᱚᱭᱟᱜ ᱛᱤᱨᱮ ᱥᱟᱫᱟ ᱯᱳᱱᱰ ᱠᱟᱜᱚᱪᱛᱮ (ᱠᱨᱤᱥᱛᱟᱱ ᱢᱤᱥᱚᱱᱟᱹᱨᱤ) ᱥᱮ (ᱴᱷᱟᱹᱠᱩᱨ ᱡᱤᱣ ᱤᱥᱚᱨᱮ) ᱦᱩᱠᱩᱢᱮᱫᱠᱟᱱ ᱡᱮ, ᱟᱵᱳᱣᱟᱜ ᱚᱞᱚᱜ ᱯᱟᱲᱦᱟᱜ ᱵᱟᱝᱛᱮ ᱟᱵᱳ ᱦᱚᱲ ᱦᱚᱯᱚᱱᱠᱳᱣᱟᱜ ᱵᱟᱧᱪᱟᱣ ᱵᱟᱹᱱᱩᱜᱛᱟᱵᱳᱱᱟ᱾ ᱚᱱᱮ ᱩᱱᱤ ᱫᱚ ᱟᱡᱟᱜ ᱯᱳᱱᱰ ᱠᱟᱜᱚᱪ ᱚᱲᱮᱡᱠᱟᱛᱮ ᱦᱚᱲ ᱦᱚᱯᱚᱱᱟᱜ ᱛᱤᱨᱮᱭ ᱡᱤᱢᱟᱹᱭᱮᱫᱠᱟᱱ᱾
ᱱᱳᱣᱟᱠᱳ ᱡᱚᱛᱚ ᱫᱚᱨᱥᱚᱱ ᱫᱚ ᱦᱳᱭᱳᱜᱠᱟᱱᱟ: ᱟᱵᱳ ᱦᱚᱲ ᱦᱚᱯᱚᱱ, ᱴᱷᱟᱹᱠᱩᱨ ᱡᱤᱣ (ᱤᱥᱚᱨ) ᱥᱟᱹᱫᱷᱤᱱᱵᱳᱱ ᱨᱮᱭᱟᱜᱼᱮ ᱪᱮᱦᱟᱣᱮᱫᱵᱳᱱᱠᱟᱱᱟ᱾
ᱟᱫᱚᱢ ᱠᱳᱠᱳ ᱢᱮᱱᱟ ᱡᱮ ᱥᱮᱥ ᱩᱛᱟᱹᱨᱟᱜ ᱫᱚᱨᱥᱚᱱ ᱫᱚ ᱱᱳᱣᱟᱜᱮ ᱛᱟᱦᱮᱸᱠᱟᱱᱟ ᱡᱮ, ᱩᱱᱤ ᱴᱷᱟᱹᱠᱩᱨ ᱡᱤᱣ ᱫᱚ ᱟᱡᱟᱜ ᱥᱟᱫᱟ ᱠᱟᱜᱚᱪ ᱨᱮᱭᱟᱜ ᱢᱤᱫᱴᱮᱱ ᱯᱩᱛᱷᱤ ᱥᱤᱫᱷᱳ, ᱠᱟᱹᱱᱦᱩ, ᱪᱟᱱᱫᱽ, ᱵᱟᱭᱨᱚᱛᱮᱠᱳᱭ ᱮᱢᱟᱫᱠᱳᱣᱟ᱾ ᱟᱨᱮ ᱢᱮᱛᱟᱫᱠᱳᱣᱟ, ᱱᱳᱣᱟ ᱨᱮᱭᱟᱜ ᱥᱟᱱᱟᱢ ᱦᱚᱲᱠᱳ ᱴᱷᱮᱱ ᱦᱟᱹᱡᱤᱨᱚᱜᱢᱟ, ᱟᱨ ᱡᱚᱛᱚ ᱦᱚᱲ ᱦᱚᱯᱚᱱ ᱜᱚᱴᱟ ᱥᱟᱱᱛᱟᱞ ᱫᱤᱥᱟᱹᱢᱨᱮᱠᱳ ᱠᱳᱞ ᱯᱟᱥᱱᱟᱣ᱾ ᱡᱚᱛᱚ ᱦᱚᱲᱜᱮ ᱚᱱᱟ ᱠᱟᱜᱚᱪ ᱨᱮᱭᱟᱜ ᱠᱩᱴᱨᱟᱹ ᱦᱟᱹᱴᱤᱧᱠᱟᱛᱮ ᱜᱳᱴᱟ ᱫᱤᱥᱟᱹᱢᱨᱮᱠᱳ ᱰᱟᱢᱰᱟᱦᱮᱠᱮᱫᱟ᱾ ᱴᱷᱟᱹᱠᱩᱨ ᱡᱤᱣᱟᱜ ᱠᱟᱛᱷᱟ ᱠᱟᱱᱛᱮ ᱡᱚᱛᱚᱜᱮᱠᱳ ᱯᱟᱹᱛᱤᱭᱟᱹᱣᱮᱱᱟ᱾
ᱦᱚᱲ ᱦᱚᱯᱚᱱᱟᱜ ᱠᱟᱨᱟᱡ ᱠᱩᱨᱩᱡ ᱥᱟᱨᱠᱟᱨ ᱴᱷᱮᱱ ᱡᱟᱹᱦᱤᱨ:
ᱢᱟᱦᱟᱡᱚᱱ ᱟᱨ ᱫᱚᱨᱚᱜᱟᱠᱳᱣᱟᱜ ᱠᱚᱪᱞᱚᱱ ᱠᱷᱚᱱ ᱵᱟᱧᱪᱟᱜ ᱨᱮᱭᱟᱜ ᱩᱯᱟᱹᱭ ᱞᱮᱠᱟᱛᱮ ᱰᱷᱟᱹᱨᱩᱟᱹᱜ ᱥᱟᱞᱟᱜ ᱟᱛᱳᱠᱮ ᱟᱛᱳ ᱦᱚᱲ ᱦᱚᱯᱚᱱᱠᱳ ᱵᱟᱰᱟᱭᱳᱪᱳᱠᱮᱫᱠᱳᱣᱟ᱾ ᱟᱨ ᱡᱟᱨᱣᱟᱠᱟᱛᱮ ᱦᱳᱭᱳᱜᱠᱟᱱᱟᱜ ᱢᱟᱨᱟᱝ ᱩᱯᱷᱟᱹᱫᱽ ᱞᱟᱹᱜᱤᱫ ᱡᱮᱢᱚᱱ ᱦᱚᱲ ᱦᱚᱯᱚᱱᱠᱳ ᱥᱟᱯᱲᱟᱣ ᱜᱮᱠᱳ ᱛᱟᱦᱮᱸᱱ᱾ ᱱᱳᱣᱟᱜᱮ ᱯᱟᱹᱦᱤᱞ ᱢᱤᱴᱤᱝ ᱫᱚ᱾ ᱱᱳᱣᱟ ᱡᱟᱨᱣᱟᱭᱱ ᱨᱮᱭᱟᱜ ᱛᱟᱹᱨᱤᱠ ᱫᱚ ᱛᱟᱦᱮᱸᱠᱟᱱᱟ ᱡᱩᱱᱮ ᱪᱟᱱᱫᱳ ᱓᱐ ᱛᱟᱹᱨᱤᱠ ᱑᱘᱕᱕ ᱥᱟᱞ ᱠᱩᱱᱟᱹᱢᱤ ᱦᱤᱞᱚᱜ᱾ ᱚᱱᱟ ᱦᱤᱞᱚᱜᱨᱮ ᱑᱐,᱐᱐᱐ (ᱜᱮᱞ ᱦᱟᱡᱟᱨ) ᱦᱚᱲ ᱵᱷᱚᱜᱽᱱᱟᱰᱤ ᱟᱛᱳᱨᱮᱠᱳ ᱡᱟᱨᱣᱟᱞᱮᱱᱟ᱾ ᱱᱳᱣᱟᱨᱮᱱ ᱢᱟᱨᱟᱝ ᱵᱤᱨ ᱵᱟᱱᱴᱟ ᱟᱹᱭᱩᱨᱠᱳ ᱫᱳᱠᱳ ᱛᱟᱦᱮᱸᱠᱟᱱᱟ ᱟᱠᱳᱜᱮ ᱵᱚᱭᱦᱟ ᱥᱤᱫᱷᱚ, ᱠᱟᱹᱱᱦᱩ, ᱪᱟᱱᱫᱽ ᱟᱨ ᱵᱷᱟᱭᱨᱚᱜᱮ᱾ ᱱᱳᱣᱟ ᱡᱟᱨᱣᱟᱜᱨᱮ ᱟᱭᱢᱟ ᱞᱮᱠᱟᱱᱟᱜᱜᱮᱠᱳ ᱜᱟᱯᱟᱞᱢᱟᱨᱟᱣᱞᱮᱱᱟ᱾ ᱤᱱᱟᱹ ᱛᱟᱭᱚᱢ ᱟᱠᱳᱣᱟᱜ ᱠᱟᱨᱟᱡ ᱠᱩᱨᱩᱡ ᱢᱚᱱ ᱫᱩᱠ ᱨᱮᱭᱟᱜ ᱠᱟᱛᱷᱟ ᱫᱚ ᱥᱟᱨᱠᱟᱨ ᱴᱷᱮᱱᱠᱳ ᱟᱨᱫᱟᱥᱞᱮᱫᱜᱮᱭᱟ, ᱢᱮᱱᱠᱷᱟᱱ ᱡᱟᱦᱟᱱ ᱯᱚᱨᱦᱚ ᱫᱚ ᱵᱟᱝ ᱦᱳᱭᱞᱮᱱᱟ᱾ ᱟᱨᱫᱟᱥ ᱫᱳ ᱦᱳᱭᱞᱮᱱ ᱨᱮᱦᱚᱸ ᱚᱱᱟ ᱫᱚ ᱫᱳᱨᱳᱵᱳᱥᱜᱮ ᱟᱹᱭᱠᱟᱹᱜᱠᱟᱱ ᱤᱟᱹᱛᱮ ᱫᱟᱹᱠᱷᱤᱞᱞᱮᱱ ᱨᱮᱦᱚᱸ ᱚᱱᱟ ᱫᱚ ᱫᱟᱨᱚᱜᱟ ᱟᱢᱞᱟ ᱠᱟᱯᱞᱟᱠᱳᱣᱟᱜ ᱥᱟᱠᱟᱢ ᱞᱟᱛᱟᱨᱨᱮ ᱛᱮᱱ ᱮᱥᱮᱫᱼᱮᱱᱟ᱾ ᱰᱤ. ᱥᱤ. ᱟᱨ ᱮᱥ.ᱯᱤ ᱥᱟᱱᱟᱢᱠᱳ ᱴᱷᱮᱱᱜᱮᱠᱳ ᱫᱟᱨᱠᱷᱟᱥᱞᱮᱫᱜᱮᱭᱟ, ᱢᱮᱱᱠᱷᱟᱱ ᱡᱟᱦᱟᱱ ᱫᱟᱢ ᱫᱚ ᱵᱟᱠᱳ ᱮᱢᱞᱟᱜᱼᱟ᱾ ᱡᱮᱢᱚᱱ ᱱᱤᱛ ᱪᱟᱞᱟᱜᱠᱟᱱ ᱞᱮᱠᱟᱜᱮ, ᱡᱟᱦᱟᱱ ᱠᱟᱢᱨᱮᱜᱮ ᱵᱟᱝ ᱡᱳᱡᱟᱣᱞᱮᱱᱟ᱾
ᱠᱚᱪᱞᱚᱱ ᱵᱤᱨᱩᱫᱽᱨᱮ ᱞᱟᱹᱲᱦᱟᱹᱭ ᱞᱟᱹᱜᱤᱫ ᱦᱚᱲ ᱦᱚᱯᱚᱱᱟᱜ ᱥᱟᱯᱲᱟᱣᱜ:
ᱫᱚᱥᱟᱨ ᱢᱤᱴᱤᱝ ᱦᱚᱸ ᱦᱳᱭᱞᱮᱱᱟ ᱥᱤᱫᱷᱚ, ᱠᱟᱱᱦᱩ, ᱪᱟᱱᱫᱽ ᱟᱨ ᱵᱷᱟᱭᱨᱚ ᱟᱠᱳ ᱯᱳᱱᱳᱱ ᱵᱚᱭᱦᱟ ᱱᱤᱟᱹᱛᱮᱜᱮ᱾ ᱟᱨ ᱥᱮᱥᱨᱮ ᱫᱮᱠᱳ ᱦᱚᱯᱚᱱᱠᱳ ᱦᱚᱲᱮᱡ ᱜᱟᱫᱟᱨ ᱩᱫᱩᱜᱼᱟᱠᱳᱣᱟ ᱢᱮᱱᱛᱮᱠᱳ ᱰᱟᱹᱦᱩᱸᱲ ᱵᱩᱞᱟᱹᱣᱮᱱᱟ᱾ ᱩᱱᱨᱮ ᱥᱤᱫᱷᱚ ᱟᱨ ᱠᱟᱹᱱᱦᱩᱠᱤᱱ ᱢᱮᱱᱠᱮᱫᱟᱼ “ᱟᱵᱳ ᱫᱚ ᱛᱷᱤᱨ ᱛᱟᱦᱮᱸᱠᱟᱛᱮ ᱟᱨ ᱪᱮᱫ ᱦᱚᱸ ᱵᱟᱝ ᱦᱳᱭᱳᱜᱛᱟᱵᱳᱱᱟ᱾ ᱵᱤᱪᱠᱚᱢ ᱟᱵᱳ ᱪᱮᱛᱟᱱᱨᱮ ᱪᱟᱞᱟᱜᱠᱟᱱ ᱠᱚᱪᱞᱚᱱ ᱠᱷᱚᱱ ᱥᱟᱦᱟᱲᱚᱜ ᱩᱯᱟᱹᱭ ᱫᱚ ᱱᱳᱣᱟᱜᱮ ᱡᱮ, ᱟᱵᱳ ᱡᱚᱛᱚᱠᱳᱛᱮ ᱠᱚᱪᱞᱚᱱᱠᱟᱱᱠᱳ ᱢᱮᱛᱟᱜᱢᱮ ᱡᱚᱛᱚ ᱫᱮᱠᱳ ᱦᱚᱯᱚᱱᱠᱳ ᱦᱚᱲᱮᱡ ᱜᱟᱫᱟᱨ ᱵᱳᱱ ᱩᱫᱩᱜᱼᱟᱠᱳᱣᱟ᱾ ᱟᱵᱳᱛᱮᱜᱮ ᱟᱵᱳᱣᱟᱜ ᱫᱤᱥᱟᱹᱵᱳᱱ ᱪᱟᱞᱟᱣᱟ᱾ ᱡᱟᱸᱦᱟᱸᱭᱜᱮᱭᱮ ᱟᱠᱚᱴᱵᱳᱱᱠᱷᱟᱱ ᱩᱱᱤᱜᱮ ᱦᱚᱲᱮᱡ ᱜᱟᱫᱟᱨᱵᱳᱱ ᱩᱫᱩᱜᱟᱭᱟ᱾” ᱩᱱᱨᱮ ᱩᱱᱠᱤᱱᱟᱜ ᱠᱟᱛᱷᱟ ᱟᱧᱡᱚᱢᱠᱟᱛᱮ ᱡᱩᱟᱹᱱ ᱡᱩᱟᱹᱱ ᱠᱚᱲᱟᱠᱳ ᱫᱚ ᱠᱷᱟᱱᱰᱟ ᱵᱷᱟᱱᱰᱟ ᱡᱚᱜᱟᱲᱡᱚᱝᱠᱳ ᱮᱦᱚᱵᱠᱮᱫᱟ᱾ ᱵᱷᱚᱜᱽᱱᱟᱰᱤ ᱟᱛᱳᱨᱮᱱ ᱪᱩᱱᱩ ᱦᱚᱯᱚᱱ ᱥᱤᱫᱷᱳ ᱟᱨ ᱠᱟᱹᱱᱦᱩ ᱫᱚ ᱩᱱᱠᱤᱱᱜᱮ ᱫᱤᱞ ᱟᱨ ᱟᱹᱠᱤᱞᱟᱱᱠᱳ ᱵᱟᱪᱷᱟᱣᱠᱮᱫᱠᱤᱱᱟᱹ, ᱟᱨ ᱨᱟᱡᱟ ᱟᱨ ᱦᱚᱲ ᱦᱚᱯᱚᱱᱠᱳᱨᱮᱱ ᱢᱟᱹᱞᱤᱠ ᱢᱮᱱᱛᱮᱠᱳ ᱴᱟᱨᱦᱟᱣᱠᱮᱫᱠᱤᱱᱟᱹ᱾ ᱪᱟᱱᱫᱽ ᱟᱨ ᱵᱷᱟᱭᱨᱚ ᱫᱚ ᱯᱷᱟᱹᱫᱽ ᱪᱟᱞᱟᱣᱠᱤᱱ ᱢᱮᱛᱟᱜᱢᱮ ᱠᱮᱯᱴᱮᱱᱠᱤᱱ ᱦᱳᱭᱮᱱᱟ᱾ ᱞᱟᱹᱲᱦᱟᱹᱭ ᱥᱤᱯᱟᱹᱦᱤᱠᱤᱱ ᱧᱟᱢᱠᱳᱣᱟ ᱟᱨ ᱞᱟᱹᱲᱦᱟᱹᱭ ᱨᱮᱭᱟᱜ ᱛᱟᱨᱜᱷᱟᱨᱠᱤᱱ ᱪᱮᱫᱼᱟᱠᱳᱣᱟ᱾ ᱥᱤᱫᱷᱚ ᱠᱟᱹᱱᱦᱩ ᱫᱚ ᱠᱷᱩᱲᱠᱷᱩᱨᱤᱛᱮᱠᱤᱱ ᱫᱟᱲᱟᱱᱟ ᱟᱛᱳᱠᱮ ᱟᱛᱳ, ᱟᱨ ᱪᱟᱱᱫᱽ ᱵᱷᱟᱭᱨᱚ ᱫᱚ ᱥᱟᱫᱚᱢᱨᱮ ᱫᱮᱡᱠᱟᱛᱮ ᱥᱤᱯᱟᱹᱦᱤᱠᱤᱱ ᱧᱟᱢ ᱡᱟᱨᱳᱣᱟᱠᱳᱣᱟ᱾ ᱩᱱᱨᱮᱜᱮ ᱯᱟᱥᱮᱡ ᱱᱳᱝᱠᱟᱠᱳ ᱥᱮᱨᱮᱧᱞᱮᱫᱟᱼ
ᱨᱟᱹᱲᱼ ᱞᱟᱜᱽᱬᱮ
ᱥᱤᱫᱷᱳ ᱠᱟᱱᱦᱩ ᱠᱷᱩᱲᱠᱷᱩᱲᱤ ᱵᱷᱤᱛᱚᱨᱮ !
ᱪᱟᱱᱫᱽ ᱵᱷᱟᱭᱨᱚ ᱜᱷᱚᱲᱟ ᱩᱯᱚᱨᱮ !
ᱫᱮᱠᱷᱚᱥᱮ ᱨᱮ ! ᱪᱟᱱᱫᱽ ᱨᱮ ! ᱵᱷᱟᱭᱨᱚ ᱨᱮ !
ᱜᱷᱚᱲᱟ ᱵᱷᱟᱭᱨᱚ ᱢᱩᱞᱤᱱᱮ ᱢᱩᱞᱤᱱ !
ᱦᱚᱲᱠᱳ ᱪᱮᱛᱚᱱ ᱟᱨ ᱡᱟᱜᱽᱣᱟᱨᱳᱪᱳᱠᱳᱣᱟ ᱢᱮᱱᱛᱮ ᱩᱱᱟᱹᱱᱞᱮᱱᱟ ᱵᱟᱝᱢᱟ ᱠᱚᱲᱟᱠᱳ ᱴᱚᱴᱠᱚ ᱟᱠᱟᱠᱟᱛᱮ, ᱜᱤᱫᱽᱜᱽᱨᱟᱹᱠᱳ ᱜᱷᱟᱹᱱᱴᱤ ᱥᱟᱵᱠᱟᱛᱮ, ᱡᱟᱝᱜᱟᱨᱮ ᱞᱤᱯᱩᱨ ᱦᱚᱲᱜᱠᱟᱛᱮ ᱴᱚᱠᱚᱨ ᱴᱚᱠᱚᱨ, ᱴᱷᱤᱲᱤᱧ ᱴᱷᱤᱲᱧ, ᱡᱷᱩᱢᱩᱨ ᱡᱷᱩᱢᱩᱨ ᱧᱤᱨᱟᱛᱮ ᱢᱤᱫ ᱟᱛᱳᱛᱮᱠᱳ ᱪᱟᱞᱟᱜᱼᱟ ᱟᱨ ᱚᱱᱟ ᱟᱛᱳᱨᱮᱱ ᱡᱟᱸᱦᱟᱸᱭ ᱦᱚᱲᱠᱳ ᱛᱚᱞᱟᱭᱟ ᱥᱮᱠᱳ ᱟᱠᱟᱣᱟᱠᱳᱣᱟ ᱟᱨ ᱳᱱᱠᱳ ᱫᱚ ᱮᱴᱟᱜ ᱟᱛᱳᱛᱮ ᱥᱚᱢᱵᱟᱫᱽᱠᱳ ᱮᱢᱟᱣᱟᱠᱳᱣᱟ ᱱᱳᱣᱟ ᱢᱮᱱᱛᱮ ᱡᱮ, ᱢᱤᱫᱴᱮᱱ ᱢᱟᱨᱟᱝ ᱩᱛᱟᱹᱨ ᱡᱚᱸᱠᱮ ᱫᱟᱨᱟᱭᱠᱟᱱᱟ, ᱩᱱᱤ ᱫᱚ ᱳᱲᱟᱜ ᱥᱮ ᱜᱷᱟᱰᱞᱟᱜᱨᱮᱭᱮ ᱰᱮᱨᱟᱜᱼᱟ, ᱟᱨᱮ ᱰᱮᱨᱟᱞᱮᱱᱠᱷᱟᱱ ᱚᱱᱟ ᱟᱛᱳᱨᱮᱱ ᱡᱚᱛᱚ ᱦᱚᱲᱠᱳ ᱜᱚᱡ ᱪᱟᱵᱟᱜᱼᱟ; ᱚᱱᱟᱛᱮ ᱡᱚᱛᱚ ᱜᱷᱟᱰᱞᱟᱜᱠᱳ ᱫᱷᱟᱯᱟᱣᱠᱮᱫᱟ᱾ ᱡᱚᱸᱠ ᱨᱮᱭᱟᱜ ᱢᱟᱱᱮ ᱫᱚ ᱱᱳᱣᱟᱜᱮ: ᱡᱚᱸᱠ ᱡᱮᱢᱚᱱ ᱢᱟᱭᱟᱢᱠᱳ ᱧᱩᱸᱟ ᱚᱱᱠᱟᱜᱮ ᱢᱟᱦᱟᱡᱚᱱᱠᱳ ᱦᱚᱲ ᱦᱚᱯᱚᱱᱟᱜ ᱫᱷᱚᱱ ᱥᱚᱢᱯᱚᱫᱽᱠᱳ ᱪᱩᱥᱟᱹᱣ ᱡᱚᱢ ᱪᱟᱵᱟᱠᱮᱫᱟ᱾
ᱳᱱᱠᱟᱜᱮ ᱟᱨᱦᱚᱸ ᱜᱩᱱᱟᱹᱱᱮᱱᱟ ᱡᱮ, ᱢᱤᱫᱴᱮᱱ ᱵᱤᱛᱠᱤᱞᱮ ᱫᱟᱨᱟᱭᱠᱟᱱᱟ, ᱩᱱᱤ ᱦᱚᱸ ᱳᱠᱟ ᱟᱛᱳᱨᱮ ᱜᱷᱟᱸᱥᱮ ᱡᱚᱢᱟ, ᱚᱱᱟ ᱟᱛᱳᱨᱮᱱ ᱡᱚᱛᱚ ᱦᱚᱲᱠᱳ ᱜᱚᱡ ᱪᱟᱵᱟᱜᱼᱟ᱾ ᱳᱱᱟᱛᱮ ᱠᱩᱞᱦᱤ ᱨᱮᱭᱟᱜ ᱜᱷᱟᱸᱥ ᱫᱳᱠᱳ ᱞᱟᱜ ᱥᱟᱯᱷᱟᱠᱮᱫᱟ᱾ ᱵᱤᱛᱠᱤᱞ ᱨᱮᱭᱟᱜ ᱢᱟᱱᱮ ᱫᱚ ᱱᱳᱣᱟᱜᱮ: ᱵᱤᱛᱠᱤᱞ ᱫᱚ ᱥᱟᱱᱟᱢ ᱜᱷᱟᱸᱥᱮ ᱡᱚᱢ ᱩᱡᱟᱹᱲᱟ, ᱳᱱᱠᱟᱜᱮ ᱫᱮᱠᱳ ᱢᱟᱦᱟᱡᱚᱱ ᱫᱚ ᱟᱵᱳᱣᱟᱜ ᱫᱷᱚᱱ ᱥᱚᱢᱯᱚᱫᱽ ᱥᱟᱱᱟᱢᱠᱳ ᱡᱚᱢ ᱩᱡᱟᱹᱲᱠᱮᱫᱛᱟᱵᱳᱱᱟ᱾ ᱠᱷᱟᱱᱜᱮ ᱦᱚᱲᱠᱳ ᱫᱚ ᱢᱟᱦᱟᱡᱚᱱᱠᱳ ᱞᱟᱜᱟᱠᱳ ᱨᱮᱭᱟᱜ ᱥᱩᱨᱩᱛᱟᱞᱠᱳ ᱞᱟᱜᱟᱣᱠᱮᱫᱟ᱾ ᱞᱩᱴᱯᱟᱴ ᱟᱨ ᱳᱲᱟᱜ ᱡᱮᱨᱮᱫᱠᱳ ᱮᱦᱚᱵᱠᱮᱫᱟ ᱡᱮᱢᱚᱱ ᱥᱟᱨᱠᱟᱨᱨᱮᱱ ᱦᱚᱲ ᱟᱠᱳᱣᱟᱜ ᱟᱨᱫᱟᱥᱠᱳ ᱟᱧᱡᱚᱢ, ᱚᱱᱟᱛᱮ ᱳᱱᱠᱳ ᱫᱚ ᱫᱮᱠᱳ ᱢᱟᱦᱟᱡᱚᱱᱠᱳ ᱦᱮᱞᱮᱡ ᱜᱚᱡᱠᱳ ᱨᱮᱭᱟᱜᱠᱳ ᱠᱩᱨᱩᱢᱩᱴᱩᱠᱮᱫᱟ᱾
ᱢᱚᱦᱮᱥᱞᱟᱞ ᱫᱚᱨᱚᱜᱟᱣᱟᱜ ᱜᱷᱚᱴᱱᱟ:
ᱡᱩᱝᱜᱤᱯᱩᱨᱨᱮᱱ ᱢᱚᱦᱮᱥᱞᱟᱞ ᱫᱚᱨᱚᱜᱟ ᱫᱚ ᱯᱟᱹᱞᱴᱤᱱ ᱥᱟᱦᱮᱵᱽᱨᱮᱱ ᱠᱷᱟᱡᱽᱱᱟ ᱩᱴᱷᱟᱹᱣᱤᱡᱨᱮᱱ ᱜᱚᱲᱚᱭᱡᱮ ᱛᱟᱦᱮᱸᱠᱟᱱᱟ᱾ ᱫᱚᱨᱚᱜᱟ ᱟᱨ ᱠᱮᱱᱟᱨᱟᱢ ᱢᱚᱦᱟᱡᱚᱱ ᱫᱚ ᱟᱹᱰᱤ ᱢᱤᱞᱠᱤᱱ ᱛᱟᱦᱮᱸᱠᱟᱱᱟ᱾ ᱠᱮᱱᱟᱨᱟᱢ ᱫᱚ ᱟᱢᱲᱟᱯᱟᱲᱟ ᱟᱛᱳᱨᱮᱱ ᱢᱟᱨᱟᱝ ᱨᱤᱱ ᱵᱟᱹᱭᱥᱟᱹᱣᱤᱡ ᱢᱚᱦᱟᱡᱚᱱᱮ ᱛᱟᱦᱮᱸᱠᱟᱱᱟ᱾ ᱨᱤᱱ ᱯᱟᱱ ᱩᱴᱷᱟᱹᱣ ᱞᱟᱹᱜᱤᱫᱛᱮ ᱢᱚᱦᱮᱥᱞᱟᱞ ᱫᱚᱨᱚᱜᱟ ᱫᱚ ᱠᱮᱱᱟᱨᱟᱢ ᱟᱹᱰᱤ ᱫᱷᱟᱣᱛᱮᱭ ᱜᱚᱲᱚᱠᱟᱣᱟᱫᱮᱭᱟ᱾ ᱢᱤᱫᱫᱤᱱ ᱠᱮᱱᱟᱨᱟᱢ ᱵᱷᱚᱜᱚᱛ ᱫᱚ ᱫᱚᱨᱚᱜᱟ ᱱᱤᱟᱹᱛᱮ ᱴᱟᱠᱟ ᱯᱟᱭᱥᱟ ᱟᱹᱫᱟᱹᱭᱡᱚᱝ ᱞᱟᱹᱜᱤᱫᱛᱮ ᱟᱢᱜᱟᱹᱪᱷᱤ ᱟᱛᱳᱨᱮᱱ ᱜᱟᱹᱨᱵᱷᱩ ᱢᱟᱹᱧᱡᱷᱤ ᱵᱤᱱ ᱠᱟᱹᱥᱩᱨᱛᱮ ᱥᱟᱵᱠᱮᱫᱮᱛᱮᱠᱤᱱ ᱢᱮᱱᱠᱮᱫᱟᱼ “ᱨᱤᱱ ᱦᱟᱞᱟᱭᱢᱮ, ᱵᱟᱝᱠᱷᱟᱱ ᱦᱟᱡᱚᱛᱛᱮᱞᱤᱧ ᱤᱫᱤᱢᱮᱭᱟ”᱾ ᱜᱟᱹᱨᱨᱵᱷᱩ ᱢᱟᱧᱡᱷᱤ ᱫᱚᱭ ᱢᱮᱱᱠᱮᱫᱟᱼ “ᱪᱮᱫ ᱨᱤᱱ? ᱤᱧ ᱫᱚ ᱵᱟᱪᱚᱧ ᱨᱤᱱ ᱟᱠᱟᱫ”᱾ ᱟᱫᱚ ᱟᱹᱰᱤ ᱟᱸᱴᱠᱤᱱ ᱡᱩᱞᱩᱢ ᱠᱮᱫᱮᱠᱷᱟᱱ ᱜᱟᱹᱭ ᱟᱨ ᱴᱟᱠᱟᱭ ᱮᱢᱟᱜᱠᱤᱱᱛᱮ ᱤᱱᱟᱹ ᱫᱷᱟᱣ ᱫᱚᱭ ᱵᱟᱧᱪᱟᱭᱮᱱᱟ᱾ ᱠᱮᱱᱟᱨᱟᱢ ᱫᱚ ᱟᱡ ᱩᱯᱟᱹᱨᱛᱮ ᱡᱟᱦᱟᱸᱱᱟᱜᱜᱮᱭ ᱟᱧᱡᱚᱢᱞᱮᱠᱷᱟᱱ, ᱡᱟᱦᱟᱸᱭᱠᱳ ᱴᱷᱮᱱ ᱠᱷᱚᱱ ᱩᱱᱤ ᱫᱚ ᱢᱮᱫ ᱟᱨ ᱢᱮᱫᱛᱮᱭ ᱧᱮᱞᱮᱫᱠᱳᱠᱟᱱ ᱛᱟᱦᱮᱸᱠᱟᱱᱟ᱾ ᱡᱟᱦᱟᱸ ᱵᱟᱝ ᱡᱟᱦᱟᱸᱞᱮᱠᱟᱛᱮ ᱥᱩᱥᱤ ᱧᱟᱢᱠᱟᱛᱮ ᱥᱟᱹᱡᱟᱹᱭᱠᱳ ᱞᱟᱹᱜᱤᱫ ᱫᱚᱨᱚᱜᱟ ᱦᱚᱛᱮᱛᱮ ᱛᱤᱡᱽ ᱫᱩᱨᱤᱵᱽᱠᱳᱭ ᱞᱩᱴ ᱤᱫᱤᱭᱫᱠᱟᱱ ᱛᱟᱦᱮᱸᱠᱟᱱᱟ᱾ ᱵᱤᱡᱟᱹᱭ ᱢᱟᱧᱡᱷᱤ ᱳᱱᱠᱟᱜᱮ ᱵᱟᱭ ᱟᱝᱜᱚᱪ ᱞᱮᱫᱛᱮ ᱵᱷᱟᱜᱚᱞᱯᱩᱨᱨᱮᱭ ᱦᱟᱡᱚᱛᱠᱮᱫᱮᱭᱟ ᱟᱨ ᱚᱱᱰᱮᱜᱮᱭ ᱜᱚᱡᱮᱱᱟ᱾ ᱜᱟᱹᱨᱵᱷᱩ ᱢᱟᱹᱧᱡᱷᱤ ᱫᱚ ᱵᱩᱞᱚᱜ ᱦᱚᱲᱮ ᱛᱟᱦᱮᱸᱠᱟᱱᱛᱮ ᱯᱟᱹᱣᱨᱟᱹ ᱪᱩᱣᱟᱹᱠᱤᱱ ᱫᱚᱥᱠᱮᱫᱮᱭᱟ ᱟᱨ ᱥᱮᱥᱟᱱᱨᱮᱠᱤᱱ ᱛᱚᱞᱠᱮᱫᱮᱭᱟ᱾ ᱟᱨ ᱢᱤᱫᱫᱤᱱ ᱠᱮᱱᱟᱨᱟᱢ ᱵᱷᱚᱜᱚᱛ ᱫᱚ ᱟᱡᱨᱮᱱ ᱜᱩᱛᱤᱠᱳ ᱱᱤᱟᱹᱛᱮ ᱵᱤᱨᱨᱮᱭ ᱛᱟᱸᱲᱟᱸᱜᱼᱟᱠᱟᱱ ᱛᱟᱦᱮᱸᱠᱟᱱᱟ ᱡᱮᱢᱚᱱ ᱦᱟᱲᱢᱟ ᱫᱮᱥᱢᱟᱹᱧᱡᱷᱤᱨᱮᱱ ᱠᱟᱰᱟ ᱵᱤᱛᱠᱤᱞ ᱥᱮᱛᱟᱜᱨᱮ ᱵᱤᱨᱛᱮ ᱵᱚᱞᱚᱜ ᱥᱟᱶᱛᱮᱭ ᱦᱟᱛᱠᱳ᱾ ᱫᱮᱥᱢᱟᱧᱦᱤ ᱚᱱᱟ ᱵᱟᱰᱟᱭᱠᱟᱛᱮᱭ ᱪᱟᱞᱟᱜᱠᱟᱱ ᱛᱟᱦᱮᱸᱠᱟᱱᱟ, ᱟᱪᱠᱟᱜᱮ ᱳᱱᱠᱳᱣᱟᱜ ᱛᱤᱨᱮᱭ ᱯᱟᱲᱟᱣᱮᱱᱟ ᱟᱨ ᱥᱟᱵᱠᱟᱛᱮᱜᱠᱳ ᱛᱚᱞᱠᱮᱫᱮᱭᱟ᱾ ᱫᱚᱨᱚᱜᱟ ᱫᱚ ᱟᱢᱜᱟᱹᱪᱷᱤ ᱟᱛᱳᱨᱮᱭ ᱛᱟᱦᱮᱸᱠᱟᱱᱟ, ᱚᱱᱰᱮᱜᱮ ᱩᱱᱤ ᱦᱳᱸᱠᱳ ᱤᱫᱤᱠᱮᱫᱮᱭᱟ᱾ ᱫᱚᱨᱚᱜᱟ ᱫᱚ ᱵᱟᱝ ᱟᱲᱟᱜᱮ ᱨᱮᱭᱟᱜᱼᱮ ᱦᱩᱠᱩᱢᱠᱮᱫᱟ᱾ ᱠᱷᱟᱱᱜᱮ ᱯᱤᱯᱲᱟᱹᱨᱮᱱ ᱦᱚᱲᱠᱳ ᱵᱟᱰᱟᱭᱠᱮᱫᱟ ᱡᱮ ᱦᱚᱲᱠᱳ ᱥᱟᱵᱳᱪᱳᱜᱠᱟᱱᱟ᱾ ᱳᱱᱠᱳ ᱪᱷᱟᱰᱟᱣᱠᱳ ᱞᱟᱹᱜᱤᱫᱛᱮ ᱪᱟᱹᱢᱯᱟᱹᱭ ᱟᱨ ᱞᱚᱠᱠᱷᱚᱱᱠᱤᱱ ᱞᱟᱦᱟᱭᱮᱱᱟ ᱟᱨ ᱩᱱᱠᱤᱱ ᱦᱳᱸᱠᱳ ᱥᱟᱵᱠᱮᱫᱠᱤᱱᱟᱹ᱾ ᱫᱚᱨᱚᱜᱟ ᱥᱟᱶᱛᱮ ᱩᱱᱠᱤᱱ ᱫᱚ ᱟᱹᱰᱤ ᱟᱸᱴᱠᱤᱱ ᱟᱡᱷᱢᱟᱣᱞᱮᱱᱟ ᱡᱮᱢᱚᱱ ᱥᱟᱵᱼᱟᱠᱟᱱ ᱦᱚᱲᱠᱳ ᱵᱟᱧᱪᱟᱣᱠᱳ ᱧᱟᱢ᱾ ᱵᱤᱪᱠᱚᱢ, ᱩᱱᱠᱤᱱ ᱥᱟᱞᱟᱜᱛᱮ ᱵᱷᱟᱜᱚᱞᱯᱩᱨ ᱡᱤᱞᱟᱹᱛᱮᱠᱳ ᱢᱚᱦᱚᱱᱰᱟᱠᱮᱫᱠᱳᱣᱟ᱾ ᱱᱳᱣᱟᱠᱳ ᱥᱚᱢᱵᱟᱫᱽ ᱫᱚ ᱥᱟᱱᱟᱢ ᱦᱚᱲ ᱡᱟᱨᱣᱟᱠᱟᱛᱮ ᱥᱟᱢ ᱯᱟᱨᱜᱟᱱᱟᱠᱳ ᱞᱟᱹᱭᱟᱫᱮᱭᱟ᱾ ᱫᱚᱨᱚᱜᱟᱛᱟᱠᱳ ᱯᱟᱰᱮᱨᱠᱳᱞᱟ ᱥᱮᱡᱛᱮᱠᱳ ᱯᱟᱨᱚᱢ ᱪᱟᱞᱟᱜ ᱚᱠᱛᱮ ᱥᱟᱢ ᱯᱟᱨᱜᱟᱱᱟ ᱫᱚ ᱳᱱᱠᱳ ᱟᱲᱟᱜᱠᱳ ᱨᱮᱭᱟᱜᱼᱮ ᱜᱟᱞᱢᱟᱨᱟᱣᱠᱮᱫᱟ, ᱢᱮᱱᱠᱷᱟᱱ ᱵᱟᱝᱜᱮᱭ ᱟᱲᱟᱜᱞᱮᱫᱠᱳᱣᱟ᱾ ᱵᱟᱰᱟᱭᱠᱮᱫᱟᱭ ᱡᱮ ᱛᱮᱦᱮᱧ ᱧᱤᱱᱫᱟᱹ ᱫᱚ ᱵᱟᱲᱦᱟᱭᱛᱨᱮᱠᱳ ᱫᱮᱨᱟᱜᱼᱟ᱾ ᱚᱱᱟ ᱥᱳᱨᱨᱮᱜᱮ ᱥᱤᱫᱷᱳ ᱟᱨ ᱠᱟᱹᱱᱦᱩ ᱫᱚ ᱫᱤᱥᱟᱹᱢ ᱦᱚᱲᱠᱤᱱ ᱡᱟᱨᱣᱟᱣᱟᱠᱟᱫᱠᱳᱣᱟ᱾ ᱛᱩᱨᱩᱭ ᱜᱚᱴᱮᱱ ᱠᱚᱲᱟᱠᱳ ᱱᱤᱟᱹᱛᱮ ᱥᱟᱢ ᱯᱟᱨᱜᱟᱱᱟ ᱫᱚ ᱦᱟᱱᱛᱮ ᱱᱟᱛᱮ ᱥᱳᱢᱵᱟᱫᱽ ᱠᱳᱠᱳᱞᱮ ᱮᱦᱚᱵᱮᱱᱟ᱾ ᱟᱫᱚᱢᱠᱳ ᱫᱚ ᱳᱲᱟᱜᱛᱮ ᱥᱳᱢᱵᱟᱫᱽ ᱮᱢᱟᱠᱳ ᱞᱟᱹᱜᱤᱫᱛᱮᱭ ᱠᱳᱞᱠᱮᱫᱠᱳᱣᱟ᱾ ᱟᱫᱚᱢᱠᱳ ᱫᱚ ᱥᱤᱫᱷᱳ ᱟᱨ ᱠᱟᱹᱱᱦᱩ ᱴᱷᱮᱱ ᱥᱮᱱᱠᱟᱛᱮ ᱩᱱᱠᱤᱱ ᱵᱟᱰᱟᱭᱳᱪᱳᱠᱤᱱ ᱞᱟᱹᱜᱤᱫᱛᱮ ᱦᱚᱲᱠᱳ ᱪᱟᱞᱟᱣᱮᱱᱟ᱾ ᱟᱨ ᱟᱫᱚᱢᱠᱳ ᱫᱚ ᱫᱚᱨᱚᱜᱟ ᱟᱹᱨᱤᱵᱟᱹᱱᱫᱷᱤᱭ ᱞᱟᱹᱜᱤᱫ ᱢᱮᱛᱟᱜᱢᱮ ᱳᱠᱟᱨᱮᱠᱳ ᱰᱮᱨᱟᱜᱼᱟ, ᱛᱤᱱᱟᱹᱜᱜᱟᱱ ᱯᱩᱞᱤᱥ ᱟᱨ ᱥᱟᱶᱛᱮᱱᱠᱳ ᱢᱮᱱᱟᱜᱠᱳᱣᱟ᱾
ᱥᱤᱫᱷᱚ ᱟᱨ ᱠᱟᱹᱱᱦᱩ ᱫᱚ ᱢᱳᱨᱮᱞ (ᱵᱟᱹᱰᱤ) ᱜᱟᱰᱟ ᱥᱳᱨᱨᱮ ᱟᱢᱞᱟ ᱠᱟᱯᱞᱟᱣᱟᱱᱛᱮ ᱯᱟᱧᱪᱠᱟᱹᱴᱷᱤᱟᱹᱨᱮ ᱢᱟᱨᱮ ᱯᱩᱠᱷᱨᱤ ᱯᱤᱱᱰ ᱦᱮᱥᱟᱜ ᱵᱩᱴᱟᱨᱮᱠᱤᱱ ᱰᱮᱨᱟᱣᱟᱠᱟᱱ ᱛᱟᱦᱮᱸᱠᱟᱱᱟ᱾ ᱳᱱᱠᱟᱛᱮᱜᱮ ᱫᱚᱨᱚᱜᱟ ᱫᱚ ᱵᱷᱟᱜᱚᱞᱯᱩᱨᱛᱮ ᱳᱱᱠᱳ ᱠᱟᱹᱭᱫᱤ ᱦᱚᱲᱮ ᱤᱫᱤᱠᱳᱣᱟ ᱱᱟᱦᱟᱜ᱾ ᱥᱟᱢ ᱯᱟᱨᱜᱟᱱᱟᱣᱟᱜ ᱠᱟᱛᱷᱟ ᱥᱤᱫᱷᱚ ᱟᱨ ᱠᱟᱹᱱᱦᱩᱠᱤᱱ ᱵᱟᱰᱟᱭ ᱠᱮᱫᱟ᱾ ᱵᱤᱱ ᱠᱟᱹᱥᱩᱛᱮᱠᱳ ᱛᱚᱞ ᱳᱪᱳᱣᱟᱠᱟᱱ ᱦᱚᱲ ; ᱚᱱᱟ ᱤᱟᱹᱛᱮ ᱩᱱᱠᱤᱱ ᱫᱳ ᱧᱤᱱᱫᱟᱹ ᱵᱷᱤᱛᱨᱤᱛᱮᱜᱮ ᱟᱰᱮᱯᱟᱥᱮ ᱟᱛᱳᱛᱮ ᱥᱳᱢᱵᱟᱫᱽ ᱠᱳᱞᱠᱟᱛᱮ ᱦᱚᱲ ᱡᱟᱨᱣᱟᱠᱤᱱ ᱦᱩᱠᱩᱢᱟᱠᱟᱫᱠᱳᱣᱟ᱾ ᱟᱨ ᱳᱱᱟ ᱧᱤᱱᱫᱟᱹᱨᱮᱜᱮ ᱑᱐,᱐᱐᱐ (ᱜᱮᱞ ᱦᱟᱡᱟᱨ) ᱠᱷᱚᱱ ᱵᱟᱹᱲᱛᱤ ᱦᱚᱲ ᱠᱷᱟᱱᱰᱟᱼᱵᱷᱟᱱᱰᱟ, ᱠᱟᱹᱯᱤᱼᱛᱟᱲᱣᱟᱲᱤ ᱟᱨ ᱟᱜᱼᱥᱟᱨᱟᱱᱛᱮ ᱡᱩᱟᱹᱱ ᱡᱩᱟᱹᱱ ᱠᱚᱲᱟᱠᱳ ᱯᱟᱧᱪᱠᱟᱹᱴᱷᱤᱟᱹᱨᱮᱠᱳ ᱦᱮᱡ ᱡᱟᱨᱣᱟᱭᱮᱱᱟ᱾ ᱫᱚᱨᱚᱜᱟᱠᱳ ᱞᱟᱹᱭᱟᱫᱮᱭᱟ ᱡᱮ, ᱪᱮᱫ ᱠᱟᱨᱚᱱᱛᱮ ᱪᱚᱝ ᱫᱩᱨᱩᱢ ᱫᱩᱨᱩᱢ ᱦᱚᱲ ᱯᱟᱧᱪᱠᱟᱹᱴᱷᱤᱟᱹᱨᱮᱠᱳ ᱡᱟᱨᱣᱟᱣᱟᱠᱟᱱᱟ, ᱢᱮᱱᱠᱷᱟᱱ ᱫᱚᱨᱚᱜᱟ ᱫᱚ ᱛᱷᱳᱲᱟ ᱦᱚᱸ ᱵᱟᱭ ᱦᱮᱛᱟᱣᱟᱫᱟ᱾ ᱪᱟᱱᱫᱳ ᱨᱟᱠᱟᱵᱚᱜ ᱞᱟᱦᱟᱨᱮᱜᱮ ᱢᱚᱦᱮᱥᱞᱟᱞ ᱫᱚᱨᱚᱜᱟ ᱫᱚ ᱠᱮᱱᱟᱨᱟᱢ ᱥᱟᱶᱛᱮ ᱥᱟᱫᱚᱢᱨᱮ ᱫᱮᱡᱠᱟᱛᱮ ᱯᱟᱧᱪᱠᱟᱹᱴᱷᱤᱟᱹᱨᱮ ᱠᱷᱟᱱᱰᱟᱼᱵᱷᱟᱱᱰᱟᱣᱟᱱᱛᱮ ᱡᱟᱨᱣᱟᱣᱟᱠᱟᱱ ᱦᱚᱲᱠᱤᱱ ᱧᱟᱢᱠᱮᱫᱠᱳᱣᱟ᱾ ᱠᱮᱱᱟᱨᱟᱢ ᱫᱚᱭ ᱵᱚᱛᱚᱨᱧᱚᱜᱼᱮᱱᱜᱮᱭᱟ ᱢᱮᱱᱠᱷᱟᱱ ᱫᱚᱨᱚᱜᱟ ᱫᱚ ᱵᱟᱭ ᱞᱟᱹᱵᱽᱲᱩᱡᱞᱮᱱᱟ᱾ ᱫᱚᱨᱚᱜᱟ ᱟᱨ ᱠᱮᱱᱟᱨᱟᱢ ᱫᱚ ᱡᱟᱨᱣᱟᱣᱟᱠᱟᱱ ᱯᱷᱟᱹᱫᱽᱠᱳ ᱛᱟᱞᱟᱛᱮᱠᱤᱱ ᱯᱟᱨᱚᱢ ᱪᱟᱞᱟᱜᱠᱟᱱ ᱛᱟᱦᱮᱸᱠᱟᱱᱟ ᱟᱨ ᱩᱱᱤᱨᱮᱱ ᱫᱚᱞᱵᱽᱵᱚᱞᱠᱳ ᱫᱚ ᱩᱱᱠᱤᱱ ᱛᱟᱭᱚᱢ ᱛᱟᱭᱚᱢᱛᱮᱠᱳ ᱪᱟᱞᱟᱜᱠᱟᱱ ᱛᱟᱦᱮᱸᱠᱟᱱᱟ᱾ ᱫᱚᱨᱚᱜᱟ ᱫᱚ ᱟᱹᱰᱤ ᱟᱸᱴ ᱟᱲᱟᱝᱛᱮᱭ ᱢᱮᱱᱠᱮᱫᱟᱼ “ᱚᱠᱚᱭ ᱦᱩᱠᱩᱢᱛᱮᱯᱮ ᱡᱟᱨᱣᱟᱣᱟᱠᱟᱱᱟ?” ᱡᱟᱨᱣᱟ ᱯᱷᱟᱹᱫᱽ ᱠᱷᱚᱱ ᱫᱟᱹᱲᱟᱣᱢᱮᱱᱛᱮ ᱟᱲᱟᱝ ᱟᱧᱡᱚᱢᱮᱱᱟᱼ “ᱮᱭᱟ ᱥᱮᱛᱟ, ᱟᱞᱮᱨᱮᱱ ᱱᱩᱠᱤᱱ ᱨᱟᱡᱽ ᱥᱟᱢᱟᱝᱨᱮ ᱢᱟᱱᱚᱛ ᱩᱫᱩᱜᱽᱵᱮᱱ᱾” ᱫᱚᱨᱚᱜᱟ ᱫᱚᱭ ᱧᱮᱞᱠᱮᱫᱟᱟ ᱡᱮ, ᱨᱟᱹᱠᱠᱷᱤ ᱥᱤᱯᱟᱹᱦᱤᱭᱟᱱᱛᱮ ᱵᱟᱨᱮᱭᱟ ᱡᱩᱟᱹᱱ ᱡᱩᱟᱹᱱ ᱠᱚᱲᱟᱭ ᱧᱮᱞ ᱧᱟᱢᱠᱮᱫᱠᱤᱱᱟᱹ᱾ ᱢᱤᱫ ᱦᱚᱲ ᱫᱚ ᱠᱮᱴᱮᱡ ᱛᱟᱹᱵᱩᱡᱟᱛᱮ ᱫᱚᱨᱚᱜᱟᱭ ᱨᱚᱲ ᱟᱧᱡᱚᱢᱟᱫᱮᱭᱟ, ᱢᱮᱱᱠᱷᱟᱱ ᱫᱚᱨᱚᱜᱟ ᱫᱚ ᱩᱱᱠᱤᱱ ᱠᱚᱲᱟᱭ ᱫᱷᱟᱢᱠᱟᱣᱠᱮᱫᱠᱤᱱᱟᱹ᱾ ᱢᱮᱛᱟᱫᱠᱤᱱᱟᱹᱭᱼ “ᱦᱮᱱᱫᱟ ᱭᱟ ᱚᱠᱚᱭ ᱠᱟᱱᱟᱵᱮᱱ ᱟᱵᱮᱱ ᱫᱳ? ᱥᱟᱨᱠᱟᱨ ᱩᱯᱟᱹᱨᱛᱮᱵᱮᱱ ᱪᱟᱞᱟᱜᱠᱟᱱᱛᱮ ᱥᱟᱹᱡᱟᱹᱭ ᱧᱟᱢ ᱞᱮᱠ ᱦᱚᱲ ᱠᱟᱱᱟᱵᱮᱱ᱾” ᱠᱟᱹᱱᱦᱩ ᱫᱚ ᱟᱸᱴ ᱟᱲᱟᱝᱛᱮᱭ ᱢᱮᱱᱠᱮᱫᱟᱼ “ᱪᱮᱫ ᱤᱟᱹᱛᱮ ᱤᱧᱟᱜ ᱵᱮᱜᱚᱨ ᱦᱩᱠᱩᱢᱛᱮ ᱤᱧᱟᱜ ᱫᱤᱥᱟᱹᱢᱨᱮᱱ ᱦᱚᱲᱮᱢ ᱥᱟᱵᱠᱮᱫᱠᱳᱣᱟ ᱚᱱᱮ ᱳᱱᱠᱳᱨᱮ ᱡᱟᱦᱟᱱ ᱠᱟᱹᱥᱩᱨᱜᱮ ᱵᱟᱹᱱᱩᱠ? ᱛᱚᱱᱚᱞ ᱨᱟᱲᱟᱜᱚᱫ ᱠᱟᱛᱟᱠᱳᱢ᱾” ᱫᱚᱨᱚᱜᱟ ᱫᱚ ᱮᱫᱽᱨᱮᱭᱮᱱᱛᱮᱭ ᱢᱮᱱᱠᱮᱫᱟᱼ “ᱥᱚᱱᱛᱚᱨᱚᱜᱢᱮ! ᱡᱚᱴᱮᱫ ᱟᱞᱚᱢ ᱡᱚᱴᱮᱫᱠᱳᱣᱟ᱾ ᱚᱠᱚᱭ ᱠᱟᱱᱟᱵᱮᱱ ᱟᱵᱮᱱ ᱫᱚ? ᱥᱟᱨᱠᱟᱨᱟᱜ ᱠᱟᱹᱢᱤᱨᱮ ᱛᱤᱵᱮᱱ ᱞᱟᱜᱟᱣᱮ̠ᱫᱠᱟᱱᱟ, ᱟᱵᱮᱱ ᱫᱚ ᱚᱠᱚᱭ?” ᱨᱚᱲ ᱨᱩᱟᱹᱲᱠᱮᱫᱟᱠᱤᱱᱼ “ᱟᱹᱞᱤᱧ ᱫᱚ ᱥᱤᱫᱷᱳ ᱟᱨ ᱠᱟᱹᱱᱦᱩ ᱠᱟᱱᱟᱞᱤᱧ, ᱱᱳᱣᱟ ᱫᱚ ᱟᱹᱞᱤᱧᱟᱜ ᱫᱤᱥᱟᱹᱢ ᱠᱟᱱᱟ᱾ ᱛᱚᱱᱚᱞ ᱨᱟᱲᱟᱜᱚᱫᱛᱟᱠᱳᱵᱮᱱ ᱟᱨ ᱥᱟᱫᱚᱢ ᱠᱷᱚᱱ ᱯᱷᱮᱰ ᱜᱚᱫᱚᱜᱵᱮᱱ᱾” ᱟᱨᱦᱚᱸᱠᱤᱱ ᱢᱮᱱᱠᱮᱫᱟᱼ “ᱪᱷᱟᱛᱟᱨ ᱨᱮᱡᱠᱤᱱᱯᱮ, ᱥᱟᱫᱚᱢ ᱫᱚ ᱞᱟᱜᱟᱜᱚᱫᱠᱟᱹᱠᱤᱱᱯᱮ, ᱱᱳᱠᱳ ᱦᱚᱲᱟᱜ ᱛᱚᱞ ᱨᱟᱲᱟᱭᱛᱟᱠᱳᱯᱮ᱾” ᱠᱷᱟᱱ ᱫᱚᱨᱚᱜᱟ ᱟᱨ ᱠᱮᱱᱟᱨᱟᱢ ᱵᱷᱚᱜᱚᱛ ᱛᱟᱹᱠᱤᱱ ᱫᱚ ᱥᱤᱫᱷᱳ ᱟᱨ ᱠᱟᱹᱱᱦᱩ ᱥᱟᱢᱟᱝᱨᱮᱠᱳ ᱰᱚᱵᱚᱜ ᱳᱪᱳᱠᱮᱫᱠᱤᱱᱟᱹ᱾ ᱩᱱᱨᱮ ᱥᱤᱫᱷᱳ ᱟᱨ ᱠᱟᱹᱱᱦᱩ ᱠᱤᱱ ᱢᱮᱱᱠᱮᱫᱟᱼ “ᱱᱳᱠᱳ ᱦᱚᱲᱟᱜ ᱫᱚ ᱟᱹᱞᱤᱧᱜᱮᱞᱤᱧ ᱵᱤᱪᱟᱹᱨᱛᱟᱠᱳᱣᱟ, ᱢᱟ ᱟᱵᱮᱱ ᱫᱚ ᱥᱮᱱᱡᱚᱝᱵᱮᱱ᱾” ᱫᱚᱨᱚᱜᱟ ᱫᱚᱭ ᱢᱮᱱᱠᱮᱫᱟᱼ “ᱟᱹᱠᱤᱞᱟᱱ ᱦᱚᱲ ᱞᱮᱠᱟ ᱠᱟᱹᱢᱤᱵᱮᱱ, ᱟᱨ ᱫᱮᱱᱠᱳ ᱦᱚᱲ ᱮᱢ ᱨᱩᱟᱹᱲᱟᱧᱵᱮᱱ, ᱟᱨ ᱫᱮᱱᱠᱤᱱ ᱥᱟᱫᱚᱢᱛᱟᱹᱞᱤᱧ᱾” ᱜᱟᱫᱮᱞ ᱦᱚᱲ ᱢᱩᱫᱽ ᱠᱷᱚᱱ ᱢᱤᱫ ᱦᱚᱲᱮ ᱢᱮᱱᱠᱮᱫᱟᱼ “ᱪᱮᱞᱮᱠᱟᱱᱟᱠᱤᱱ ᱭᱟ, ᱱᱩᱠᱤᱱ ᱫᱚ ᱢᱟᱦᱟᱨᱟᱡᱽ ᱥᱟᱢᱟᱝᱨᱮ ᱥᱟᱫᱚᱢᱨᱮ ᱫᱮᱡᱚᱜᱠᱤᱱ ᱫᱤᱞᱮᱫᱠᱟᱱ ᱫᱳ !” ᱫᱚᱨᱚᱜᱟ ᱫᱚ ᱠᱩᱨᱠᱩᱨᱟᱹᱣᱟᱛᱮᱭ ᱨᱚᱲᱜᱚᱫᱠᱮᱫᱟᱼ “ᱚᱠᱚᱭ ᱠᱤᱱ ᱥᱟᱨᱠᱟᱨ ᱵᱟᱦᱟᱫᱩᱨᱤᱠᱤᱱ ᱱᱤᱦᱟᱹᱛᱟᱠᱟᱣᱟᱱ, ᱩᱱᱠᱤᱱ ᱦᱚᱸ ᱱᱳᱝᱠᱟᱜᱮᱧ ᱛᱚᱞᱠᱤᱱᱟᱹ᱾” ᱫᱤᱥᱟᱹᱢ ᱦᱚᱲ ᱚᱱᱟ ᱠᱟᱛᱷᱟ ᱟᱧᱡᱚᱢᱠᱟᱛᱮ ᱮᱫᱽᱨᱮᱛᱮ ᱠᱤᱥ ᱠᱤᱥᱠᱳ ᱟᱹᱭᱠᱟᱹᱣᱠᱮᱫᱟ᱾ ᱠᱷᱟᱱᱜᱮ ᱛᱚᱞ ᱦᱚᱲ ᱢᱤᱫ ᱢᱤᱫᱛᱮᱠᱳ ᱨᱟᱲᱟᱠᱮᱫᱠᱳᱣᱟ᱾ ᱠᱮᱱᱟᱨᱟᱢ ᱩᱯᱟᱹᱨᱛᱮ ᱜᱟᱹᱨᱵᱷᱩᱣᱟᱜ ᱮᱫᱽᱨᱮ ᱥᱮᱝᱜᱮᱞ ᱫᱚ ᱫᱩᱜᱩᱨ ᱫᱩᱜᱩᱨᱮᱱᱛᱟᱭᱟ᱾ ᱢᱤᱫ ᱦᱚᱲ ᱴᱷᱮᱱ ᱠᱷᱚᱱ ᱠᱟᱹᱯᱤᱭ ᱦᱟᱛᱟᱣᱜᱚᱫᱠᱮᱫᱟ ᱟᱨ ᱦᱚᱦᱚᱣᱟᱛᱮᱭ ᱢᱮᱱᱠᱮᱫᱟᱼ “ᱦᱩᱞ! ᱦᱩᱞ!” ᱤᱱᱟᱹ ᱢᱮᱱᱠᱟᱛᱮᱜ ᱠᱮᱱᱟᱨᱟᱢ ᱵᱷᱚᱜᱚᱛᱮ ᱦᱩᱵᱟᱹᱜ ᱠᱩᱱᱰᱞᱟᱹᱠᱮᱫᱮᱭᱟ, ᱟᱱᱫᱷᱮᱼᱯᱟᱹᱛᱷᱟᱹᱣᱲᱤ ᱡᱟᱦᱟᱸ ᱢᱟᱱ ᱛᱟᱦᱟᱸᱭ ᱦᱩᱩᱵᱟᱹᱜ ᱥᱟᱹᱨᱠᱮᱫᱮᱭᱟ᱾ ᱜᱟᱫᱮᱞ ᱦᱚᱲ ᱚᱱᱟ ᱩᱯᱟᱹᱨᱨᱮᱜᱮᱠᱳ ᱦᱩᱵᱟᱹᱜᱠᱮᱫᱮᱭᱟ ᱟᱨᱠᱳ ᱦᱚᱦᱚᱠᱮᱫᱟᱼ “ᱦᱩᱞ! ᱦᱩᱞ!” ᱜᱟᱹᱨᱵᱷᱩ ᱫᱚ ᱛᱷᱟᱨᱛᱷᱟᱨᱟᱣᱜᱠᱟᱱ ᱫᱚᱨᱚᱜᱟ ᱴᱷᱮᱱᱮ ᱥᱮᱱ ᱥᱳᱨᱜᱚᱫᱼᱮᱱᱟ᱾ ᱫᱚᱨᱚᱜᱟ ᱫᱚ ᱫᱟᱹᱲ ᱯᱟᱹᱥᱠᱩᱡᱚᱜᱼᱮ ᱢᱮᱱᱞᱮᱫᱟ, ᱢᱮᱱᱠᱷᱟᱱ ᱵᱟᱭ ᱫᱟᱹᱲ ᱫᱟᱲᱮᱭᱟᱫᱟ᱾ ᱜᱟᱹᱨᱵᱷᱩ ᱫᱚ ᱦᱚᱦᱚᱣᱟᱛᱮᱭ ᱢᱮᱱᱠᱮᱫᱟᱼ “ᱫᱚᱨᱚᱜᱟ ᱥᱩᱢᱟᱹᱨᱮᱯᱮ! ᱫᱚᱨᱚᱜᱟ ᱥᱩᱢᱟᱹᱨᱮᱯᱮ!” ᱥᱳᱨᱨᱮ ᱥᱮᱱᱠᱟᱛᱮᱭ ᱢᱟᱜᱮᱠᱟᱱ ᱛᱟᱦᱮᱸᱠᱟᱱᱟ, ᱢᱮᱱᱠᱷᱟᱱ ᱛᱤᱭ ᱥᱟᱵ ᱫᱟᱨᱟᱢᱠᱮᱫᱛᱟᱭᱟ᱾ ᱤᱨᱪᱤ ᱪᱷᱟᱰᱟᱣᱠᱟᱛᱮ ᱟᱨ ᱦᱚᱸ ᱫᱚᱥᱟᱨ ᱫᱷᱟᱣᱮ̠ ᱦᱩᱵᱟᱹᱜᱠᱮᱫᱮᱭᱟ, ᱟᱨ ᱮᱠᱟᱞᱛᱮᱭ ᱥᱩᱢᱟᱹᱨ ᱩᱛᱟᱹᱨᱠᱮᱫᱮᱭᱟ᱾ ᱫᱚᱨᱚᱜᱟ ᱥᱟᱶᱛᱮᱱ ᱯᱩᱞᱤᱥ ᱟᱨ ᱠᱮᱱᱟᱨᱟᱢ ᱵᱷᱚᱜᱚᱛᱨᱮᱱ ᱦᱚᱲ ᱫᱟᱹᱲᱠᱳ ᱫᱳᱠᱳ ᱫᱟᱹᱲᱠᱮᱫᱟ ᱟᱨ ᱥᱟᱨᱮᱡᱠᱳ ᱫᱳᱠᱳ ᱢᱟᱜᱜᱚᱡᱠᱮᱛᱠᱳᱣᱟ᱾ ᱦᱚᱲᱠᱳ ᱨᱚᱠᱚᱛ ᱢᱩᱦᱟᱹ ᱪᱟᱵᱟᱭᱮᱱᱟ᱾ ᱠᱟᱹᱱᱦᱩᱭ ᱦᱚᱦᱚᱜᱚᱫᱠᱮᱫᱟᱼ “ᱦᱩᱞ! ᱦᱩᱞ!” ᱥᱟᱶᱛᱮᱱᱠᱳ ᱦᱚᱸ ᱦᱚᱦᱚᱣᱟᱛᱮ ᱩᱢᱛᱟᱹ ᱩᱢᱛᱤᱠᱳ ᱫᱚᱱᱠᱮᱫᱟ᱾ ᱚᱱᱮ ᱩᱱᱠᱷᱚᱱᱜᱮ ᱢᱮᱛᱟᱜᱢᱮ ᱑᱘᱕᱕ ᱥᱟᱞ ᱡᱩᱱᱮ ᱐᱗ ᱛᱟᱹᱨᱤᱠ ᱦᱤᱞᱚᱜ ᱦᱩᱞ ᱫᱚ ᱮᱦᱚᱵᱮᱱᱟ᱾
ᱞᱟᱹᱲᱦᱟᱹᱭ ᱪᱟᱞᱟᱣ ᱤᱫᱤ ᱞᱟᱹᱜᱤᱫ ᱥᱟᱯᱲᱟᱣᱜ:
ᱥᱤᱫᱷᱚ ᱟᱨ ᱠᱟᱹᱱᱦᱩ ᱫᱚ ᱯᱟᱧᱪᱠᱟᱹᱴᱷᱤᱟᱹᱨᱮᱠᱤᱱ ᱛᱟᱦᱮᱸᱠᱟᱱᱟ᱾ ᱜᱳᱴᱟ ᱫᱤᱥᱟᱹᱢ ᱰᱷᱟᱹᱨᱣᱟᱹᱜᱠᱤᱱ ᱟᱥᱮᱱ ᱳᱪᱳᱠᱮᱫᱟ, ᱡᱮᱢᱚᱱ ᱫᱤᱥᱟᱹᱢ ᱦᱚᱲ ᱫᱮᱠᱳ ᱦᱚᱯᱚᱱ ᱛᱩᱞᱩᱡ ᱞᱟᱹᱲᱦᱟᱹᱭ ᱞᱟᱹᱜᱤᱫᱠᱳ ᱥᱟᱯᱲᱟᱣ ᱦᱚᱫᱚᱜ᱾ ᱫᱤᱥᱟᱹᱢ ᱦᱚᱲ ᱥᱚᱢᱵᱟᱫᱽ ᱥᱮᱴᱮᱨᱟᱫᱠᱳ ᱛᱳᱨᱟᱜᱮ ᱫᱟᱲᱮ ᱫᱟᱲᱮᱭᱟᱱ ᱦᱚᱲᱠᱳ ᱵᱟᱪᱷᱟᱣᱠᱮᱫᱠᱳᱣᱟ᱾ ᱚᱱᱟ ᱚᱠᱛᱮ ᱥᱟᱨᱠᱟᱨ ᱫᱚ ᱨᱮᱞ ᱥᱚᱲᱳᱠᱮ ᱵᱮᱱᱟᱣᱠᱟᱱ ᱛᱟᱦᱮᱸᱠᱟᱱᱛᱮ ᱡᱩᱟᱹᱱ ᱠᱳᱲᱟᱠᱳ ᱟᱨ ᱫᱟᱲᱮ ᱫᱟᱲᱮᱭᱟᱱ ᱦᱮᱨᱮᱞᱠᱳ ᱥᱚᱲᱚᱠ ᱠᱟᱹᱢᱤᱠᱳ ᱥᱮᱱᱟᱠᱟᱱ ᱛᱟᱦᱮᱸᱠᱟᱱᱟ᱾ ᱩᱥᱟᱹᱨᱟᱛᱮ ᱦᱚᱲ ᱠᱳᱞᱠᱚᱛᱮ ᱞᱟᱹᱲᱦᱟᱹᱭᱛᱮ ᱥᱮᱱᱚᱜ ᱞᱟᱹᱜᱤᱫᱠᱳ ᱥᱟᱯᱲᱟᱣ ᱳᱪᱳᱠᱮᱫᱠᱳᱣᱟ᱾ ᱫᱤᱥᱟᱹᱢ ᱦᱚᱲ ᱩᱥᱠᱩᱨᱠᱳᱣᱟ ᱢᱮᱱᱛᱮ ᱟᱹᱰᱤ ᱞᱮᱠᱟᱱ ᱩᱯᱟᱹᱭᱠᱳ ᱞᱟᱜᱟᱣᱠᱮᱫᱟ᱾ ᱢᱤᱫᱴᱮᱱ ᱫᱚ ᱱᱳᱣᱟ ᱩᱯᱟᱹᱭᱠᱳ ᱞᱟᱜᱟᱣᱞᱟᱜᱼᱟ᱾ ᱠᱟᱛᱷᱟᱭ ᱵᱟᱵᱟᱨ ᱫᱚᱞ ᱦᱚᱲ ᱛᱩᱢᱫᱟᱜᱼᱟᱱᱛᱮ ᱟᱛᱳ ᱟᱛᱳᱠᱳ ᱫᱟᱸᱲᱟᱸᱠᱮᱫᱟ᱾ ᱯᱟᱹᱦᱤᱞ ᱫᱚᱞ ᱦᱚᱲ ᱡᱟᱦᱟᱸ ᱟᱛᱳᱠᱳ ᱵᱚᱞᱚᱜᱼᱟ, ᱱᱟᱹᱢᱩᱱᱟ ᱞᱮᱠᱟᱠᱳ ᱢᱮᱱᱟ ᱢᱮᱛᱟᱜᱢᱮ ᱫᱷᱟᱱᱡᱩᱲᱤ ᱟᱛᱛᱳᱛᱮ ᱱᱳᱝᱠᱟ ᱦᱚᱦᱚᱣᱟᱛᱮ ᱟᱨ ᱛᱩᱢᱫᱟᱜ ᱨᱩ ᱨᱩᱛᱮᱠᱳ ᱵᱚᱞᱚ ᱯᱟᱨᱚᱢᱚᱜᱼᱟᱼ
“ᱫᱷᱟᱱᱡᱩᱲᱤ ᱦᱮ!
ᱰᱷᱚᱞ ᱵᱟᱡᱮ ᱦᱮ!
ᱰᱷᱟᱠ ᱵᱟᱡᱮ ᱦᱮ!
ᱥᱤᱫᱷᱳ, ᱠᱟᱹᱱᱦᱩ, ᱪᱟᱱᱫᱽ, ᱵᱷᱟᱭᱨᱚ
ᱦᱩᱞᱮ ᱦᱩ ᱞᱮ!
ᱦᱩᱞᱮ ᱦᱩ ᱞᱮ!
ᱦᱩᱞᱮ ᱦᱩ ᱞᱮ!
ᱛᱩᱢᱫᱟᱜᱠᱳ ᱨᱩᱜᱚᱫᱟ ᱟᱨ ᱨᱩ ᱥᱟᱰᱮ ᱞᱮᱠᱟᱜᱮ ᱫᱚᱞᱨᱮᱱᱠᱳ ᱦᱚᱦᱚᱭᱟᱼ
ᱦᱟᱹᱯᱩᱡ ᱦᱟᱹᱯᱩᱡ ᱫᱮᱞᱟᱝ ᱡᱟ, ᱫᱮᱞᱟᱝ ᱡᱟ!
ᱦᱟᱹᱯᱩᱡ ᱦᱟᱹᱯᱩᱡ ᱫᱮᱞᱟᱝ ᱡᱟ, ᱫᱮᱞᱟᱝ ᱡᱟ!
ᱦᱟᱹᱯᱩᱡ ᱦᱟᱹᱯᱩᱡ ᱫᱮᱞᱟᱝ ᱡᱟ, ᱫᱮᱞᱟᱝ ᱡᱟ!
ᱳᱱᱠᱟ ᱦᱚᱦᱚᱣᱟᱛᱮ ᱟᱨ ᱨᱩ ᱨᱩᱛᱮ ᱟᱛᱳᱠᱳ ᱵᱚᱞᱚᱜᱼᱟ, ᱠᱩᱞᱦᱤᱨᱮ ᱵᱟᱠᱳ ᱛᱮᱝᱜᱳᱱᱟ, ᱮᱴᱟᱜ ᱟᱛᱳᱛᱮᱠᱳ ᱪᱟᱞᱟᱜᱼᱟ᱾ ᱳᱱᱠᱳ ᱯᱟᱨᱚᱢ ᱪᱟᱞᱟᱜ ᱛᱚᱨᱟ ᱫᱚᱥᱟᱨ ᱫᱚᱞᱠᱳ ᱵᱚᱞᱚᱜᱼᱟ᱾ ᱳᱱᱠᱳ ᱫᱚ ᱟᱛᱳ ᱦᱚᱲ ᱪᱤᱜᱟᱹᱨᱤ ᱟᱨᱠᱳ ᱥᱤᱲᱚᱜᱟᱣᱴᱳᱣᱟᱠᱳᱣᱟ, ᱡᱮᱢᱚᱱᱠᱳ ᱞᱟᱡᱟᱣᱜ ᱟᱨ ᱞᱟᱹᱴᱷᱟᱹᱭ ᱞᱟᱹᱜᱤᱫᱠᱳ ᱩᱥᱠᱩᱨᱚᱜ᱾ ᱱᱚᱜᱼᱚᱮ ᱱᱚᱝᱠᱟ ᱦᱚᱦᱚᱛᱮ ᱟᱨ ᱨᱩ ᱨᱩᱛᱮ ᱟᱛᱳᱠᱳ ᱵᱚᱞᱚ ᱯᱟᱨᱚᱢᱚᱜᱼᱟᱼ
ᱫᱷᱟᱱᱡᱩᱲᱤ ᱦᱮ!
ᱡᱟᱹᱱᱤ ᱦᱳᱭᱞᱳ ᱢᱚ ᱨᱚᱫᱽ!
ᱢᱚᱨᱚᱫᱽ ᱦᱳᱭᱞᱳ ᱡᱟᱹ ᱱᱤ!
ᱦᱮᱦᱮ ᱦᱮ ᱦᱮ!
ᱦᱮᱦᱮ ᱦᱮ ᱦᱮ!
ᱟᱫᱚ ᱛᱩᱢᱫᱟᱜᱠᱳ ᱨᱩᱜᱚᱫᱟ ᱟᱨ ᱛᱩᱢᱫᱟᱜ ᱥᱟᱰᱮ ᱥᱟᱶ ᱥᱟᱶᱛᱮ ᱨᱟᱹᱜᱟᱹᱣ ᱨᱟᱹᱜᱟᱹᱣ ᱢᱤᱫ ᱡᱚᱢᱚᱠᱛᱮᱠᱳ ᱦᱚᱦᱚᱭᱟᱼ
ᱵᱮᱡᱟᱭ ᱵᱮᱡᱟᱭ ᱫᱷᱟᱹᱯᱩᱡ ᱫᱷᱟᱹᱯᱩᱡ!
ᱵᱮᱡᱟᱭ ᱵᱮᱡᱟᱭ ᱫᱷᱟᱹᱯᱩᱡ ᱫᱷᱟᱹᱯᱩᱡ!
ᱵᱮᱡᱟᱭ ᱵᱮᱡᱟᱭ ᱫᱷᱟᱹᱯᱩᱡ ᱫᱷᱟᱹᱯᱩᱡ!
ᱟᱛᱳ ᱵᱚᱞᱚ ᱯᱟᱨᱚᱢ ᱛᱳᱨᱟ ᱫᱚᱥᱟᱨ ᱫᱚᱞ ᱫᱚ ᱯᱟᱹᱦᱤᱞ ᱫᱚᱞᱨᱮᱱᱠᱳ ᱟᱧᱡᱟ ᱤᱫᱤᱠᱳᱣᱟ᱾ ᱳᱱᱠᱟ ᱳᱱᱠᱟᱛᱮ ᱛᱷᱳᱲᱟ ᱫᱤᱱᱛᱮᱜᱮ ᱫᱤᱥᱟᱹᱢ ᱦᱚᱲᱠᱳ ᱩᱢᱡᱷᱟᱹᱣᱠᱮᱫᱠᱳᱣᱟ ᱟᱨ ᱞᱟᱹᱲᱦᱟᱹᱭ ᱞᱟᱹᱜᱤᱫ ᱦᱚᱲᱠᱳ ᱥᱟᱯᱲᱟᱣᱮᱱᱟ᱾ ᱠᱷᱟᱱᱜᱮ ᱩᱛᱟᱹᱨ ᱫᱟᱹᱠᱷᱤᱱ ᱯᱩᱨᱩᱵᱽ ᱯᱟᱹᱪᱷᱤᱢ ᱠᱷᱚᱱ ᱥᱤᱫᱷᱳ ᱠᱟᱹᱱᱦᱩ ᱴᱷᱮᱱ ᱦᱚᱲ ᱡᱟᱨᱣᱟᱜᱠᱳ ᱯᱚᱛᱚᱱᱠᱮᱫᱟ᱾ ᱯᱤᱯᱴᱟᱹᱨᱮᱱ ᱪᱟᱱᱫᱽᱨᱟᱭ ᱫᱚ ᱞᱟᱹᱲᱦᱟᱹᱭ ᱥᱤᱯᱟᱹᱦᱤᱠᱳ ᱢᱩᱫᱽᱨᱮ ᱡᱚᱛᱚ ᱦᱚᱲ ᱠᱷᱚᱱ ᱥᱚᱨᱚᱥ ᱵᱤᱨᱵᱟᱱᱴᱟᱭ ᱦᱳᱭᱮᱱᱟ, ᱟᱨ ᱳᱱᱟ ᱤᱟᱹᱛᱮ ᱥᱤᱫᱷᱳ ᱟᱨ ᱠᱟᱹᱱᱦᱩ ᱛᱟᱹᱠᱤᱱ ᱫᱚ ᱟᱹᱰᱤᱠᱤᱱ ᱠᱩᱥᱤᱭᱟᱫᱮᱭᱟ ᱟᱨ ᱟᱹᱠᱤᱱ ᱥᱟᱸᱛᱮᱠᱤᱱ ᱫᱚᱦᱚᱠᱮᱫᱮᱭᱟ᱾ ᱥᱟᱦᱮᱵᱽᱠᱳᱠᱳ ᱟᱸᱴᱚᱜ ᱠᱷᱟᱱ ᱩᱱᱤ ᱫᱚ ᱳᱱᱠᱳ ᱵᱤᱨᱩᱫᱽ ᱨᱮᱦᱚᱸᱮ ᱞᱟᱹᱲᱦᱟᱹᱭᱟ ᱟᱨ ᱫᱮᱠᱳ ᱞᱩᱴᱯᱟᱴᱠᱳ ᱞᱟᱹᱜᱤᱫ ᱦᱚᱨᱮ ᱥᱟᱯᱷᱟᱭᱟ᱾ ᱮᱱᱮ ᱟᱫᱚ ᱡᱟᱭᱜᱟ ᱡᱟᱭᱜᱟᱨᱮ ᱦᱚᱲ ᱦᱚᱯᱚᱱᱠᱳ ᱞᱩᱴᱯᱟᱴ ᱟᱨ ᱳᱲᱟᱜ ᱡᱮᱨᱮᱫᱠᱳ ᱮᱦᱚᱵᱠᱮᱫᱟ᱾
ᱞᱤᱞ ᱪᱟᱥᱨᱮᱱ ᱥᱟᱦᱮᱵᱟᱜ ᱜᱷᱚᱴᱱᱟ:
ᱢᱤᱫ ᱫᱤᱱ ᱞᱤᱞ ᱪᱟᱥᱨᱮᱱ ᱥᱟᱦᱮᱵᱽ ᱫᱳ ᱦᱟᱹᱛᱤᱭᱟᱱᱛᱮ ᱟᱡᱨᱮᱱ ᱵᱟᱨᱮᱭᱟ ᱜᱤᱫᱽᱨᱟᱹ ᱥᱚᱝᱜᱮ ᱠᱟᱛᱮᱜ ᱵᱟᱨ ᱥᱟᱭ (᱒᱐᱐) ᱥᱤᱯᱟᱹᱦᱤᱭᱟᱱᱛᱮ ᱦᱚᱲ ᱦᱚᱯᱚᱱ ᱡᱩᱢᱤ ᱠᱷᱚᱱ ᱞᱟᱜᱟ ᱚᱪᱚᱜᱠᱳ ᱢᱮᱱᱛᱮᱭᱮ ᱢᱚᱦᱚᱱᱰᱟᱭᱮᱱᱟ᱾ ᱦᱚᱲ ᱦᱚᱯᱚᱱᱠᱳ ᱫᱚ ᱩᱱᱤ ᱛᱟᱸᱲᱟᱸᱜᱼᱟᱮᱨᱮ ᱵᱤᱨ ᱜᱟᱡᱟᱲᱨᱮᱠᱳ ᱳᱠᱳᱣᱟᱠᱟᱱ ᱛᱟᱦᱮᱸᱠᱟᱱᱟ᱾ ᱩᱱᱤᱨᱮᱱ ᱥᱤᱯᱟᱹᱦᱤᱠᱳ ᱟᱨ ᱵᱟᱹᱱᱫᱩᱠ ᱫᱚ ᱚᱠᱟ ᱠᱟᱹᱢᱤᱨᱮᱜᱮ ᱵᱟᱝ ᱡᱳᱡᱟᱣᱞᱮᱱᱟ᱾ ᱵᱤᱨ ᱵᱷᱤᱛᱨᱤ ᱠᱷᱚᱱᱜᱮ ᱟᱹᱯᱟᱹᱲᱤ ᱫᱚ ᱵᱮᱡᱷᱟ ᱛᱩᱧ ᱞᱮᱠᱟ ᱥᱟᱱᱟᱢ ᱥᱮᱡ ᱠᱷᱚᱱ ᱦᱤᱡᱩᱜᱠᱟᱱ ᱛᱟᱦᱮᱸᱠᱟᱱᱟ᱾ ᱵᱟᱨ ᱥᱟᱭ (᱒᱐᱐) ᱥᱤᱯᱟᱹᱦᱤᱠᱳ ᱫᱟᱹᱲ ᱯᱟᱹᱱᱰᱩᱡᱠᱮᱫᱟ᱾ ᱛᱤᱱᱨᱮ ᱞᱤᱞ ᱪᱟᱥ ᱥᱟᱦᱮᱵᱽ ᱫᱚ ᱢᱤᱫᱴᱮᱱ ᱦᱚᱲ ᱦᱚᱯᱚᱱᱮ ᱴᱷᱩ ᱜᱚᱡᱠᱮᱫᱮᱭᱟ ᱩᱱᱨᱮᱜᱮ ᱦᱚᱲ ᱦᱚᱯᱚᱱᱠᱳ ᱩᱱᱤᱠᱳ ᱛᱩᱧ ᱜᱚᱡᱠᱮᱫᱮᱭᱟ᱾ ᱱᱤᱟᱹ ᱫᱷᱚᱢᱟᱜ ᱞᱟᱹᱲᱦᱟᱹᱭᱨᱮᱱ ᱪᱟᱜᱞᱟᱣᱤᱡ ᱫᱚ ᱪᱟᱱᱫᱽᱨᱟᱭ ᱯᱟᱨᱜᱟᱱᱟᱭ ᱛᱟᱦᱮᱸᱠᱟᱱᱟ᱾ ᱞᱤᱞ ᱪᱟᱥᱨᱮᱱ ᱥᱟᱦᱮᱵᱟᱜ ᱵᱟᱹᱱᱫᱩᱠ, ᱦᱟᱹᱛᱤ ᱟᱨ ᱥᱟᱱᱟᱢ ᱡᱤᱱᱤᱥ ᱦᱟᱛᱟᱣᱠᱟᱛᱮ ᱥᱤᱦᱫᱳ ᱟᱨ ᱠᱟᱹᱱᱦᱩ ᱴᱷᱮᱱᱠᱳ ᱤᱫᱤᱠᱮᱫᱟ ᱡᱮᱢᱚᱱ ᱚᱱᱟᱠᱳ ᱥᱟᱱᱟᱢ ᱡᱤᱱᱤᱥ ᱫᱚ ᱥᱟᱱᱟᱢ ᱦᱚᱲᱠᱳᱣᱟᱜ ᱩᱯᱠᱟᱹᱨ ᱞᱟᱹᱜᱤᱫ ᱵᱮᱣᱦᱟᱨᱚᱜ᱾ ᱛᱟᱭᱚᱢᱛᱮ ᱦᱚᱲ ᱦᱚᱯᱚᱱᱠᱳ ᱫᱚ ᱥᱟᱦᱮᱵᱽᱜᱚᱧᱡᱽ ᱵᱟᱡᱟᱨ ᱞᱩᱴᱯᱟᱴ ᱞᱟᱹᱜᱤᱫᱛᱮᱠᱳ ᱪᱟᱞᱟᱣᱮᱱᱟ᱾ ᱥᱟᱦᱮᱵᱽᱜᱚᱧᱡᱽ ᱵᱟᱡᱟᱨᱨᱮᱱ ᱥᱟᱱᱟᱢ ᱥᱟᱦᱮᱵᱽᱠᱳ ᱫᱟᱹᱲ ᱪᱟᱵᱟᱠᱮᱫ ᱠᱷᱟᱱ ᱚᱱᱰᱮᱱᱠᱳ ᱨᱮᱝᱜᱮᱡ ᱫᱮᱠᱳ ᱦᱚᱯᱚᱱᱠᱳ ᱦᱚᱸ ᱞᱩᱴᱯᱟᱴᱠᱳ ᱫᱷᱩᱨᱟᱹᱣᱮᱱᱟ᱾ ᱫᱮᱠᱳ ᱦᱚᱯᱚᱱᱠᱳ ᱫᱚ ᱢᱳᱦᱟᱡᱚᱱᱠᱳᱣᱟᱜ ᱳᱲᱟᱜ ᱫᱩᱟᱹᱨ, ᱛᱤᱡᱽ ᱫᱩᱨᱤᱵᱽ ᱮᱠᱮᱱ ᱱᱤᱡᱟᱜ ᱩᱯᱠᱟᱹᱨ ᱞᱟᱹᱜᱤᱫᱠᱳ ᱞᱩᱴᱯᱟᱴᱮᱫᱠᱟᱱ ᱛᱟᱦᱮᱸᱠᱟᱱᱟ᱾ ᱢᱮᱱᱠᱷᱟᱱ ᱦᱚᱲ ᱦᱚᱯᱚᱱᱠᱳ ᱫᱚ ᱱᱤᱡᱟᱜ ᱩᱯᱠᱟᱹᱨ ᱞᱟᱹᱜᱤᱫᱛᱮ ᱫᱳ ᱵᱟᱝᱠᱳ ᱳᱱᱠᱟᱭᱫ ᱠᱟᱱ ᱛᱟᱦᱮᱸᱠᱟᱱᱟ, ᱵᱤᱪᱠᱚᱢ ᱦᱚᱲ ᱩᱩᱯᱠᱟᱹᱨᱚᱜ ᱞᱟᱹᱜᱤᱫᱛᱮᱜᱮ ᱥᱟᱱᱟᱢ ᱞᱩᱴᱯᱟᱴ ᱟᱹᱜᱩᱣᱟᱠᱟᱱ ᱛᱤᱡᱽ ᱫᱩᱨᱤᱵᱽ ᱫᱚ ᱵᱮᱣᱦᱟᱨᱚᱜᱠᱟᱱ ᱛᱟᱦᱮᱸᱠᱟᱱᱟ᱾ ᱢᱮᱛᱟᱜᱢᱮ ᱞᱟᱹᱲᱦᱟᱹᱭ ᱠᱷᱚᱨᱚᱪ ᱟᱨ ᱯᱷᱟᱹᱫᱽᱠᱳ ᱡᱚᱢᱼᱧᱩᱸ ᱳᱪᱳᱠᱳ ᱞᱟᱹᱜᱤᱫᱛᱮ ᱥᱟᱱᱟᱢᱟᱜ ᱫᱚ ᱵᱮᱣᱦᱟᱨ ᱪᱩᱠᱟᱹᱣᱟᱠᱟᱱ ᱛᱟᱦᱮᱸᱠᱟᱱᱟ᱾
ᱠᱳᱞᱠᱟᱛᱟ ᱨᱮᱭᱟᱜ ᱢᱤᱴᱤᱝ:
ᱱᱤᱛ ᱦᱟᱹᱵᱤᱡᱛᱮ ᱞᱟᱹᱲᱦᱟᱹᱭ ᱦᱳᱭᱮᱱᱟ ᱮᱠᱮᱱ ᱫᱤᱥᱟᱹᱢᱨᱮᱱ ᱠᱚᱪᱞᱚᱱ, ᱜᱷᱩᱸᱥ ᱡᱚᱡᱚᱢ, ᱫᱚᱨᱚᱜᱟᱼᱯᱩᱞᱤᱥ ᱟᱨ ᱳᱱᱠᱳᱨᱮᱱ ᱚᱝᱥᱳᱝᱠᱳ ᱩᱯᱟᱹᱨᱛᱮ᱾ ᱢᱮᱱᱠᱷᱟᱱ ᱥᱟᱱᱛᱟᱞ ᱯᱷᱟᱹᱫᱽᱠᱳ ᱠᱳᱞᱠᱟᱛᱟᱛᱮ ᱞᱟᱲᱦᱟᱹᱭ ᱞᱟᱹᱜᱤᱫᱛᱮ ᱪᱟᱞᱟᱜᱠᱳ ᱜᱩᱩᱴᱠᱮᱫᱟ ᱟᱨ ᱢᱤᱫᱼᱵᱟᱨ ᱤᱝᱨᱮᱡᱽ ᱥᱟᱦᱮᱵᱽ ᱦᱚᱸᱠᱳ ᱜᱚᱡᱠᱮᱫᱠᱳᱣᱟ᱾ ᱨᱟᱡᱽᱱᱤᱛᱤ ᱨᱮᱭᱟᱜ ᱦᱩᱞ ᱠᱟᱱ ᱠᱟᱨᱚᱱᱛᱮ ᱟᱨ ᱤᱝᱨᱮᱡᱽᱠᱳᱠᱳ ᱜᱚᱪ ᱵᱟᱲᱟᱭᱱᱠᱷᱟᱱ ᱠᱳᱞᱠᱟᱛᱟᱨᱮᱥᱟᱨᱠᱟᱨᱤ ᱢᱤᱴᱤᱝ ᱦᱳᱭᱮᱱᱟ᱾ ᱠᱳᱞᱠᱟᱛᱟ ᱫᱚ ᱚᱱᱟ ᱚᱠᱛᱮ ᱨᱮᱭᱟᱜ ᱨᱟᱡᱽᱫᱷᱟᱱᱤ ᱛᱟᱦᱮᱸᱠᱟᱱᱟ ᱟᱨ ᱩᱱ ᱚᱠᱛᱮ ᱵᱷᱟᱨᱚᱛ ᱫᱚ ᱯᱩᱨᱟᱹᱯᱩᱨᱤ ᱤᱝᱨᱮᱡᱽᱠᱳᱣᱟᱜ ᱫᱚᱠᱷᱚᱞᱨᱮ ᱛᱟᱦᱮᱸᱠᱟᱱᱟ᱾ ᱠᱳᱞᱠᱟᱛᱟ ᱢᱤᱴᱤᱝᱨᱮ ᱱᱳᱣᱟ ᱜᱩᱴᱮᱱᱟ ᱡᱮ, ᱡᱟᱦᱟᱸ ᱵᱟᱝ ᱡᱟᱦᱟᱸ ᱞᱮᱠᱟᱛᱮ ᱱᱳᱣᱟ ᱨᱟᱡᱽᱱᱤᱛᱤ ᱦᱩᱞ ᱫᱚ ᱫᱳᱢᱲᱟᱣᱠᱟᱛᱮ ᱪᱟᱵᱟᱭ ᱡᱟᱨᱩᱲᱜᱮᱭᱟ᱾ ᱩᱱᱨᱮ ᱛᱟᱹᱲᱤ ᱜᱷᱟᱹᱲᱤ ᱢᱮᱡᱚᱨ ᱣᱤᱱᱪᱮᱱᱛ ᱡᱳᱱᱱᱥ ᱟᱨ ᱡᱮᱱᱟᱨᱮᱞ ᱞᱭᱩᱞ ᱫᱚ ᱟᱭᱢᱟ ᱵᱤᱞᱟᱹᱛᱤ ᱯᱟᱞᱴᱚᱱ ᱱᱤᱟᱹᱛᱮ ᱥᱟᱱᱛᱟᱞ ᱯᱟᱹᱫᱽᱠᱳ ᱩᱯᱟᱹᱨᱛᱮ ᱞᱟᱹᱲᱦᱟᱹᱭᱠᱳ ᱱᱟᱱᱫᱷᱟᱣᱮᱱᱟ᱾ ᱟᱭᱢᱟ ᱤᱝᱨᱮᱡᱽ ᱯᱟᱞᱴᱚᱱᱠᱳ ᱜᱚᱡ ᱳᱪᱳᱭᱮᱱᱟ᱾ ᱥᱟᱱᱛᱟᱞ ᱯᱷᱟᱹᱫᱽᱠᱳ ᱫᱚ ᱵᱤᱨ ᱜᱟᱡᱟᱲ ᱠᱷᱚᱱ ᱟᱹᱯᱟᱹᱲᱤ ᱥᱟᱨᱠᱳ ᱛᱩᱧᱮᱫᱠᱟᱱ ᱛᱟᱦᱮᱸᱠᱟᱱᱟ᱾ ᱱᱳᱝᱠᱟᱛᱮ ᱤᱝᱨᱮᱡᱽᱠᱳ ᱫᱚ ᱦᱚᱲ ᱦᱚᱯᱚᱱᱠᱳ ᱵᱟᱝᱠᱳ ᱳᱲ ᱫᱟᱲᱮᱭᱟᱠᱳᱠᱟᱱ ᱛᱟᱦᱮᱸᱠᱟᱱᱟ᱾ ᱢᱮᱱᱠᱷᱟᱱ ᱟᱭᱢᱟ ᱫᱷᱟᱣ ᱦᱚᱲ ᱦᱚᱯᱚᱱᱠᱳ ᱫᱚ ᱤᱝᱨᱮᱡᱽᱠᱳ ᱞᱟᱭᱟᱠᱳᱠᱟᱱ ᱛᱟᱦᱮᱸᱠᱟᱱᱟ ᱡᱮ, ᱟᱠᱳ ᱵᱤᱨᱩᱫᱽᱨᱮ ᱫᱚ ᱵᱟᱝᱠᱳ ᱞᱟᱹᱲᱦᱟᱹᱭᱠᱟᱱᱟ, ᱳᱱᱠᱳ ᱫᱚ ᱮᱠᱮᱱ ᱢᱳᱦᱟᱡᱚᱱ ᱟᱨ ᱠᱚᱪᱞᱚᱱᱠᱳᱠᱳ ᱢᱚᱦᱚᱨ ᱢᱮᱴᱟᱣᱠᱳᱣᱟ ᱟᱨ ᱦᱚᱲᱟᱜ ᱡᱩᱢᱤ ᱪᱟᱥ ᱞᱟᱹᱜᱤᱫᱛᱮ ᱥᱩᱡᱚᱜᱽᱠᱳ ᱧᱟᱢ᱾ ᱢᱮᱱᱠᱷᱟᱱ ᱳᱱᱠᱳ ᱫᱚ ᱵᱟᱝᱠᱳ ᱦᱮᱛᱟᱣᱟᱫᱛᱟᱠᱳᱣᱟ᱾ ᱥᱟᱱᱟᱢ ᱜᱷᱟᱹᱲᱤᱨᱮ ᱢᱳᱦᱟᱡᱚᱱ ᱟᱨ ᱠᱚᱪᱞᱚᱱᱠᱳ ᱥᱮᱡᱠᱳ ᱛᱟᱦᱮᱸᱠᱟᱱᱟ᱾ ᱳᱱᱟᱛᱮ ᱤᱝᱨᱮᱡᱽᱠᱳᱠᱳ ᱜᱳᱡ ᱜᱷᱟᱹᱞ ᱳᱪᱳᱜᱠᱟᱱ ᱛᱟᱦᱮᱸᱠᱟᱱᱟ᱾
ᱥᱟᱝᱜᱽᱨᱟᱢᱯᱩᱨ ᱨᱮᱭᱟᱜ ᱞᱟᱹᱲᱦᱟᱹᱭ:
ᱱᱳᱣᱟ ᱞᱟᱹᱲᱦᱟᱹᱭᱨᱮ ᱤᱝᱨᱮᱡᱽᱠᱳ ᱵᱩᱡᱷᱟᱹᱣᱠᱮᱫᱟ, ᱦᱚᱲ ᱦᱚᱯᱚᱱᱟᱜ ᱛᱤᱱᱟᱹᱜ ᱢᱤᱞᱡᱩᱞ ᱟᱨ ᱫᱟᱲᱮ ᱢᱮᱱᱟᱜᱛᱟᱠᱳᱣᱟ, ᱚᱱᱮ ᱳᱱᱠᱳ ᱫᱳ ᱫᱤᱞ ᱟᱨ ᱥᱟᱦᱚᱥᱛᱮ ᱵᱤᱱ ᱵᱚᱛᱚᱨᱛᱮ ᱡᱤᱣᱤᱠᱳ ᱟᱞᱟᱭᱫᱠᱟᱱᱟ᱾ ᱢᱤᱫ ᱥᱮᱡᱨᱮᱠᱳ ᱛᱟᱦᱮᱸᱠᱟᱱᱟ ᱥᱤᱫᱷᱳ, ᱠᱟᱹᱱᱦᱩ, ᱪᱟᱱᱫᱽᱨᱟᱭ ᱯᱟᱨᱜᱟᱱᱟ ᱟᱨ ᱥᱟᱢ ᱯᱟᱨᱜᱟᱱᱟ᱾ ᱮᱴᱟᱜ ᱥᱮᱡᱨᱮᱠᱳ ᱛᱟᱦᱮᱸᱠᱟᱱᱟ ᱤᱝᱨᱮᱡᱽ, ᱥᱟᱦᱮᱵᱽᱠᱤᱱ ᱠᱚᱨᱱᱮᱞ ᱡᱳᱱᱱᱥ ᱟᱨ ᱢᱮᱡᱚᱨ ᱥᱛᱩᱣᱟᱨᱛ᱾ ᱚᱱᱟ ᱛᱟᱞᱟᱨᱮ ᱫᱟᱜ ᱡᱷᱟᱨᱱᱟ ᱱᱟᱞᱟ ᱛᱟᱦᱮᱸᱠᱟᱱᱟ᱾ ᱤᱝᱨᱮᱡᱽᱠᱳ ᱚᱱᱟ ᱡᱷᱟᱨᱱᱟ ᱯᱟᱨᱚᱢ ᱞᱟᱹᱜᱤᱫᱛᱮ ᱟᱹᱰᱤᱠᱳ ᱠᱩᱨᱩᱢᱩᱴᱩᱠᱮᱫᱟ, ᱢᱮᱱᱠᱷᱟᱱ ᱵᱟᱝᱠᱳ ᱫᱟᱲᱮᱭᱟᱫᱟ᱾ ᱦᱚᱲ ᱦᱚᱯᱚᱱᱠᱳ ᱫᱚ ᱵᱤᱨ ᱥᱮᱡᱠᱷᱚᱱ ᱟᱹᱯᱟᱹᱲᱤᱠᱳ ᱛᱩᱧᱮᱫ ᱛᱟᱦᱮᱸᱠᱟᱱᱟ ᱟᱨ ᱥᱟᱦᱮᱵᱽᱠᱳ ᱫᱚ ᱵᱟᱹᱱᱫᱩᱠᱠᱳ ᱴᱷᱩᱭᱫ ᱛᱟᱦᱮᱸᱠᱟᱱᱟ᱾ ᱫᱮᱱᱮᱵᱟᱱᱟᱨᱜᱮ ᱟᱹᱰᱤ ᱦᱚᱲᱠᱳ ᱜᱚᱡᱮᱱᱟ ᱟᱨ ᱟᱫᱚᱢᱠᱳ ᱫᱳ ᱟᱹᱰᱤ ᱜᱷᱟᱹᱞᱜᱮᱠᱳ ᱜᱷᱟᱹᱞᱮᱱᱟ᱾ ᱟᱹᱰᱤ ᱧᱤᱱᱫᱟᱹ ᱦᱟᱹᱵᱤᱡᱠᱳ ᱞᱟᱹᱲᱦᱟᱹᱭᱮᱱᱟ᱾ ᱥᱟᱢ ᱯᱟᱨᱜᱟᱱᱟ ᱜᱷᱟᱹᱞᱠᱟᱛᱮ ᱤᱝᱨᱮᱡᱽ ᱛᱤᱨᱮᱭ ᱯᱟᱲᱟᱣᱮᱱᱟ, ᱢᱮᱱᱠᱷᱟᱱ ᱳᱱᱠᱳ ᱦᱚᱛᱮᱛᱮ ᱨᱟᱱ ᱵᱳᱜᱮᱜ ᱨᱮᱭᱟᱜ ᱥᱟᱨᱵᱷᱟᱨᱟᱣ ᱵᱟᱭ ᱟᱛᱟᱝᱞᱮᱫᱟ ᱟᱨ ᱵᱮᱪᱟᱨᱟ ᱢᱤᱫ ᱜᱷᱟᱹᱲᱤ ᱠᱷᱟᱱᱜᱮ ᱚᱱᱰᱮᱜᱮᱭ ᱜᱚᱡᱮᱱᱟ᱾ ᱤᱝᱨᱮᱡᱽᱠᱳ ᱫᱟᱹᱫᱟᱹᱲᱠᱳ ᱯᱚᱨᱛᱚᱱᱠᱮᱫ ᱠᱷᱟᱱ ᱦᱚᱲ ᱦᱚᱯᱚᱱᱠᱳ ᱛᱟᱭᱚᱢ ᱥᱮᱡ ᱠᱷᱚᱱᱠᱳ ᱛᱩᱧᱠᱮᱫᱠᱳᱣᱟ᱾ ᱮᱱ ᱦᱤᱞᱚᱜ ᱡᱟᱦᱟᱸᱞᱮᱠᱟᱛᱮ ᱤᱝᱨᱮᱡᱽ ᱯᱷᱟᱹᱫᱽᱠᱳ ᱵᱷᱟᱜᱚᱞᱯᱩᱨᱛᱮᱠᱳ ᱧᱤᱨ ᱵᱟᱧᱪᱟᱣᱮᱱᱟ᱾
ᱯᱮᱭᱟᱞᱟᱯᱩᱨ ᱨᱮᱭᱟᱜ ᱢᱩᱪᱟᱹᱫ ᱞᱟᱹᱲᱦᱟᱹᱭ:
ᱳᱪᱛᱳᱵᱮᱨ ᱪᱟᱱᱫᱳ ᱯᱮᱭᱟᱞᱟᱯᱩᱨᱨᱮ ᱢᱩᱪᱟᱹᱫ ᱞᱟᱹᱲᱦᱟᱹᱭ ᱦᱳᱭᱞᱮᱱᱟ᱾ ᱥᱟᱱᱛᱟᱞ ᱯᱷᱟᱹᱫᱽᱠᱳ ᱫᱚ ᱵᱩᱨᱩ ᱪᱚᱴ ᱵᱤᱨᱨᱮᱠᱳ ᱳᱠᱳᱣᱟᱠᱟᱱᱟ, ᱳᱱᱟ ᱛᱟᱞᱟᱨᱮ ᱢᱤᱫᱴᱮᱱ ᱠᱟᱹᱴᱤᱡ ᱜᱟᱰᱟ ᱛᱟᱦᱮᱸᱠᱟᱱᱟ ᱟᱨ ᱵᱟᱱᱟᱨ ᱥᱮᱡᱜᱮ ᱴᱟᱹᱱᱰᱤ ᱯᱷᱟᱸᱠᱜᱮ ᱛᱟᱦᱮᱸᱠᱟᱱᱟ᱾ ᱤᱝᱨᱮᱡᱽᱠᱳ ᱟᱹᱨᱤᱵᱟᱹᱱᱫᱤᱠᱮᱫᱠᱳᱣᱟ ᱡᱮ, ᱦᱚᱲ ᱦᱚᱯᱚᱱ ᱜᱟᱰᱟ ᱦᱟᱱᱟᱥᱟ ᱵᱩᱨᱩ ᱪᱚᱴ ᱵᱷᱤᱛᱨᱤᱨᱮᱠᱳ ᱳᱠᱳᱣᱟᱠᱟᱱᱟ, ᱚᱱᱟᱛᱮ ᱢᱤᱫ ᱫᱚᱞ ᱯᱟᱦᱟᱲᱤᱟᱹ ᱯᱟᱞᱴᱚᱱ ᱟᱨ ᱤᱝᱨᱮᱡᱽ ᱥᱤᱯᱟᱹᱦᱤᱠᱳ ᱠᱳᱞᱠᱮᱫᱠᱳᱣᱟ ᱡᱮᱢᱚᱱ ᱳᱱᱠᱳ ᱞᱮᱠᱟ ᱴᱟᱹᱱᱰᱤ ᱡᱟᱭᱜᱟ ᱯᱷᱟᱸᱠᱨᱮᱠᱳ ᱞᱟᱹᱲᱦᱟᱹᱭ᱾ ᱪᱟᱱᱫᱽᱨᱟᱭ ᱯᱟᱨᱜᱟᱱᱟᱭ ᱢᱮᱱᱠᱮᱫᱟ ᱡᱮ, ᱵᱤᱨ ᱵᱷᱤᱛᱨᱤ ᱠᱷᱚᱱᱜᱮᱠᱳ ᱞᱟᱹᱲᱦᱟᱹᱭᱟ ᱢᱮᱱᱛᱮ᱾ ᱢᱮᱱᱠᱷᱟᱱ ᱥᱤᱝᱜᱽᱨᱟᱹᱭ ᱯᱟᱨᱜᱟᱱᱟ ᱫᱚᱭ ᱢᱮᱱᱠᱮᱫᱟᱼ “ᱛᱷᱚᱲᱟᱜᱮᱭᱟᱠᱳ ᱵᱤᱨᱩᱫᱷᱤ ᱯᱟᱞᱴᱚᱱᱠᱳ ᱫᱳ, ᱠᱷᱟᱹᱴᱤᱜᱮᱵᱳᱱ ᱡᱤᱛᱟᱹᱣ ᱫᱟᱲᱮᱭᱟᱜᱼᱟ”᱾ ᱚᱱᱟᱛᱮ ᱡᱚᱛᱚᱠᱳᱜᱮ ᱯᱷᱟᱸᱠ ᱴᱟᱹᱱᱰᱤᱨᱮ ᱞᱟᱹᱲᱦᱟᱹᱭᱠᱳ ᱨᱩᱢᱩᱡᱮᱱᱟ᱾ ᱛᱤᱱᱨᱮ ᱯᱷᱟᱸᱠᱨᱮᱠᱳ ᱳᱱᱰᱳᱝᱮᱱᱟ ᱩᱱᱨᱮᱜᱮ ᱤᱝᱨᱮᱡᱽ ᱠᱮᱯᱴᱮᱱ ᱯᱷᱳᱠᱮᱱ ᱥᱟᱦᱮᱵᱽ ᱫᱚ ᱟᱹᱰᱤ ᱠᱩᱥᱤᱭ ᱟᱹᱭᱠᱟᱹᱣᱠᱮᱫᱟ᱾ ᱯᱟᱦᱟᱲᱤᱟᱹ ᱥᱤᱯᱟᱹᱦᱤᱠᱳ ᱦᱚᱦᱚᱣᱟᱛᱮᱠᱳ ᱢᱮᱱᱠᱮᱫᱟᱼ “ᱟᱞᱚᱯᱮ ᱦᱤᱡᱩᱜᱼᱟ ᱦᱚᱲ ᱦᱚᱯᱚᱱ, ᱵᱷᱤᱰᱤ ᱢᱮᱨᱚᱢ ᱞᱮᱠᱟᱞᱮ ᱜᱚᱪ ᱪᱟᱵᱟᱯᱮᱭᱟ”᱾ ᱢᱮᱱᱠᱷᱟᱱ ᱦᱚᱲ ᱦᱚᱯᱚᱱᱠᱳ ᱨᱟᱹᱜᱟᱹᱣ ᱨᱟᱹᱜᱟᱹᱣ ᱦᱚᱦᱚᱣᱟᱛᱮᱠᱳ ᱞᱟᱦᱟ ᱦᱤᱡᱩᱜᱠᱟᱱ ᱛᱟᱦᱮᱸᱠᱟᱱᱟ, ᱳᱱᱠᱳᱣᱟᱜ ᱢᱟᱱᱟ ᱵᱟᱝᱠᱳ ᱟᱧᱡᱚᱢᱞᱮᱫᱟ᱾ ᱪᱟᱱᱫᱽᱨᱟᱭ ᱫᱚ ᱯᱮ ᱥᱟᱭ (᱓᱐᱐) ᱜᱟᱱ ᱥᱤᱯᱟᱹᱦᱤᱭᱟᱱᱛᱮᱭ ᱞᱟᱦᱟᱭᱮᱱᱟ ᱟᱨ ᱯᱟᱞᱴᱚᱱ ᱥᱳᱨᱧᱚᱜᱼᱮ ᱤᱫᱤᱠᱮᱫᱠᱳᱣᱟ᱾ ᱯᱟᱞᱴᱚᱱ ᱫᱳᱠᱳ ᱯᱟᱱᱛᱮ ᱛᱷᱩᱨᱟᱠᱟᱱ ᱛᱟᱦᱮᱸᱠᱟᱱᱟ ᱟᱨᱠᱳ ᱥᱳᱨᱧᱚᱜ ᱳᱪᱳᱣᱟᱠᱳᱠᱟᱱ ᱛᱟᱦᱮᱸᱠᱟᱱᱟ᱾ ᱠᱷᱟᱱ ᱟᱪᱠᱟᱜᱮ ᱜᱩᱞᱤᱠᱳ ᱟᱲᱟᱠᱠᱮᱫᱟ ᱟᱨ ᱢᱚᱲᱮᱼᱛᱩᱨᱩᱭ ᱦᱚᱲᱠᱳ ᱜᱩᱨᱮᱱᱟ ᱟᱨ ᱳᱱᱠᱳ ᱥᱟᱶᱛᱮ ᱪᱟᱱᱫᱽᱨᱟᱭ ᱦᱚᱸᱮ ᱜᱩᱞᱤ ᱵᱷᱤᱱᱫᱟᱹᱲ ᱳᱪᱳᱭᱮᱱᱟ᱾ ᱵᱷᱤᱱᱫᱟᱹᱲᱮᱱ ᱧᱮᱞᱛᱮ ᱠᱟᱹᱱᱦᱩ ᱫᱚ ᱟᱨᱛᱮᱫᱼᱮ ᱨᱟᱝᱜᱟᱣᱮᱱᱟ᱾ ᱛᱟᱲᱣᱟᱲᱤ ᱦᱩᱨᱞᱟᱹᱣᱟᱛᱮ ᱯᱷᱟᱹᱫᱽᱠᱳ ᱞᱟᱦᱟᱜᱼᱮ ᱦᱩᱠᱩᱢᱟᱫᱠᱳᱣᱟ᱾ ᱢᱤᱫ ᱦᱚᱲ ᱫᱚ ᱪᱟᱱᱫᱽᱨᱟᱭ ᱵᱚᱫᱚᱞᱛᱮᱭ ᱛᱮᱝᱜᱳ ᱜᱚᱫᱼᱮᱱᱟ ᱟᱨᱮ ᱟᱹᱭᱩᱨᱠᱮᱫᱠᱳᱣᱟ᱾ ᱯᱟᱞᱴᱚᱱ ᱫᱚ ᱟᱠᱳᱨᱮᱱ ᱯᱷᱟᱹᱫᱽ ᱴᱷᱮᱱ ᱰᱮᱨᱟᱛᱮ ᱵᱟᱲᱠᱟᱡᱛᱮᱠᱳ ᱨᱩᱟᱹᱲᱠᱟᱱᱟ᱾ ᱥᱟᱱᱛᱟᱞ ᱯᱷᱟᱹᱫᱽ ᱫᱚ ᱥᱤᱫᱷᱳ ᱟᱨ ᱠᱟᱹᱱᱦᱩ ᱛᱟᱹᱠᱤᱱᱟᱜ ᱞᱤᱞᱠᱟᱹᱨᱛᱮ ᱞᱟᱫᱽ ᱞᱟᱫᱽᱠᱳ ᱟᱸᱲᱜᱳᱭᱮᱱᱟ᱾ ᱠᱮᱯᱴᱮᱱ ᱥᱟᱦᱮᱵᱽ ᱫᱚ ᱟᱡᱮ ᱢᱮᱱᱣᱟᱱ ᱞᱮᱠᱟ ᱯᱷᱟᱹᱫᱽᱠᱳ ᱞᱤᱞᱤᱟᱹᱣ ᱳᱱᱰᱳᱝᱚᱜᱼᱮ ᱧᱮᱞᱠᱮᱫᱠᱳ ᱠᱷᱟᱱ ᱟᱹᱰᱤᱭ ᱠᱩᱥᱤᱭᱱᱟ᱾ ᱞᱟᱦᱟᱛᱮ ᱥᱮᱴᱮᱨᱞᱮᱱᱠᱳ ᱟᱭᱢᱟ ᱦᱚᱲᱠᱳ ᱜᱚᱡᱮᱱᱟ᱾ ᱠᱟᱹᱱᱦᱩ ᱦᱚᱸᱮ ᱵᱷᱤᱱᱫᱟᱹᱲᱮᱱᱟ᱾ ᱠᱷᱟᱱ ᱵᱩᱨᱩ ᱪᱚᱴᱠᱳ ᱤᱫᱤᱠᱮᱫᱮᱭᱟ ᱟᱨ ᱚᱱᱰᱮᱜᱮᱭᱮ ᱜᱚᱡᱮᱱᱟ᱾ ᱥᱤᱫᱷᱳᱣᱟᱜ ᱯᱤᱴ ᱟᱨᱛᱮᱫ ᱪᱟᱲᱦᱟᱣᱮᱱᱟ ᱟᱨ ᱜᱟᱹᱫᱽ ᱦᱚᱲ ᱢᱤᱫ ᱡᱚᱢᱚᱠᱛᱮ ᱞᱟᱦᱟᱜᱼᱮ ᱦᱩᱠᱩᱢᱟᱫᱠᱳᱣᱟ᱾ ᱞᱟᱹᱲᱦᱟᱹᱭᱮ ᱦᱩᱞ ᱢᱩᱠᱷᱤᱟᱹ ᱥᱤᱫᱷᱚ ᱫᱚ ᱛᱤᱨᱮ ᱜᱩᱞᱤ ᱯᱟᱲᱟᱣᱟᱫᱮᱛᱮ ᱛᱤ ᱫᱚ ᱨᱟᱹᱯᱩᱫᱼᱮᱱᱛᱟᱭᱟ ᱟᱨ ᱟᱹᱰᱤ ᱢᱩᱥᱠᱤᱞᱨᱮᱭᱮ ᱯᱟᱲᱟᱣᱮᱱᱟ᱾ ᱠᱷᱟᱱ ᱥᱤᱝᱜᱽᱨᱟᱹᱭ ᱟᱨ ᱵᱟᱨ ᱦᱚᱲ ᱯᱤᱯᱲᱟᱛᱮᱠᱳ ᱟᱹᱛᱞᱤᱨ ᱤᱫᱤᱠᱮᱫᱮᱭᱟ᱾ ᱢᱮᱱᱠᱷᱟᱱ ᱫᱮᱠᱳ ᱮᱢᱟᱱ ᱦᱚᱛᱮᱛᱮ ᱥᱟᱵᱼᱳᱪᱳᱜ ᱵᱚᱛᱚᱨᱛᱮ ᱚᱱᱰᱮ ᱵᱟᱠᱳ ᱛᱟᱦᱮᱸᱫᱟᱲᱮᱭᱟᱫᱟ᱾ ᱠᱷᱟᱱ ᱵᱟᱰᱠᱟᱨ ᱜᱟᱰᱟ ᱚᱱᱯᱟᱨᱚᱢᱠᱳ ᱫᱟᱹᱲᱡᱚᱝᱠᱟᱱ ᱛᱟᱦᱮᱸᱠᱟᱱᱨᱮ ᱵᱤᱨ ᱵᱷᱤᱛᱨᱤᱨᱮ ᱤᱝᱜᱽᱨᱮᱡᱽᱠᱳ ᱢᱤᱫᱴᱮᱱ ᱠᱩᱢᱵᱟᱹᱨᱮᱠᱳ ᱥᱮᱱᱫᱽᱨᱟ ᱧᱟᱢᱠᱮᱫᱠᱳᱣᱟ᱾ ᱳᱱᱠᱳ ᱯᱳᱱ ᱦᱚᱲ ᱵᱟᱲᱦᱮᱛᱛᱮᱠᱳ ᱟᱹᱜᱩᱠᱮᱫᱠᱳᱣᱟ ᱟᱨ ᱞᱳᱪᱳᱫ ᱞᱳᱪᱳᱫ ᱦᱚᱲ ᱥᱟᱢᱟᱝᱨᱮ ᱯᱟᱹᱞᱴᱤᱱ ᱥᱟᱦᱮᱵᱽ ᱩᱱᱠᱤᱱᱮ ᱯᱟᱹᱥᱤ ᱳᱪᱳᱠᱮᱫᱠᱤᱱᱟᱹ᱾ ᱚᱱᱟ ᱦᱩᱞ ᱵᱷᱤᱛᱨᱤᱨᱮ ᱠᱚᱢᱛᱮ ᱠᱳᱢ ᱜᱮᱞ ᱦᱟᱡᱟᱨ (᱑᱐,᱐᱐᱐) ᱜᱟᱱ ᱦᱚᱲ ᱦᱚᱯᱚᱱᱠᱳ ᱜᱚᱡᱮᱱᱟ᱾ ᱞᱟᱹᱲᱦᱟᱹᱭ ᱫᱚ ᱟᱨᱦᱚᱸ ᱛᱷᱚᱲᱟ ᱫᱤᱱ ᱪᱟᱞᱟᱣ ᱤᱫᱤᱭᱱᱜᱮᱭᱟ᱾ ᱢᱮᱱᱠᱷᱟᱱ ᱱᱳᱣᱮᱢᱵᱮᱨ ᱪᱟᱱᱫᱳ ᱑᱐ ᱛᱟᱹᱨᱤᱠ ᱑᱘᱕᱖ ᱥᱟᱞᱨᱮ ᱥᱟᱨᱠᱟᱨ ᱵᱮᱜᱚᱨ ᱵᱤᱪᱟᱹᱨ ᱟᱹᱱᱮ (ᱢᱟᱨᱛᱤᱭᱟᱞ ᱞᱟᱣ) ᱞᱟᱹᱭ ᱥᱟᱰᱮᱠᱮᱫ ᱠᱷᱟᱱ ᱵᱟᱹᱭ ᱵᱟᱹᱭᱛᱮ ᱦᱩᱞ ᱫᱚ ᱛᱷᱤᱨᱮᱱᱟ᱾
ᱦᱩᱞ ᱨᱮᱭᱟᱜ ᱯᱚᱨᱦᱚ:
ᱚᱱᱟ ᱦᱩᱞ ᱨᱮᱭᱟᱜ ᱯᱚᱨᱦᱚ ᱫᱚ ᱱᱳᱣᱟᱜᱮ ᱦᱳᱭᱮᱱᱟ ᱡᱮ, ᱱᱟᱣᱟ ᱢᱮᱡᱤᱥᱴᱨᱮᱴ (ᱢᱟᱜᱤᱥᱛᱨᱟᱛᱮ) ᱮᱰᱮᱱ ᱥᱟᱦᱮᱵᱽ ᱦᱚᱲ ᱦᱚᱯᱚᱱᱠᱳᱣᱟᱜ ᱟᱨᱚᱡᱮ ᱟᱧᱡᱚᱢᱠᱮᱫᱛᱟᱠᱳᱣᱟ᱾ ᱦᱩᱞ ᱛᱟᱭᱚᱢᱛᱮ ᱑᱘᱕᱖ ᱥᱟᱞᱨᱮ ᱦᱚᱲ ᱦᱚᱯᱚᱱᱠᱳᱣᱟᱜ ᱚᱥᱩᱵᱤᱛᱟ ᱧᱮᱞᱛᱮ ᱥᱟᱨᱠᱟᱨ ᱳᱱᱠᱳ ᱞᱟᱹᱜᱤᱫ ᱢᱤᱫᱴᱮᱱ ᱡᱤᱞᱟᱹᱭ ᱴᱷᱤᱠᱟᱫᱠᱳᱣᱟ, ᱚᱱᱮ ᱚᱱᱟ ᱨᱮᱭᱟᱜ ᱧᱩᱛᱩᱢ ᱫᱚ “ᱰᱩᱢᱠᱟᱹ ᱡᱤᱞᱟᱹ” ᱟᱨ ᱥᱟᱱᱛᱟᱞ ᱯᱟᱨᱜᱟᱱᱟ ᱫᱚ ᱦᱳᱭᱮᱱᱟ ᱤᱞᱟᱹᱠᱟ᱾ ᱱᱚᱱᱰᱮᱜᱮ ᱦᱚᱲ ᱦᱚᱯᱚᱱᱠᱳ ᱢᱟᱹᱧᱡᱷᱤ ᱯᱟᱨᱟᱱᱤᱠ ᱯᱟᱨᱜᱟᱱᱟ ᱡᱚᱛᱚᱜᱮ ᱫᱚᱨᱚᱜᱟ ᱯᱩᱞᱤᱥ ᱞᱮᱠᱟ ᱟᱹᱭᱫᱟᱹᱨᱤᱠᱳ ᱧᱟᱢᱠᱮᱫᱟ᱾ ᱡᱟᱦᱟᱱ ᱵᱟᱹᱲᱤᱡᱜᱮ ᱟᱠᱳᱣᱟᱜ ᱟᱹᱭᱫᱟᱹᱨᱤ ᱞᱮᱠᱟᱛᱮ ᱵᱤᱪᱟᱹᱨ ᱨᱮᱭᱟᱠ ᱠᱷᱚᱢᱚᱛᱟ ᱟᱠᱳᱣᱟᱜ ᱛᱤᱨᱮᱜᱮ ᱛᱟᱦᱮᱸᱠᱟᱱᱟ᱾ ᱠᱷᱟᱡᱽᱱᱟ ᱦᱚᱸ ᱟᱠᱳᱛᱮᱜᱮ ᱩᱴᱟᱹᱣ ᱨᱮᱭᱟᱜ ᱠᱷᱚᱢᱚᱛᱟ ᱛᱟᱦᱮᱸᱠᱟᱱᱛᱟᱠᱳᱣᱟ᱾ ᱮᱠᱮᱱ ᱰᱤ.ᱥᱤ. ᱜᱮ ᱳᱱᱠᱳ ᱪᱮᱛᱟᱱᱨᱮ ᱢᱟᱹᱞᱤᱠᱮ ᱛᱟᱦᱮᱸᱠᱟᱱᱟ᱾ ᱤᱱᱟᱹ ᱛᱟᱭᱚᱢ ᱑᱘᱘᱕ ᱥᱟᱞᱨᱮ “ᱞᱮᱱᱰ ᱴᱮᱱᱮᱥᱥᱤ ᱮᱠᱴ” ᱧᱩᱛᱩᱢᱟᱱᱟᱜ ᱟᱹᱱ ᱦᱳᱭᱮᱱᱟ ᱡᱮ, ᱚᱠᱚᱭ ᱦᱚᱸ ᱮᱴᱟᱜ ᱡᱟᱹᱛ ᱴᱷᱮᱱ ᱟᱠᱳᱣᱟᱜ ᱡᱩᱢᱤ ᱵᱟᱝᱠᱳ ᱟᱹᱠᱷᱨᱤᱧ ᱫᱟᱲᱮᱭᱟᱜᱼᱟ ᱟᱨ ᱱᱳᱣᱟ ᱟᱹᱱ ᱫᱚ ᱱᱤᱛ ᱦᱟᱹᱵᱤᱡ ᱱᱤᱥᱴᱟᱹ ᱛᱟᱦᱮᱸᱭᱮᱱᱟ᱾ ᱚᱱᱟ ᱪᱷᱟᱰᱟᱠᱟᱛᱮ ᱟᱵᱳ ᱫᱚ ᱥᱤᱫᱷᱚ ᱟᱨ ᱠᱟᱹᱱᱦᱩ ᱡᱚᱛᱚ ᱦᱚᱲᱜᱮᱵᱳᱱ ᱫᱤᱥᱟᱹᱭᱮᱫᱠᱤᱱᱟᱹ᱾ ᱓᱐ ᱡᱩᱱᱮ ᱛᱟᱹᱨᱤᱠ ᱫᱚ ᱦᱳᱭᱳᱜᱠᱟᱱᱟ “ᱦᱩᱞ ᱢᱟᱸᱦᱟᱸ”᱾ ᱚᱱᱟ ᱢᱟᱸᱦᱟ ᱫᱳ ᱟᱵᱳ ᱦᱚᱲ ᱦᱚᱯᱚᱱᱟᱜ ᱢᱟᱸᱦᱟ ᱢᱮᱱᱠᱟᱛᱮ ᱟᱝᱜᱚᱪ ᱦᱳᱭᱳᱜᱠᱟᱱ ᱛᱟᱵᱳᱱᱟ᱾ ᱢᱮᱛᱟᱜᱢᱮ “ᱱᱮᱥᱱᱟᱞ ᱰᱮ” ᱥᱮ ᱡᱟᱹᱛ ᱨᱮᱭᱟᱜ ᱢᱟᱸᱦᱟᱸ᱾ ᱫᱷᱟᱹᱨᱛᱤᱨᱮ ᱩᱱ ᱦᱤᱞᱚᱜ ᱠᱷᱚᱱᱜᱮ ᱦᱚᱲ ᱦᱚᱯᱚᱱ ᱢᱟᱱ ᱢᱟᱱᱚᱛ ᱧᱟᱢᱵᱳᱱ ᱮᱦᱚᱵᱼᱮᱱᱟ᱾ ᱚᱱᱟ ᱦᱩᱞ ᱠᱷᱚᱱ ᱥᱤᱠᱷᱟᱹᱣᱱᱟ ᱧᱟᱢᱠᱟᱛᱮ ᱛᱟᱭᱚᱢᱛᱮ ᱥᱮ ᱱᱤᱛ ᱦᱚᱸ ᱦᱚᱲ ᱦᱚᱯᱚᱱᱠᱳ ᱱᱤᱡᱽ ᱟᱹᱭᱫᱟᱹᱨᱤ ᱧᱟᱢ ᱞᱟᱹᱜᱤᱫ ᱟᱭᱢᱟ ᱞᱮᱠᱟᱱᱟᱜᱠᱳ ᱦᱩᱞᱮᱫᱜᱮᱭᱟ᱾
ᱥᱟᱯᱲᱟᱣᱤᱭᱟᱹ
ᱡᱟᱦᱮᱨ ᱜᱟᱲ
ᱡᱟᱦᱮᱨ ᱚᱲᱟᱜ
====|||||||====
