ᱛᱩᱯᱩᱱ ᱜᱷᱟᱴ

                       ᱛᱩᱯᱩᱱ ᱜᱷᱟᱴ
                        ᱨᱟᱜᱷᱩᱱᱟᱛ ᱴᱩᱰᱩ

                  

ᱛᱤᱱᱟᱹᱜ ᱨᱟᱹᱥᱠᱟ ᱛᱮᱦᱮᱸᱧ ᱛᱩᱯᱩᱱ ᱜᱷᱟᱴᱨᱮ 
ᱟᱬᱜᱚᱱ ᱠᱟᱱᱟᱢ ᱟᱹᱫᱤᱢ ᱛᱚᱣᱟ ᱫᱟᱜ ᱨᱮ᱾
ᱚᱠᱚᱭ ᱦᱤᱸᱥᱟᱹᱦᱤᱨᱠᱷᱟᱹᱭ ᱵᱚᱦᱮᱞ ᱠᱟᱜ ᱠᱟᱱ
ᱚᱠᱚᱭ ᱜᱚᱨᱚᱵ, ᱜᱩᱢᱟᱹᱱᱮ ᱪᱟᱹᱰᱩ ᱠᱟᱜ ᱠᱟᱱ 
ᱚᱠᱚᱭ ᱢᱟᱹᱭᱞᱟᱹ ᱢᱚᱱᱫᱚᱭ ᱢᱟᱡᱟᱣ ᱠᱟᱜ ᱠᱟᱱ 
ᱚᱠᱚᱭ ᱛᱮᱦᱮᱸᱧ ᱞᱩᱛᱩᱨᱮ ᱟᱵᱚᱜ ᱠᱟᱱ,
ᱚᱠᱚᱭ ᱨᱟᱹᱜᱤ ᱦᱚᱲᱢᱚᱭ ᱛᱩᱯᱩ ᱨᱟᱲᱮᱡᱮᱫ
ᱚᱠᱚᱭ ᱛᱮᱛᱟᱝ ᱟᱹᱱᱤᱡ ᱫᱟᱜ ᱮ ᱧᱩᱭᱮᱛ᱾

ᱛᱤᱱᱟᱹᱜ ᱨᱟᱹᱥᱠᱟ ᱛᱮᱦᱮᱸᱧ ᱛᱩᱯᱩᱱ ᱜᱷᱟᱴᱨᱮ
ᱱᱟᱹᱠᱟᱱ ᱥᱩᱥᱟᱹᱨ ᱜᱷᱟᱴ ᱧᱟᱢᱟᱢ ᱚᱠᱟᱨᱮ᱾
ᱟᱯᱟᱱ ᱟᱹᱯᱤᱱ ᱛᱮᱠᱚ ᱟᱯᱟᱛᱞᱮᱱ 
ᱟᱹᱢᱤᱡ ᱤᱧᱤᱡ ᱫᱩᱞᱟᱹᱲ ᱥᱟᱦᱟ ᱞᱮᱱ
ᱛᱩᱯᱩᱱ ᱜᱷᱟᱴᱨᱮ ᱛᱮᱦᱮᱧ ᱧᱟᱯᱟᱢ ᱠᱟᱛᱮ
ᱞᱟᱹᱭ ᱩᱯᱨᱩᱢ ᱨᱮᱢᱟ ᱜᱟᱛᱮ ᱜᱟᱯᱟᱛᱮ,
ᱯᱟᱭᱨᱟ ᱟᱹᱱᱤᱡ ᱫᱚᱭ ᱯᱟᱭᱨᱟᱡᱚᱝᱠᱟᱱ
ᱵᱟᱰᱟᱭᱟ ᱵᱟᱹᱱᱩᱡ ᱫᱚᱭ ᱫᱤᱠᱩ ᱯᱩᱠᱩᱜ ᱠᱟᱱ᱾

ᱛᱤᱱᱟᱹᱜ ᱨᱟᱹᱥᱠᱟ ᱛᱮᱦᱮᱸᱧ ᱛᱩᱯᱩᱱ ᱜᱷᱟᱴᱨᱮ
ᱪᱮᱦᱮᱞ ᱪᱮᱯᱮᱞ ᱱᱚᱣᱟ ᱛᱚᱣᱟ ᱫᱟᱜ ᱨᱮ᱾

ᱜᱷᱟᱴ ᱜᱷᱟᱴᱨᱮ ᱢᱮᱱᱟᱜ ᱥᱟᱶᱦᱮᱸᱫ ᱠᱤᱪᱨᱤᱡ
ᱡᱮᱢᱚᱱ ᱵᱟᱦᱟ ᱵᱟᱲᱜᱮ ᱥᱩᱜᱟᱹᱲ ᱥᱤᱨᱤᱡᱤᱡ 
ᱩᱨᱟᱶ,ᱦᱚ,ᱠᱷᱟᱲᱤᱭᱟ,ᱢᱩᱸᱰᱟᱨᱤ,ᱥᱟᱱᱛᱟᱲᱤ,ᱱᱟᱜᱯᱩᱨᱤ,
ᱠᱷᱚᱨᱴᱷᱟ,ᱯᱟᱸᱪᱯᱟᱨᱜᱟᱱᱤᱭᱟ ᱟᱨ ᱠᱩᱲᱢᱟᱞᱤ
ᱥᱟᱱᱟᱢ ᱯᱟᱹᱨᱥᱤ ᱟᱲᱟᱝ ᱢᱤᱫ ᱜᱷᱟᱴᱨᱮ 
ᱱᱤᱨᱟᱹᱭ ᱞᱟᱥᱟᱲᱦᱮᱸᱫ ᱜᱮ ᱛᱮᱦᱮᱧ ᱟᱫᱟᱜ ᱡᱤᱣᱤ ᱨᱮ᱾

ᱛᱤᱱᱟᱹᱜ ᱨᱟᱹᱥᱠᱟ ᱛᱮᱦᱮᱸᱧ ᱛᱩᱯᱩᱱ ᱜᱷᱟᱴᱨᱮ
ᱡᱟᱹᱛᱤ ᱦᱤᱨᱠᱷᱟᱹ ᱫᱚ ᱠᱚ ᱵᱚᱦᱮᱞᱠᱟᱛ ᱨᱮ᱾

ᱯᱟᱴᱷᱟᱬᱠᱟᱛ ᱟᱭ ᱜᱷᱟᱴ ᱥᱟᱶᱛᱟ ᱥᱤᱝ ᱪᱟᱺᱫᱚ
ᱵᱟᱲᱜᱮ ᱜᱷᱟᱥᱟᱜ ᱛᱤᱥ ᱦᱚᱸ ᱵᱟᱱ ᱫᱟᱜ ᱛᱮᱫᱚ
ᱱᱚᱣᱟ ᱛᱩᱯᱩᱱ ᱜᱷᱟᱴ ᱢᱟᱹᱭᱞᱟᱹᱭ ᱥᱩᱥᱟᱹᱨ
ᱛᱩᱯᱩ ᱨᱟᱠᱟᱵᱠᱟᱱ ᱱᱤᱨᱚᱲ ᱩᱭᱦᱟᱹᱨ
ᱜᱚᱨᱚᱡ ᱢᱚᱱᱮ ᱛᱮ ᱜᱟᱞᱟᱝ ᱟᱠᱟᱫᱟ ᱦᱤᱥᱤᱨ᱾
                            🎯🎯🎯

ᱥᱟᱱᱛᱟᱲᱤ ᱜᱟᱹᱛᱷᱱᱤ ᱜᱟᱫᱮᱞ ᱯᱚᱨᱚᱵ ᱠᱷᱚᱱ