ᱢᱟᱱᱚᱛ

                   ᱢᱟᱱᱚᱛ
                  ᱰᱨᱹ ᱠᱨᱤᱥᱷᱱᱟ ᱪᱟᱱᱫᱨᱟ ᱢᱩᱨᱢᱩ
 ᱪᱟᱥ ᱠᱟᱹᱢᱤᱢ ᱪᱮᱫ ᱞᱮᱠᱷᱟᱱ, ᱪᱟᱥᱤ ᱵᱟᱥᱤ ᱜᱮᱢ ᱵᱮᱱᱟᱜ ᱟ
ᱥᱟᱶᱦᱮᱸᱫ ᱪᱟᱨᱪᱟᱢ ᱪᱮᱫ ᱞᱮᱠᱷᱟᱱ ᱥᱟᱶᱦᱮᱸᱫᱤᱭᱟ ᱜᱮᱢ ᱵᱮᱱᱟᱜ ᱟ
ᱚᱞ ᱯᱟᱲᱷᱟᱣᱮᱢ ᱪᱮᱫ ᱞᱮᱠᱷᱟᱱ ᱟᱹᱠᱤᱞ ᱜᱮᱭᱟᱱ ᱨᱮᱢ ᱞᱮᱠᱷᱟᱜ ᱟ᱾
ᱪᱟᱥ ᱠᱟᱹᱢᱤ ᱪᱮᱫ ᱨᱮᱫᱚ ᱟᱹᱛᱩ ᱚᱲᱟᱜ ᱨᱮᱢ ᱢᱟᱱᱚᱛᱚᱜ 
ᱥᱟᱶᱦᱮᱸᱫ ᱪᱟᱨᱪᱟ ᱨᱮ ᱫᱚ ᱥᱟᱶᱦᱮᱸᱫ ᱥᱟᱶᱛᱟ ᱨᱮᱢ ᱢᱟᱱᱚᱛᱚᱜ 
ᱚᱞ ᱯᱟᱲᱷᱟᱣᱮᱢ ᱪᱮᱫ ᱨᱮᱫᱚ ᱜᱚᱴᱟ ᱥᱟᱶᱛᱟ ᱨᱮᱢ ᱢᱟᱱᱚᱛᱚᱜ ᱟ᱾

ᱠᱷᱟᱹᱴᱤ ᱢᱟᱹᱴᱤᱢ ᱦᱟᱢᱮᱴ ᱞᱮᱠᱷᱟᱱ,ᱚᱡᱷᱟ ᱯᱟᱛᱤ ᱜᱮᱢ ᱵᱮᱱᱟᱜ
ᱞᱟᱹᱣᱠᱟᱹ ᱞᱟᱲᱟᱣᱮᱢ ᱦᱟᱢᱮᱴ ᱞᱮᱠᱷᱟᱱ ᱞᱟᱹᱣᱲᱤᱭᱟ ᱜᱮᱢ ᱵᱮᱱᱟᱜ ᱟ
ᱵᱤᱨ ᱫᱟᱲᱮᱢ ᱦᱟᱢᱮᱴ ᱞᱮᱠᱷᱟᱱ ᱵᱤᱨᱫᱟᱹᱨᱤᱭᱟᱢ ᱨᱮᱢ ᱞᱮᱠᱷᱟᱜ ᱟ᱾
ᱠᱷᱟᱹᱴᱤ ᱢᱟᱹᱴᱤ ᱦᱟᱢᱮᱴ ᱨᱮ ᱫᱚ ᱜᱷᱟᱴ ᱜᱷᱟᱴ ᱨᱮᱢ ᱢᱟᱱᱚᱛᱚᱜ 
ᱵᱤᱨ ᱫᱟᱲᱮᱢ ᱦᱟᱢᱮᱴ ᱨᱮ ᱫᱚ ᱜᱷᱟᱴᱟ ᱫᱤᱥᱚᱢ ᱨᱮᱢ ᱢᱟᱱᱚᱛᱚᱜ ᱟ᱾

ᱞᱟᱜ ᱨᱚᱜ ᱮᱢ ᱥᱮᱸᱬᱟ ᱞᱮᱠᱷᱟᱱ ᱵᱟᱰᱚᱦᱤ ᱜᱮᱢ ᱵᱮᱱᱟᱜ ᱟ
ᱮᱱᱮᱡ ᱥᱮᱨᱮᱧᱮᱢ ᱥᱮᱸᱬᱟ ᱞᱮᱠᱷᱟᱱ ᱨᱩᱥᱤᱠᱟ ᱜᱮᱢ ᱵᱮᱱᱟᱜ ᱟ
ᱫᱤᱥᱚᱢ ᱫᱩᱞᱟᱹᱲ ᱮᱢ ᱥᱮᱸᱬᱟ ᱨᱮ ᱫᱚ ᱱᱟᱜᱟᱢᱤᱭᱟ ᱨᱮᱢ ᱞᱮᱠᱷᱟᱜ ᱟ᱾
ᱞᱟᱜ ᱨᱚᱜ ᱮᱢ ᱥᱮᱸᱬᱟ ᱨᱮ ᱫᱚ ᱟᱹᱛᱩ ᱚᱲᱟᱜ ᱨᱮᱢ ᱢᱟᱱᱚᱛᱚᱜ
ᱮᱱᱮᱡ ᱥᱮᱨᱮᱧ ᱥᱮᱸᱬᱟ ᱨᱮ ᱫᱚ ᱟᱠᱷᱲᱟ ᱛᱟᱞᱟᱨᱮᱢ ᱢᱟᱱᱚᱛᱚᱜ
ᱫᱤᱥᱚᱢ ᱫᱩᱞᱟᱹᱲ ᱮᱢ ᱥᱮᱸᱬᱟ ᱨᱮ ᱫᱚ ᱜᱚᱴᱟ ᱫᱷᱟᱹᱨᱛᱤ ᱨᱮᱢ ᱢᱟᱱᱚᱛᱚᱜ᱾
                             ᱸᱸᱸᱸᱸ

ᱥᱟᱱᱛᱟᱲᱤ ᱜᱟᱹᱫᱮᱞ ᱯᱚᱨᱚᱵ ᱠᱷᱚᱱ