ᱢᱩᱨᱢᱩ ᱟᱨ ᱦᱟᱸᱥᱫᱟᱜ ᱦᱚᱲ ᱠᱚᱣᱟᱜ ᱠᱟᱛᱷᱟ
ᱠᱟᱛᱷᱟᱭ ᱢᱮᱱᱟᱠᱚ ᱥᱮᱫᱟᱭ ᱦᱟᱸᱥᱫᱟᱜ ᱦᱚᱲ ᱠᱚ ᱫᱚ ᱠᱩᱴᱟᱹᱢᱯᱩᱨᱤ ᱜᱟᱲ ᱨᱮ ᱠᱚ ᱛᱟᱦᱮᱸ ᱠᱟᱱ ᱛᱟᱦᱮᱱᱟ
ᱩᱱᱨᱮ, ᱩᱱᱠᱩ ᱦᱟᱸᱥᱫᱟᱜ ᱦᱚᱲ ᱠᱚ ᱫᱚ ᱪᱟᱥᱵᱟᱥ ᱠᱟᱛᱮ ᱠᱚ ᱟᱹᱥᱩᱞᱚᱜ ᱠᱟᱱ ᱛᱟᱦᱮᱸ ᱠᱟᱱᱟ ᱾ ᱢᱤᱫ ᱴᱟᱝ ᱦᱟᱸᱥᱫᱟᱜ ᱦᱚᱲ ᱨᱤᱱ ᱫᱚ ᱮᱭᱟᱭ ᱜᱚᱴᱟᱝ ᱠᱚᱲᱟ ᱜᱤᱫᱽᱨᱟ ᱟᱨ ᱢᱤᱫᱴᱟᱝ ᱠᱩᱲᱤ ᱜᱤᱫᱽᱨᱟᱹ ᱮ ᱛᱟᱦᱮᱸ ᱠᱟᱱᱟ ᱾
ᱠᱩᱲᱤ ᱜᱤᱫᱽᱨᱟᱹ ᱫᱚ ᱵᱟᱝ ᱠᱚ ᱡᱟᱶᱟᱭ ᱫᱟᱲᱮ ᱛᱟᱦᱮᱸ ᱠᱟᱱᱟ, ᱚᱱᱟᱛᱮ ᱩᱱᱤ ᱫᱚ "ᱵᱟᱹᱨᱩ ᱵᱟᱰᱨᱟ" ᱦᱟᱸᱥᱫᱟᱜ ᱠᱚ ᱢᱮᱛᱟᱭ ᱠᱟᱱ ᱛᱟᱦᱮᱸ ᱠᱟᱱᱟ ᱾
ᱩᱱᱠᱩ ᱦᱟᱸᱥᱫᱟᱜ ᱦᱚᱲ ᱫᱚ ᱢᱤᱫ ᱴᱟᱝ ᱜᱩᱛᱤ ᱠᱚᱲᱟ ᱠᱚ ᱫᱚᱦᱚ ᱞᱮᱫᱮ ᱛᱟᱦᱮᱸ ᱠᱟᱱᱟ ᱾ ᱢᱩᱨᱢᱩ ᱠᱚᱲᱟ ᱫᱚ ᱥᱚᱥᱟᱝ ᱮᱝᱜᱟ ᱵᱚᱝᱥᱚ ᱠᱚ ᱛᱟᱦᱮᱸ ᱠᱟᱱᱟ ᱾ ᱩᱱᱤ ᱥᱚᱥᱟᱝ ᱮᱝᱜᱟ ᱵᱚᱝᱥᱚ ᱢᱩᱨᱢᱩ ᱠᱚᱲᱟ ᱫᱚ ᱦᱟᱸᱥᱫᱟᱜ ᱠᱚ ᱚᱲᱟᱜ ᱨᱮ ᱟᱹᱰᱤ ᱫᱤᱱ ᱜᱩᱛᱤ ᱮ ᱛᱟᱦᱮᱸ ᱠᱟᱱᱟ ᱾
ᱚᱱᱠᱟ ᱚᱱᱠᱟᱛᱮ ᱩᱱᱤ ᱫᱚ ᱦᱟᱸᱥᱫᱟᱜ ᱠᱩᱲᱤ ᱥᱟᱶ ᱮ ᱢᱤᱞᱟᱣᱭᱮᱱᱟ ᱟᱨ ᱮ ᱞᱚᱴᱯᱚᱴ ᱮᱱᱟ ᱾ ᱮᱱᱠᱷᱟᱱ ᱵᱟᱹᱨᱩ ᱵᱟᱰᱨᱟ ᱦᱟᱸᱥᱫᱟᱜ ᱠᱩᱲᱤ ᱫᱚ ᱢᱩᱨᱢᱩ ᱠᱚᱲᱟ ᱴᱷᱮᱱ ᱮ ᱡᱟᱶᱟᱭ ᱮᱱᱟ ᱾ ᱠᱩᱲᱤ ᱟᱡ ᱫᱟᱫᱟ ᱛᱮᱠᱚ ᱫᱚ ᱟᱠᱚ ᱨᱤᱱ ᱢᱤᱥᱮᱨᱟ ᱫᱚ ᱢᱩᱨᱢᱩ ᱠᱚᱲᱟ ᱴᱷᱮᱱ ᱵᱟᱝ ᱡᱟᱶᱟᱭᱮ ᱨᱮᱱᱟᱜ ᱠᱟᱛᱷᱟ ᱠᱚ ᱢᱮᱱ ᱠᱮᱫ-ᱟ ᱾ ᱮᱱᱠᱷᱟᱱ ᱢᱩᱨᱢᱩ ᱠᱚᱲᱟ ᱫᱚ ᱦᱟᱸᱥᱫᱟᱜ ᱠᱩᱲᱤ ᱤᱫᱤ ᱠᱟᱛᱮ ᱧᱤᱨ ᱮᱱᱟ ᱟᱨ ᱮᱴᱟᱜ ᱨᱮ ᱚᱲᱟᱜ ᱫᱩᱣᱟᱹᱨ ᱠᱟᱛᱮ ᱠᱤᱱ ᱛᱟᱦᱮᱸᱭᱮᱱᱟ ᱾ ᱢᱮᱱᱠᱷᱟᱱ ᱩᱱᱤ ᱢᱩᱨᱢᱩ ᱠᱚᱲᱟ ᱫᱚ ᱩᱱᱠᱩ ᱦᱟᱸᱥᱫᱟᱜ ᱦᱚᱲ ᱨᱤᱱ ᱠᱟᱰᱟ ᱠᱚ ᱜᱮᱭ ᱜᱩᱯᱤ ᱵᱟᱲᱟᱠᱚᱣᱟ ᱾ ᱟᱹᱰᱤ ᱫᱤᱱ ᱛᱟᱭᱚᱢ ᱢᱩᱨᱢᱩ ᱜᱩᱛᱤ ᱠᱚᱲᱟ ᱟᱨ ᱵᱟᱹᱨᱩ ᱵᱟᱰᱨᱟ ᱦᱟᱸᱥᱫᱟᱜ ᱨᱤᱱ ᱫᱚ ᱡᱟᱣᱲᱟ ᱛᱮ ᱵᱟᱨᱭᱟ ᱠᱚᱲᱟ ᱜᱤᱫᱽᱨᱟᱹ ᱠᱤᱱ ᱡᱟᱱᱟᱢ ᱮᱱᱟ ᱾ ᱱᱟᱶᱟ ᱜᱤᱫᱽᱨᱟᱹ ᱡᱟᱱᱟᱢ ᱠᱟᱛᱷᱟ, ᱠᱩᱲᱤ ᱨᱮᱱ ᱮᱭᱟᱭ ᱵᱚᱭᱦᱟ ᱠᱚ ᱵᱟᱰᱟᱭ ᱠᱮᱫ ᱠᱷᱟᱱ, ᱩᱱᱠᱤᱱ ᱠᱚᱲᱟ ᱜᱤᱫᱽᱨᱟᱹ ᱜᱚᱡ ᱜᱤᱰᱤ ᱠᱟᱠᱤᱱ ᱨᱮᱱᱟᱜ ᱠᱟᱛᱷᱟ ᱠᱤᱱ ᱢᱮᱱ ᱠᱮᱫ-ᱟ ᱾ ᱢᱮᱱᱠᱷᱟᱱ ᱚᱠᱟ ᱞᱮᱠᱟ ᱛᱮᱦᱚᱸ ᱵᱟᱝ ᱠᱚ ᱜᱚᱡ ᱫᱟᱲᱮᱭᱟᱜ ᱠᱤᱱᱟ ᱾ ᱡᱟᱣᱲᱟ ᱠᱚᱲᱟ ᱫᱚ ᱟᱹᱰᱤ ᱠᱤᱱ ᱢᱟᱨᱟᱝ ᱤᱫᱤᱭᱮᱱᱟ ᱾ ᱢᱤᱫ ᱫᱤᱱ ᱢᱩᱨᱢᱩ ᱜᱩᱛᱤ ᱠᱚᱲᱟ ᱫᱚ ᱠᱟᱰᱟ ᱜᱩᱯᱤ-ᱜᱩᱯᱤ ᱛᱮ ᱠᱟᱰᱟ ᱴᱷᱮᱱ ᱮ ᱨᱚᱜ ᱜᱚᱡ ᱦᱚᱪᱚᱭᱮᱱᱟ ᱾ ᱮᱱᱠᱷᱟᱱ ᱩᱱᱤ ᱨᱮᱱ ᱡᱟᱣᱲᱟ ᱜᱤᱫᱽᱨᱟᱹ ᱫᱚ ᱢᱟᱢᱚ ᱟᱲᱟᱜ ᱛᱮ ᱪᱟᱞᱟᱣ ᱠᱟᱛᱮ ᱟᱡ ᱵᱟᱵᱟ ᱠᱟᱰᱟ ᱴᱷᱮᱱ ᱨᱚᱜ ᱜᱚᱡ ᱦᱚᱪᱚ ᱟᱠᱟᱱ ᱨᱮᱱᱟᱜ ᱠᱟᱛᱷᱟ ᱠᱤᱱ ᱢᱮᱱ ᱞᱟᱹᱭ ᱠᱮᱫ-ᱟ ᱟᱨ ᱟᱡ ᱨᱟᱯᱟᱜ ᱠᱟᱭ ᱨᱮᱭᱟᱜ ᱠᱟᱛᱷᱟ ᱠᱤᱱ ᱢᱮᱱ ᱠᱮᱫ-ᱟ ᱾ ᱢᱮᱱᱠᱷᱟᱱ ᱟᱡ ᱢᱟᱢᱚ ᱛᱮᱠᱚ ᱫᱚ ᱟᱹᱰᱤ ᱠᱚ ᱨᱟᱹᱜᱤᱭᱮᱱᱟ ᱟᱨ ᱚᱠᱚᱭ ᱦᱚᱸ ᱵᱟᱝᱠᱚ ᱥᱩᱨ ᱞᱮᱱᱟ ᱾ ᱟᱨ ᱠᱚ ᱢᱮᱛᱟᱜ ᱠᱤᱱᱟ ᱟᱹᱵᱤᱱ ᱜᱮ ᱵᱟᱱᱟ ᱦᱚᱲ ᱛᱮ ᱜᱟᱰᱟ ᱫᱷᱟᱨᱮ ᱤᱫᱤ ᱠᱟᱛᱮ, ᱛᱚᱯᱟ ᱜᱤᱰᱤ ᱠᱟᱭᱵᱤᱱ ᱾ ᱟᱨ ᱟᱡ ᱧᱩᱛᱩᱢ ᱛᱮ ᱢᱤᱫᱴᱟᱝ ᱞᱩᱯᱩᱝ ᱡᱚ ᱦᱟᱞᱟᱝ ᱵᱤᱱ ᱾
ᱚᱱᱟ ᱞᱩᱯᱩᱝ ᱡᱚ ᱱᱟᱹᱭ ᱨᱮ ᱤᱫᱤ ᱠᱟᱛᱮ ᱵᱚᱦᱮᱞ ᱠᱟᱜ ᱵᱤᱱ ᱾ ᱡᱟᱣᱲᱟ ᱜᱤᱫᱽᱨᱟᱹ ᱫᱚ ᱟᱠᱤᱱ ᱨᱤᱱ ᱢᱟᱢᱚ ᱛᱮᱠᱚᱣᱟᱜ ᱠᱟᱛᱷᱟ ᱞᱮᱠᱟᱛᱮ, ᱟᱡ ᱵᱟᱵᱟ ᱫᱚ ᱜᱟᱰᱟ ᱫᱷᱟᱨᱮ ᱤᱫᱤ ᱠᱟᱛᱮ ᱛᱚᱯᱟ ᱠᱮᱫᱮᱭᱟᱠᱤᱱ ᱾
ᱟᱨ ᱡᱟᱝ ᱵᱟᱦᱟ ᱧᱩᱛᱩᱢ ᱛᱮ ᱞᱩᱯᱩᱝ ᱡᱚ ᱠᱤᱱ ᱦᱟᱞᱟᱝ ᱠᱮᱫ-ᱟ ᱟᱨ ᱜᱟᱰᱟ ᱱᱟᱹᱭ ᱜᱷᱟᱴ ᱨᱮ ᱡᱟᱝ ᱵᱟᱦᱟ ᱵᱚᱦᱮᱞ ᱜᱷᱟᱴ ᱠᱤᱱ ᱵᱮᱱᱟᱣ ᱠᱮᱫ-ᱟ ᱾ ᱜᱷᱟᱴ ᱨᱮ ᱢᱤᱫᱴᱟᱝ ᱥᱟᱨᱡᱚᱢ ᱥᱟᱠᱟᱢ ᱪᱮᱛᱟᱱᱨᱮ ᱱᱟᱲᱠᱟ ᱦᱟᱥᱟ ᱠᱤᱱ ᱫᱚᱦᱚ ᱠᱮᱫ-ᱟ ᱾ᱟᱨ ᱚᱱᱟ ᱛᱟᱭᱚᱢ ᱱᱟᱲᱠᱟ ᱦᱟᱥᱟ ᱟᱨ ᱞᱩᱯᱩᱝ ᱡᱚᱠᱤᱱ ᱵᱚᱦᱮᱞ ᱠᱮᱫ-ᱟ, ᱟᱨ ᱜᱷᱟᱴ ᱠᱷᱚᱱ ᱠᱤᱱ ᱩᱢ ᱨᱟᱠᱟᱵ ᱮᱱᱟ ᱾ ᱩᱱ ᱠᱷᱚᱱ ᱜᱮ ᱩᱱᱠᱤᱱ ᱨᱮᱱ ᱵᱚᱝᱥᱚ ᱫᱚ ᱡᱟᱹᱛ ᱢᱩᱨᱢᱩ ᱠᱚ ᱢᱮᱛᱟᱠᱚ ᱠᱟᱱᱟ ᱾ ᱮᱴᱟᱜ ᱯᱟᱹᱨᱤᱥ ᱦᱚᱲ ᱠᱚ ᱫᱚ ᱚᱡᱟᱹᱛ ᱞᱮᱠᱷᱟᱱ ᱠᱚ ᱱᱩᱠᱩ ᱦᱚᱲ ᱢᱩᱨᱢᱩ ᱜᱮ ᱠᱚ ᱡᱟᱹᱛ ᱛᱟᱞᱟ ᱵᱚᱱᱟ ᱾
ᱡᱩᱫᱤ ᱢᱩᱨᱢᱩ ᱦᱚᱲ ᱠᱚ ᱚᱡᱟᱛ ᱞᱮᱱᱠᱷᱟᱱ ᱦᱟᱸᱥᱫᱟᱜ ᱦᱚᱲ ᱠᱚ ᱡᱟᱹᱛ ᱛᱟᱞᱟ ᱠᱚᱣᱟ ᱾
=====
ᱠᱷᱮᱨᱣᱟᱞ ᱟᱹᱨᱤᱵᱟᱺᱫᱤ
ᱠᱨᱤᱥᱱᱟ ᱪᱚᱱᱫᱨᱚ ᱴᱤᱰᱩ
===================
0 Comments